Pramāṇa · Search · About · API

Angirasi 353

Aṅgirasī 353

Language
Sanskrit

353.p1

[ ekādaśakāṇḍe anuvākāḥ 5, sūktāni 10, ṛcaḥ 313 ]

353.1

sa̱tyaṃ bṛ̱hadṛ̱tamu̱graṃ dī̱kṣā tapo̱ brahma̍ ya̱jñaḥ pṛ̍thi̱vīṃ dhā̍rayanti
sā no̍ bhū̱tasya̱ bhavya̍sya̱ patnyu̱ruṃ lo̱kaṃ pṛ̍thi̱vī na̍ḥ kṛṇotu

353.2

a̱sa̱ṃbā̱dhaṃ madhya̍to mā̍na̱vānā̱ṃ yasyā̍ u̱dvata̍ḥ pra̱vata̍ḥ sa̱maṃ ba̱hu
nānā̍vīryā̱ oṣa̍dhīryā bibha̍rti pṛthi̱vī na̍ḥ prathatāṃ rā̱dhya̍tāṃ naḥ

353.3

yasyā̍ṃ sa̱mudra u̱ta sindhu̍rāpo̱ yasyā̱manna̍ṃ kṛ̱ṣṭaya̍ḥ saṃba̱bhūvu̍ḥ
yasyā̍mi̱daṃ jinva̍ti prā̱ṇadeja̱tsā no̱ bhūmi̍ḥ pūrva̍pe̱ye da̍dhātu

353.4

yasyā̱ścata̍sraḥ pra̱diśa̍ḥ pṛthi̱vyā yasyā̱manna̍ṃ kṛ̱ṣṭaya̍ḥ saṃba̱bhūvu̍ḥ
yā bibha̍rti bahu̱dhā prā̱ṇadeja̱tsā no̱ bhūmi̱rgoṣvapyanne̍ dadhātu

353.5

yasyā̱ṃ pūrve̍ pūrva̱janā̍ vicakri̱re yasyā̍ṃ de̱vā asu̍rāna̱bhyava̍rtayan
gavāmaśvā̍nā̱ṃ vaya̍saśca vi̱ṣṭhā bhaga̱ṃ varca̍ḥ pṛthi̱vī no̍ dadhātu

353.6

vi̱śvaṃbha̱rā va̍sudhā̱nī pra̍ti̱ṣṭhā hira̍ṇyavakṣā̱ jaga̍to ni̱veśa̍nī
vai̱śvā̱na̱raṃ bibhra̍tī̱ bhūmi̍ra̱gniminda̍ṛṣabhā dravi̍ṇe no dadhātu

353.7

yāṃ rakṣa̍ntyasva̱pnā vi̱śvadā̍nīṃ de̱vā bhūmi̍ṃ pṛthi̱vīmapra̍mādam
sā no̱ madhu̍ pri̱yaṃ du̍hā̱matho̍ ukṣatu̱ varca̍sā

353.8

yārṇa̍ve'dhi̍ sali̱lamagra̍ āsī̱dyāṃ mā̱yābhi̍ranvaca̍ranmanī̱ṣiṇa̍ḥ
yasyā̱ hṛda̍yaṃ pa̱rame vyo̍mantsa̱tyenāvṛ̍tama̱mṛta̍ṃ pṛthi̱vyāḥ
sā no̱ bhūmi̱stviṣi̱ṃ bala̍ṃ rā̱ṣṭre da̍dhātūtta̱me

353.9

yasyā̱māpa̍ḥ parica̱rāḥ sa̍ṃmā̱nīra̍horā̱tre apra̍māda̍ṃ kṣara̍nti
sā no̱ bhūmi̱rbhūri̍dhārā̱ payo̍ duhā̱matho̍ ukṣatu̱ varca̍sā

353.10

yāma̱śvināvami̍mātāṃ vi̱ṣṇuryasyā̱ṃ vica̍krame
indro̱ yāṃ ca̱kra ā̱tmane̍nami̱trāṃ śacī̱pati̍ḥ
sā no̱ bhūmi̱rvi sṛ̍jatāṃ mā̱tā pu̱trāya̍ me̱ paya̍ḥ

353.11

gira̍yaste parva̍tā hima̱vanto̍raṇya̍ṃ te pṛthi̱vi syo̱nama̍stu
ba̱bhruṃ kṛ̱ṣṇāṃ rohi̍ṇīṃ vi̱śvarū̍pāṃ dhru̱vāṃ bhūmi̍ṃ pṛthi̱vīmindre̍guptām
ajī̍tohato̱ akṣa̍to̱dhyaṣṭhā̍ṃ pṛthi̱vīmaham

