Pramāṇa · Search · About · API

Angirasi 347

Aṅgirasī 347

Language
Sanskrit

Contents

347.1

tasyau̍da̱nasya̱ bṛha̱spati̱ḥ śiro̱ brahma̱ mukha̍m

347.2

dyāvā̍pṛthi̱vī śrotre̍ sūryācandra̱masā̍va̱kṣiṇī̍ sa̱ptaṛṣa̍yaḥ prāṇāpā̱nāḥ

347.3

cakṣu̍rmusa̱laṃ kāma̍ u̱lūkha̍lam

347.4

diti̱ḥ śūrpa̱madi̍tiḥ śūrpagrā̱hī vātopā̍vinak

347.5

aśvā̱ḥ kaṇā̱ gāva̍staṇḍu̱lā maśa̍kāstuṣā̍ḥ

347.6

kambu̍ phalī̱karaṇā̱ḥ śaro̱'bhram

347.7

śyā̱mamayau̍sya mā̱ṃsāni̱ lohi̍tamasya̱ lohi̍tam

347.8

trapu̱ bhasma̱ hari̍ta̱ṃ varṇa̍: puṣka̍ramasya ga̱ndhaḥ

347.9

khala̱: pātra̱ṃ sphyāva̍ṃsā̱vīṣe̱ anū̍kye̍

347.10

ā̱ntrāṇi̍ ja̱travo̍ gu̱dā̍ vara̱trāḥ

347.11

i̱yame̱va pṛ̍thi̱vī ku̱mbhī bha̍va̱ti̱ rādhya̍mānasyauda̱nasya̱ dyaura̍pi̱dhāna̍m

347.12

sītā̱: parśa̍vaḥ si̱ka̍tā ūba̍dhyam

347.13

ṛ̱taṃ hastauva̱neja̍naṃ ku̱lyo̍'pase̍canam

347.14

ṛ̱cā ku̱mbhyadhi̍hitā̱rtvijye̍na prerṣi̍tā

347.15

brahma̍ṇā pari̍gṛhītā sāmnā paryū̍ḍhā

347.16

bṛha̱dāya̍vanaṃ rathanta̱raṃ da̱rviḥ

347.17

ṛ̱tava̍: pa̱ktāra̍ ārtta̱vāḥ sa̍mindhate

347.18

ca̱ruṃ pañca̍bilamukhaṃ gha̱rmo̍'bhīndhe

347.19

oda̱nena̍ ya̱jñava̍caḥ sarvaiṃ lo̱kāḥ samā̍pyā̱:

347.20

yasmi̍ntsamu̱dro dyaurbhūmi̍stra̱yova̍ra̱para̍ṃ śri̱tāḥ

347.21

yasya̍ de̱vā a̍kalpantocchi̱ṣṭe ṣa̍ḍaśītaya̍:

347.22

taṃ tvau̍danasya pṛcchāmi̱ yo a̍sya mahi̱mā ma̱hān

347.23

sa ya audanasya̍ mahi̱māna̍ṃ vi̱dyāt

347.24

nālpa̱ iti̍ brūyā̱nnānu̍pasecana̱ iti̱ nedaṃ ca̱ kiṃ ceti̍

347.25

yāva̍ddā̱tābhi̱manye̍ta̱ tannāti̍ vadet

347.26

brahma̍vā̱dino̍ vada̱nti parā̍ñcamoda̱naṃ prāśī̱3ḥ pratyañcā̍3̱miti̍

347.27

tvamo̍da̱naṃ prāśī̱3stvāmo̍da̱nā3 iti̍

347.28

parā̍ñcaṃ caina̱ṃ prāśī̍: prā̱ṇāstvā̍ṃ hāsyantītyainamāha

347.29

pratyañcaiṃ cainaṃ prāśīra̍pā̱nāstvā̍ṃ hāsyantītyainamāha

347.30

naivāhamoda̱naṃ na māmau̍danaḥ

347.31

oda̱na e̱vauda̱naṃ prāśī̍t

347.31.p1

tata̍ścainama̱nyena̍ śī̱rṣṇā prāśī̱ryaina̱ṃ caitaṃ pūrva̱ ṛṣa̍yaḥ prāśnan (1)
jye̱ṣṭhaste̍ pra̱jā ma̍riṣyatītyainamāha

