Pramāṇa · Search · About · API

Angirasi 391

Aṅgirasī 391

Language
Sanskrit

391.1

ṛṣiḥ—śantātiḥ || devatā—mantroktāḥ || chandaḥ—1 virāḍurobṛhatī; 2-4, 6-8, 10, 11,
13 anuṣṭup; 5 pañcapadā pathyāpaṅktiḥ; 9 pañcapadā kakummatī ( ?, triṣṭup ); 12 saptapadā'ṣṭiḥ;
14 catuṣpadā ( ? ) saṃkṛtiḥ
śāntā dyauḥ śāntā pṛthivī śāntamidamurva1ntarikṣam
śāntā uda̱nvatīrāpa̍ḥ śāntā na̍ḥ sa̱ntvoṣa̍dhīḥ

391.2

śāntāni̍ pūrvarū̱pāṇi̍ śāntaṃ no̍ astu kṛtākṛtam
śāntaṃ bhūta̍ ca̱ bhavya̍ ca̱ sarva̍meva śama̍stu naḥ

391.3

i̱yaṃ yā pa̍rame̱ṣṭhinī̱ vāgdevī̱ brahma̍saṃśitā
yayai̱va saṃsṛ̍je gho̱raṃ tayai̱va śāntirastu naḥ

391.4

i̱daṃ yatpara̍me̱ṣṭhina̱ṃ mano̍ vā̱ṃ brahma̍saṃśitam
yenaiva saṃsṛje gho̱raṃ tenaiva śāntirastu naḥ

391.5

i̱māni̱ yāni̍ pa̱ñcendriyāṇi̱ mana̍ḥṣaṣṭhāni me hṛdi̱ brahma̍ṇā saṃśitā̍ni
yaireva̱ saṃsṛ̍je gho̱raṃ taireva śāntirastu naḥ

391.6

śaṃ no̍ mitraḥ śaṃ varu̍ṇaḥ śaṃ viṣṇuḥ śaṃ pra̱jāpa̍tiḥ
śaṃ na̱ indro̱ bṛha̱spati̱ḥ śaṃ no̍ bhavatvarya̱mā

391.7

śaṃ no̍ mi̱traḥ śaṃ varu̍ṇaḥ śaṃ vi̱vasvām̐chamanta̍kaḥ
utpā̱tāḥ pā̍rthivā̱ntari̍kṣāḥ śaṃ no̍ di̱vica̍rā̱ grahā̍ḥ

391.8

śaṃ no̱ bhūmi̍rvepyamānā śamulkā nirha̍taṃ ca̱ yat
śaṃ gāvo̱ lohi̍takṣīrāḥ śaṃ bhūmi̱rava̍ tīrya̱tīḥ

391.9

nakṣatra̍mulkā̱bhiha̍ta̱ṃ śama̍stu na̱ḥ śaṃ no̍bhicā̱rāḥ śamu̍ santu kṛtyāḥ
śaṃ no̍ nikhā̍tā va̱lgāḥ śamulkā deśopasargāḥ śamu̍ no bhavantu

391.10

śaṃ no̱ grahā̍ścāndrama̱sāḥ śamā̍di̱tyaśca̍ rāhuṇā
śaṃ no̍ mṛ̱tyurghū̱make̍tuḥ śaṃ ru̱drāsti̱gmate̍jasaḥ

391.11

śaṃ ru̱drāḥ śaṃ vasa̍vaḥ śamā̍di̱tyāḥ śama̱gnaya̍ḥ
śaṃ no̍ maha̱rṣayo̍ de̱vāḥ śaṃ de̱vāḥ śaṃ bṛha̱spati̍ḥ

391.12

brahma̍ pra̱jāpa̍tirdhā̱tā lo̱kā vedā̍ḥ sa̱ptaṛṣayo̱gnaya̍ḥ
tairme̍ kṛ̱taṃ sva̱styaya̍na̱mindro̍ me̱ śarma̍ yacchatu̱ brahmā̍ me̱ śarma̍ yacchatu
viśve̍ me de̱vāḥ śarma̍ yacchantu̱ sarve̍ me de̱vāḥ śarma̍ yacchantu

391.13

yāni̱ kāni̍ cicchāntāni̍ lo̱ke sa̱ptaṛṣayo̍ vi̱duḥ
sarvā̍ṇi̱ śaṃ bhava̍ntu me̱ śaṃ me̍ a̱stvabha̍yaṃ me astu

391.14

pṛthi̱vī śā̱nti̍ra̱ntari̍kṣa̱ṃ śānti̱rdyauḥ śānti̱rāpa̱ḥ śānti̱roṣa̍dhaya̱ḥ śānti̱rvana̱spata̍ya̱ḥ
śānti̱rviśve̍ me de̱vāḥ śānti̱ḥ sarve̍ me de̱vāḥ śānti̱ḥ śānti̱ḥ śānti̱ḥ śānti̍bhiḥ
tābhi̱ḥ śānti̍bhi̱ḥ sarva̍ śānti̱bhiḥ śama̍yāmya̱haṃ yadi̱ha ghora̱ṃ yadi̱ha krūra̱ṃ
yadi̱ha pā̱paṃ tacchā̱ntaṃ tacchi̱vaṃ sarva̍me̱va śama̍stu naḥ

Linked texts (4)