353.12

yatte̱ madhya̍ṃ pṛthi̱vi yacca̱ nabhya̱ṃ yāsta̍ ūrja̍sta̱nva̱1̱̍ḥ saṃba̍bhū̱vuḥ
tāsu̍ no dhe̱hyabhi na̍ḥ pavasva mā̱tā bhūmi̍ḥ pu̱tro a̱haṃ pṛ̍thi̱vyāḥ
pa̱rjanya̍ḥ pi̱tā sa u̍ naḥ pipartu

353.13

yasyā̱ṃ vedi̍ṃ parigṛhṇa̱nti bhūmyā̱ṃ yasyā̍ṃ ya̱jñaṃ ta̱nvate̍ vi̱śvaka̍rmāṇaḥ
yasyā̍ṃ mī̱yante̱ svara̍vaḥ pṛthi̱vyāmū̱rdhvāḥ śu̱krā āhu̍tyāḥ pu̱rastā̍t
sā no̱ bhūmi̍rvardhayadvardha̍mānā

353.14

yo no̱ dveṣa̍tpṛthivi̱ yaḥ pṛ̍ta̱nyādyo'bhi̱dāsa̱nmana̍sā̱ yo va̱dhena̍
taṃ no̍ bhūme randhaya pūrva̱kṛtva̍ri

353.15

tvajjā̱tāstvayi̍ caranti̱ martyā̱stvaṃ bi̍bharṣi dvipa̱dastvaṃ catu̍ṣpadaḥ
tave̱me pṛ̍thivi̱ pañca̍ māna̱vā yebhyo̱ jyoti̍ra̱mṛta̱ṃ martye̍bhya u̱dyantsūryo̍ ra̱śmibhi̍rāta̱noti̍

353.16

tā na̍: pra̱jāḥ saṃ du̍hratā̱ṃ samagrā̱ vāco̱ madhu̍ pṛthivi dhehi̱ mahya̍m

353.17

vi̱śvasva̍ṃ mā̱tara̱moṣa̍dhīnāṃ dhru̱vāṃ bhūmi̍ṃ pṛthi̱vīṃ dharma̍ṇā dhṛ̱tām
śi̱vāṃ syo̱nāma̍nu carema vi̱śvahā̍

353.18

ma̱hatsa̱dhastha̍ṃ maha̱tī ba̱bhūvi̍tha ma̱hānvega̍ e̱jathu̍rvepa̱thuṣṭe̍
ma̱hāṃstvendrā̍ rakṣatyapra̱mādam
sā no̍ bhūme̱ pra ro̍caya̱ hira̍ṇyasyeva sa̱ṃdṛśi̱ mā no̍ dvikṣata̱ kaśca̱na

353.19

a̱gnirbhūmyā̱moṣa̍dhīṣva̱gnimāpo̍ bibhra̱tya̱gniraśmā̍su
a̱gnira̱ntaḥ puru̍ṣesu goṣvaśve̍ṣva̱gnaya̍:

353.20

a̱gnirdiva̱ ā ta̍patya̱gnerde̱vasyo̱rdhva1ntari̍kṣam
a̱gniṃ martā̍sa indhate havya̱vāha̍ṃ ghṛ̱tapri̍yam

353.21

a̱gnivā̍sāḥ pṛthivī̱ sitā̱ṅgasti̱gmaśī̍mantaṃ saṃśi̍taṃ mā kṛṇotu

353.22

bhūmyā̍ṃ de̱vebhyo̍ dadati ya̱jñaṃ ha̱vyamara̍ṃkṛtam
bhūmyā̍ṃ manu̱ṣyā̍ jīvanti sva̱dhayānne̍ṃna̱ martyā̍:
sā no̱ bhūmi̍: prāṇa̱māyu̍rdadhātu ja̱rada̍ṣṭiṃ mā pṛthivī kṛṇotu

353.23

yaste̍ ga̱ndhaḥ pṛ̍thivi̱ saṃba̱bhūva̱ yaṃ bibhra̍tyoṣa̍dhayo̱ yamāpa̍:
yaṃ ga̍ṃdha̱rvā a̍psa̱rasa̍śca bheji̱re tena̍ mā sura̱bhiṃ kṛ̍ṇu̱ mā no̍ dvikṣata̱ kaśca̱na

353.24

yaste̍ ga̱ndhaḥ pu̱ṣkara̍māvi̱veśa̱ yaṃ sa̍ṃja̱bhruḥ sūryā̍yā vi̱vā̱he
ama̍rtyāḥ pṛthivi ga̱ndhamagre̱ tena̍ mā sura̱bhiṃ kṛ̍ṇu̱ mā no̍ dvikṣata̱ kaśca̱na