347.31.p2

2

347.31.p3

taṃ vā a̱haṃ nārvāñca̍ṃ na parā̍ñcaṃ na pratya̍ñcam (3)
bṛha̱spati̍nā śī̱rṣṇā (4) | tenai̍na̱ṃ prāśi̍ṣa̱ṃ tenai̍namajīgamam (5)
e̱ṣa vā o̍danaḥ sarvā̍ṅgaḥ sarva̍paruḥ sarva̍tanūḥ

347.31.p4

6

347.32

sarvā̍ṅga eva sarva̍paruḥ sarva̍tanūḥ saṃ bha̍vati̱ ya evaṃ veda̍ (7)

347.33

tata̍ścainamanyābhyā̱ṃ śrotrā̍bhyāṃ prāśī̱ryābhyā̱ṃ caitaṃ pūrva̱ ṛṣa̍yaḥ prāśnan (8)
ba̱dhiro bha̍viṣyasītyainamāha| taṃ vā a̱haṃ nārvāñca̍ṃ na parā̍ñcaṃ na pratya̍ñcam (6)
dyāvā̍pṛthi̱vībhyā̱ṃ śrotrā̍bhyām (10) | tābhyā̍mena̱ṃ prāśi̍ṣa̱ṃ tābhyā̍menamajīgamam
e̱ṣa vā o̍danaḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva sarva̍paruḥ sarva̍tanūḥ saṃ bha̍vati̱ ya evaṃ veda̍ (11)

347.34

tata̍ścainamanyābhyā̍ma̱kṣībhyā̱ṃ prāśī̱ryābhyā̱ṃ caitaṃ pūrva̱ ṛṣa̍yaḥ prāśnan (12)
a̱ndho bha̍viṣyasītyainamāha | taṃ vā a̱haṃ nārvāñca̍ṃ na parā̍ñcaṃ na pratya̍ñcam (13)
sūryā̍candra̱masā̍bhyāma̱kṣībhyā̍m (14) | tābhyā̍mena̱ṃ prāśi̍ṣa̱ṃ tābhyā̍menamajīgamam
e̱ṣa vā o̍danaḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva sarva̍paruḥ sarva̍tanūḥ saṃ bha̍vati̱ ya evaṃ veda̍ (15)

347.35

tatta̍ścai̱nama̱nye̍na̱ mukhe̍na̱ prāśī̱ryene̍ cai̱taṃ pūrva̱ ṛṣa̍yaḥ prā̱śnan (16)
mu̱kha̱taste̍ pra̱jā ma̍riṣyatītyainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (17)
brahma̍ṇā̱ mukhe̍na (18) | tenai̍na̱ṃ prāśi̍ṣa̱ṃ tenai̍namajīgamam
e̱ṣa vā o̍da̱naḥ sarvā̍ṅgaḥ sarva̍paruḥ sarva̍tanūḥ
sarvā̍ṅga e̱va sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (19)

347.36

tatta̍ścai̱nama̱nyayā̍ ji̱hvayā̍ prāśī̱ryayā̍ cai̱taṃ pūrva̱ ṛṣa̍yaḥ prā̱śnan (20)
ji̱hvā te̍ mariṣyatītyainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (21)
a̱gnerji̱hvayā̍ (22) | tayai̍na̱ṃ prāśi̍ṣa̱ṃ tayai̍namajīgamam
e̱ṣa vā o̍da̱naḥ sarvā̍ṅgaḥ sarva̍paruḥ sarva̍tanūḥ
sarvā̍ṅga e̱va sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (23)

347.37

tatta̍ścai̱nama̱nyairdantai̍ḥ prāśī̱ryaiścaitaṃ pūrva̱ ṛṣa̍yaḥ prā̱śnan (24)
da̱ntāste̍ śātsyantītyainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (25)
ṛ̱tubhi̱rdantai̍ḥ (26) | tairai̍na̱ṃ prāśi̍ṣa̱ṃ tairai̍namajīgamam
e̱ṣa vā o̍da̱naḥ sarvā̍ṅgaḥ sarva̍paruḥ sarva̍tanūḥ
sarvā̍ṅga e̱va sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (27)

347.38

tatta̍ścai̱nama̱nyaiḥ prā̍ṇāpā̱naiḥ prāśī̱ryaiścaitaṃ pūrva̱ ṛṣa̍yaḥ prā̱śnan (28)
prā̱ṇā̱pā̱nāstvā̍ hāsyantītyainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (29)
sa̱ptarṣi̍bhiḥ prāṇāpā̱naiḥ (30) | tairai̍na̱ṃ prāśi̍ṣa̱ṃ tairai̍namajīgamam
e̱ṣa vā o̍da̱naḥ sarvā̍ṅgaḥ sarva̍paruḥ sarva̍tanūḥ
sarvā̍ṅga e̱va sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (31)