353.25

yaste̍ ga̱ndhaḥ puru̍ṣepu̱ strīṣu̱ puṃsu̱ bhago̱ ruci̍:
yo aśve̍ṣu vī̱reṣu̱ yo mṛ̱geṣū̱ta ha̱stiṣu̍
ka̱nyā̍yāṃ varco̱ yadbhūmè̱ tenā̱smām̐ a̱pi saṃ sṛ̍ja̱ mā no̍ dvikṣata̱ kaśca̱na

353.26

śi̱lā bhūmi̍raśma̱ā pāṃsu̍: sā bhūmi̍: saṃdhṛ̍tā dhṛ̱tā
tasyai̍ hira̍ṇyavakṣase pṛthi̱vyā a̍kara̱ṃ nama̍:

353.27

yasyā̍ṃ vṛ̱kṣā vā̍naspa̱tyā dhru̱vāstiṣṭha̍nti vi̱śvahā̍
pṛ̱thi̱vīṃ vi̱śvadhā̍yasaṃ dhṛ̱tāma̱cchāva̍dāmasi

353.28

u̱dīrā̍ṇā u̱tāsī̍nā̱stiṣṭha̍ntaḥ pra̱krāma̍ntaḥ
pa̱dbhyāṃ dakṣi̍ṇasavyā̱bhyāṃ mā vya̍thiṣmahi̱ bhūmyā̍m

353.29

vi̱mṛ̱gva̱rīṃ pṛ̍thi̱vīmā va̍dāmi kṣa̱māṃ bhūmi̱ṃ brahma̍ṇā vāvṛdhā̱nām
ūrja̱ṃ puṣṭa̱ṃ bibhra̍tīmanna̱bhāga̍ṃ ghṛ̱taṃ tvā̱bhi ni ṣī̍dema bhūme

353.30

śu̱ddhā na̱ āpa̍sta̱nve̱3̱̍ kṣarantu̱ yo na̍ḥ se̱durapi̱ye taṃ ni da̍dhmaḥ
pa̱vitre̍ṇa pṛthi̱vi motpu̍nāmi

353.31

yāste̱ prācī̍: pra̱diśo̱ yā udī̍cī̱ryāste̍ bhūme adha̱rādyāśca̍ pa̱ścāt
syo̱nāstā mahya̍ṃ cara̍te bhavantu mā ni pa̍pta̱ṃ bhuva̍ne śi̱śriyā̱ṇaḥ

353.32

mā na̍ḥ pa̱ścānmā pu̱rastā̍nnudiṣṭhā̱ motta̍rā̱dadha̍rāduta
sva̱sti bhū̍me no bhava̱ mā vi̍danparipa̱nthino̱ varī̍yo yāvayā va̱dham

353.33

yāva̍tte̱bhi vi̱paśyā̍mi̱ bhūme̱ sūrye̍ṇa me̱dinā̍
tāva̍nme̱ cakṣu̱rmā me̍ṣṭho̱ttarā̍mutta̱rāṃ samā̍m

353.34

yacchayā̍naḥ paryā̱varte̱ dakṣi̍ṇaṃ sa̱vyama̱bhi bhū̍me pā̱rśvam
u̱ttā̱nāstvā̍ pra̱tīcī̍ṃ yatpṛ̱ṣṭībhi̱radhi̱śema̍he
mā hi̍ṃsīstatra̍ no bhūme̱ sarva̍sya pratiśīvari

353.35

yatte̍ bhūme vi̱khanā̍mi kṣi̱praṃ tadapi̍ rohatu
mā te̱ marma̍ vimṛgvari̱ mā te̱ hṛdaya̍marpipam

353.36

grī̱ṣmaste̍ bhūme va̱rṣāṇi̍ śa̱raddhe̍ma̱ntaḥ śi̍śi̱ro va̍sa̱ntaḥ
ṛ̱tava̍ste vihi̍tā hāyanī̱raho̍rā̱tre pṛ̍thivi no duhātām

353.37

yārpa̍ sa̱rpa vi̍ja̱mānā̍ vimṛ̱gvarī̱ yasyā̍māsa̱nnagnayo̱ ye a̱psva1̱̍ntaḥ
parā̍ da̱syundada̍tī deva̱pīyū̱ṃnindra̍ṃ vṛṇā̱nā pṛ̍thi̱vī na vṛ̱tram
śa̱krāya̍ dadhre vṛṣa̱bhāya̱ vṛṣṇe̍