347.39

tatta̍ścai̱nama̱nye̍na̱ vyaca̍sā̱ prāśī̱ryene̍ cai̱taṃ pūrva̱ ṛṣa̍yaḥ prā̱śnan (32)
rā̱jaya̱kṣmastvā̍ haniṣyatītyainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (33)
a̱ntari̍kṣeṇa̱ vyaca̍sā (34) | tenai̍na̱ṃ prāśi̍ṣa̱ṃ tenai̍namajīgamam
e̱ṣa vā o̍da̱naḥ sarvā̍ṅgaḥ sarva̍paruḥ sarva̍tanūḥ
sarvā̍ṅga e̱va sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (35)

347.40

tatta̍ścai̱nama̱nye̍na pṛ̱ṣṭhena̱ prāśī̱ryene̍ cai̱taṃ pūrva̱ ṛṣa̍yaḥ prā̱śnan (36)
vi̱dyuttvā̍ haniṣyatītyainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (37)
di̱vā pṛ̱ṣṭhena̍ | tenai̍na̱ṃ prāśi̍ṣa̱ṃ tenai̍namajīgamam
e̱ṣa vā o̍danaḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (38)

347.41

tata̍ścainama̱nyeno̍rasā̱ prāśī̱ryena̍ caitaṃ pūrva̱ ṛṣa̍yaḥ prāśnan (36)
kṛ̱ṣyā na rā̍tsyasītyainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (40)
pṛ̱thi̱vyora̍sā | tenai̍naṃ prāśi̍ṣaṃ tenai̍namajīgamam
e̱ṣa vā o̍danaḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (41)

347.42

tata̍ścainama̱nyeno̱dare̍ṇa̱ prāśī̱ryena̍ caitaṃ pūrva̱ ṛṣa̍yaḥ prāśnan (42)
u̱da̱ra̱dāra̍stvā̍ haniṣyatītyainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (43)
sa̱tyeno̱dare̍ṇa | tenai̍naṃ prāśi̍ṣaṃ tenai̍namajīgamam
e̱ṣa vā o̍danaḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (44)

347.43

tata̍ścainama̱nyena̍ ba̱stinā̍ prāśī̱ryena̍ caitaṃ pūrva̱ ṛṣa̍yaḥ prāśna̍n (45)
a̱psu ma̍riṣyasītyainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (46)
sa̱mu̱dreṇa̍ ba̱stinā̍ (47) | tenai̍naṃ prāśi̍ṣaṃ tenai̍namajīgamam
e̱ṣa vā o̍danaḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (48)

347.44

tata̍ścainama̱nyābhyā̍mū̱rubhyā̍ṃ prāśī̱ryābhyā̍ṃ caitaṃ pūrva̱ ṛṣa̍yaḥ prāśna̍n (46)
ū̱rū te̍ mariṣyata̱ ityainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (50)
mi̱trāvaru̍ṇayorū̱rubhyā̍m (51) | tābhyā̍menaṃ prāśi̍ṣaṃ tābhyā̍mena̱majī̍gamam
e̱ṣa vā o̍danaḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (52)

347.45

tata̍ścainama̱nyābhyā̍ma̱ṣṭhīva̍dbhyā̱ṃ prāśī̱ryābhyā̍ṃ caitaṃ pūrva̱ ṛṣa̍yaḥ prāśna̍n (53)
srāmo bha̍viṣyasītyainamāha | taṃ vā a̱haṃ nārvāñca̱ṃ na parā̍ñca̱ṃ na pratyañca̍m (54)
tvaṣṭura̱ṣṭhīva̍dbhyām| tābhyā̍menaṃ prāśi̍ṣaṃ tābhyā̍mena̱majī̍gamam
e̱ṣa vā o̍danaḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva sarva̍paruḥ sarva̍tanūḥ saṃ bha̍vati̱ ya e̱vaṃ veda̍ (55)

347.46

tata̍ścainama̱nyābhyā̱ṃ pādā̍bhyā̱ṃ prāśī̱ryābhyā̍ṃ cai̱taṃ pūrva̱ ṛṣa̍yaḥ prāśna̱n (56)
ba̱hucā̱rī bha̍viṣya̱sītye̍nama̱āha | taṃ vā a̱haṃ nārvāñca̱ṃ na parā̍ñca̱ṃ na pratya̍ñcam (57)
a̱śvino̍ḥ pādā̍bhyām | tābhyā̍mena̱ṃ prāśi̍ṣa̱ṃ tābhyā̍mena̱majī̍gamam
e̱ṣa vā o̍da̱naḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva̱ sarva̍paru̱ḥ sarva̍tanūḥ saṃ bha̍vati̱ ya evaṃ veda̍ (58)

347.47

tata̍ścainama̱nyābhyā̍ṃ prapa̱dābhyā̍ṃ prāśī̱ryābhyā̍ṃ cai̱taṃ pūrva̱ ṛṣa̍yaḥ prāśna̱n (56)
sarpa̍stvāṃ haniṣya̱tītye̍nama̱āha | taṃ vā a̱haṃ nārvāñca̱ṃ na parā̍ñca̱ṃ na pratya̍ñcam (60)
sa̱vi̱tuḥ prapa̱dābhyām | tābhyā̍mena̱ṃ prāśi̍ṣa̱ṃ tābhyā̍mena̱majī̍gamam
e̱ṣa vā o̍da̱naḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva̱ sarva̍paru̱ḥ sarva̍tanūḥ saṃ bha̍vati̱ ya evaṃ veda̍ (61)

347.48

tata̍ścainama̱nyābhyā̱ṃ hastā̍bhyā̱ṃ prāśī̱ryābhyā̍ṃ cai̱taṃ pūrva̱ ṛṣa̍yaḥ prāśna̱n (62)
brāhma̱ṇaṃ ha̍niṣya̱sītye̍nama̱āha | taṃ vā a̱haṃ nārvāñca̱ṃ na parā̍ñca̱ṃ na pratya̍ñcam (63)
ṛ̱tasya̱ hastā̍bhyām (64) | tābhyā̍mena̱ṃ prāśi̍ṣa̱ṃ tābhyā̍mena̱majī̍gamam
e̱ṣa vā o̍da̱naḥ sarvā̍ṅgaḥ sarva̍paruḥ sarva̍tanūḥ
sarvā̍ṅga eva̱ sarva̍paru̱ḥ sarva̍tanūḥ saṃ bha̍vati̱ ya evaṃ veda̍ (65)

347.49

tata̍ścainama̱nyayā̍ prati̱ṣṭhayā̱ prāśī̱ryayā̍ cai̱taṃ pūrva̱ ṛṣa̍yaḥ prāśna̱n (66)
apra̍tiṣṭhāno̱'nāya̍tano ma̍riṣya̱sītye̍nama̱āha (67)
taṃ vā a̱haṃ nārvāñca̱ṃ na parā̍ñca̱ṃ na pratya̍ñcam (68) | sa̱tye prati̍ṣṭhāya̍ (66)
tayai̍na̱ṃ prāśi̍ṣa̱ṃ tayai̍nama̱jīga̍mam (70) | e̱ṣa vā o̍da̱naḥ sarvā̍ṅgaḥ sarva̍paruḥ sarva̍tanūḥ (71)
sarvā̍ṅga eva̱ sarva̍paru̱ḥ sarva̍tanūḥ saṃ bha̍vati̱ ya evaṃ veda̍ (72)

347.50

e̱tadvai bra̱hmasya̍ vi̱ṣṭapa̱ṃ yadauda̱naḥ

347.51

bra̱hmalo̱ko bha̍vati̱ bra̱hmasya̍ vi̱ṣṭapi̍ śrayate̱ ya evaṃ veda̍

347.52

e̱tasmā̱dvā o̍da̱nāttraya̍striṃśataṃ lo̱kānnirmi̍mīta pra̱jāpa̍tiḥ

347.53

teṣā̍ṃ pra̱jñānā̍ya ya̱jñamasṛjata

347.54

sa ya evaṃ vi̱duṣe̍ upadra̱ṣṭā bha̍va̍ti prā̱ṇaṃ ru̍ṇaddhi

347.55

na ca̍ prā̱ṇaṃ ru̱ṇaddhi̱ sarva̍jyā̱niṃ jī̍yate

347.56

na ca̍ sarva̍jyā̱niṃ jī̍yatai pu̱raina̱ṃ jara̍saḥ prā̱ṇo jahā̍ti

Linked texts (2)