353.38

yasyā̍ṃ sado̱havi̱rdhāne̱ yūpo̱ yasyā̍ṃ ni̱mīyate̍
brahmā̍ṇo̱ yasyā̱marca̍ntyṛ̱gbhiḥ sāmnā̍ ya̱jurvida̍ḥ
yu̱jyante̱ yasyā̍mṛ̱tvija̱ḥ somu̱mindrā̍ya pāta̍ve

353.39

yasyā̱ṃ pūrve̍ bhūta̱kṛta̱ ṛṣa̍yo̱ gā udā̱nacu̍ḥ
sa̱pta sa̱treṇa̍ ve̱dhasau̍ ya̱jñena̱ tapa̍sā sa̱ha

353.40

sā no̱ bhūmi̍rā di̍śatu̱ yaddhana̍ṃ kā̱mayā̍mahe
bhago̍ anu̱prayu̍ṅktā̱mindra̍ etu puro̱gava̍ḥ

353.41

yasyā̍ṃ gāya̍nti̱ nṛtya̍nti̱ bhūmyā̱ṃ martyā̍ vyai̱libā̍ḥ
yudhya̍nte yasyā̍mākra̱ndo yasyā̱ṃ vada̍ti dundu̱bhiḥ
sā no̱ bhūmi̱ḥ pra ṇu̍datāṃ sa̱patnā̍nasapa̱tnaṃ mā̍ pṛthi̱vī kṛ̍ṇotu

353.42

yasyā̱manna̍ṃ vrī̱hiya̱vau yasyā̍ i̱māḥ pañca̍ kṛ̱ṣṭaya̍ḥ
bhūmyai̍ pa̱rjanya̍patnyai̱ namo̍stu vṛ̱rṣameda̍se

353.43

yasyā̱ḥ puro̍ de̱vakṛ̍tā̱ḥ kṣetre̱ yasyā̍ viku̱rvate̍
pra̱jāpa̍tiḥ pṛthi̱vīṃ vi̱śvaga̍rbhāmā̱śāmā̍śāṃ ra̱ṇyā̍ṃ naḥ kṛṇotu

353.44

ni̱dhiṃ bibhra̍tī bahu̱dhā guhā̱ vasu̱ maṇi̱ṃ hira̍ṇyaṃ pṛthi̱vī da̍dātu me
vasū̍ni no vasu̱dā rāsa̍mānā de̱vī da̍dhātu suma̱nasyamā̍nā

353.45

jana̱ṃ bibhra̍tī bahu̱dhā vi̍vācasa̱ṃ nānā̍dharmāṇaṃ pṛthi̱vī ya̍thauka̱sam
sa̱hasra̱ṃ dhārā̱ dravi̍ṇasya me duhāṃ dhru̱veva̍ dhe̱nurana̍pasphurantī

353.46

yaste̍ sa̱rpo vṛ̍ści̱kastṛ̱ṣṭada̍ṃśmā he̱manta̍jabdhyo bhṛ̱malo̱ guhā̱ śaye̍
krimi̱rjanva̍tpṛthivi̱ yadyadeja̍ti̱ prāvṛṣi̱ tanna̱ḥ sarpa̱nmopa̍ sṛpa̱dyacchi̱vaṃ tena̍ṃ no mṛḍa

353.47

ye te̱ panthā̍no ba̱havo̍ janā̱yanā̱ ratha̍sya̱ vartmā̍nasa̱śca yāta̍ve
yaiḥ sa̍ṃcara̱ntyu̍bhaye̍ bha̱drapā̱pāstaṃ panthā̍naṃ jayemānamitra̱ma̍taskara̱ṃ yacchi̱vaṃ tena̍ṃ no mṛḍa

353.48

ma̱ltvaṃ bibhra̍tī gu̱rubhṛd‍bha̱drapā̱pasya̍ ni̱dhana̍ṃ titi̱kṣuḥ
va̱rā̱heṇa̍ pṛthi̱vī sa̍ṃvidā̱nā sū̱ka̱rāya̱ vi ji̍hīte mṛ̱gāya̍

353.49

ye ta̍ ā̍ra̱ṇyāḥ pa̱śavo̍ mṛ̱gā vane̍ hi̱tāḥ si̱ṃhā vyā̱ghrāḥ pu̍ruṣā̱daśca̍ra̍nti
u̱laṃ vṛka̍ṃ pṛthivi du̱cchunā̍mita ṛkṣīkā̱ṃ rakṣo̱ apa̍ bādhayā̱smat

353.50

ye ga̍ndha̱rvā a̍psa̱raso̱ ye cā̱rāyā̍ḥ kimī̱dina̍ḥ
pi̱śā̱cāntsarvā̱ rakṣā̍ṃsi̱ tāna̱smadbhū̍me yāvaya

353.51

yāṃ dvi̱pāda̍ḥ pa̱kṣiṇa̱ḥ saṃpata̍nti ha̱ṃsāḥ su̍pa̱rṇāḥ śa̍ku̱nā vayā̍ṃsi
yasyā̱ṃ vāto̍ mātari̱śveya̍te̱ rajā̍ṃsi kṛṇvaṃścyā̱vaya̍m̐śca vṛ̱kṣān
vāta̍sya pra̱vāmupa̍vāma̱nu vā̱tyarciḥ

353.52

yasyā̍ṃ kṛ̱ṣṇamaru̍ṇaṃ ca̱ saṃhi̍te ahorā̱tre vihi̍te bhū̱myāmadhi̍
va̱rṣeṇa̱ bhūmi̍ḥ pṛthi̱vī vṛ̱tāvṛ̍tā̱ sā no̍ dadhātu bha̱drayā̍ṃ pri̱ye dhāma̍nidhāmani

353.53

dyauśca̍ ma i̱daṃ pṛ̍thi̱vī cā̱ntari̍kṣaṃ ca me̱ vyaca̍ḥ
a̱gniḥ sūrya̱ āpo̍ me̱dhāṃ viśve̍ de̱vāśca̱ saṃ da̍duḥ

353.54

a̱hama̍smi̱ saha̍māna̱ utta̍ro̱ nāma̱ bhūmyā̍m
a̱bhī̱ṣāḍa̍smi vi̱śvāṣāḍāśā̍māśāṃ viṣā̱sahiḥ

353.55

a̱do yadi̍vi pratha̱mānā̱ purastā̍dde̱vairu̱ktā vyasarpo̍ mahi̱tvam
ā tvā̍ su̱bhūta̱mavi̍śatta̱dānī̱maka̍lpayathāḥ pra̱diśa̱ścata̍sraḥ

353.56

ye grāmā̱ yadara̍ṇya̱ṃ yāḥ sabhā̱ adhi̱ bhūmyā̍m
ye sa̱ṃgrāmā̱ḥ sami̍taya̱steṣu̱ cāru̍ vadema te

353.57

aśva̍ iva̱ rajo̍ dudhuve̱ vi tāñjanā̱nya ākṣi̍yanpṛthi̱vīṃ yādjā̍yata
ma̱ndrāgre̱tvarī̱ bhuva̍nasya go̱pā vana̱spatī̍nāṃ gṛ̱bhiroṣa̍dhīnām

353.58

yadvadā̍mi̱ madhu̍mattadva̍dāmi̱ yadīkṣe̍ taddha̍nanti mā
tviṣī̍mānasmi ju̱timā̱navānyā̱nhanmi̍ do̱dha̍taḥ

353.59

śa̱nti̱vā su̍ra̱bhiḥ syo̱nā kī̱lālo̍dhī paya̍svatī
bhūmi̱radhi̍ bravītu me pṛthi̱vī paya̍sā sa̱ha

353.60

yāma̱nvaiccha̍dvi̱viṣā̍ vi̱śvakarmānta̱rarṇa̍ve̱ raja̍si pravi̍ṣṭām
bhu̱ji̱ṣya̍ṃ pātra̱ṃ nihi̍ta̱ṃ guhā̱ yadāvi̱rbhāge̍ abhavanmā̱tṛma̍ddvya̍ḥ

353.61

tvama̍syāvapa̍nī̱ janā̍nā̱madi̍tiḥ kāma̱dughā̍ paprathā̱nā
yatta̍ ū̱naṃ tatta̱ ā pū̍rayāti pra̱jāpa̍tiḥ prathama̱jā ṛ̱tasya̍

353.62

u̱pu̱stāste̍ anamī̱vā aya̍kṣmā a̱smabhya̍ṃ santu pṛthi̱vi prasū̍tāḥ
dī̱rghaṃ na̱ āyu̍ḥ prati̱budhya̍mānā va̱yaṃ tubhya̍ṃ bali̱hṛta̍ḥ syāma

353.63

bhūme̍ mā̱tarni dhe̍hi mā bha̱drayā̍ su̱prati̍ṣṭhitam
sa̱ṃvidā̱nā di̱vā ka̍ve śri̱yāṃ mā̍ dhehi̱ bhūtyā̍m

Linked texts (9)