Angirasi 54
Aṅgirasī 54
- Language
- Sanskrit
54.1
bhuriganaṣṭup
ha̱ri̱ṇasya̍ raghu̱ṣyado'dhi̍ śī̱rṣaṇi̍ bheṣa̱jam
sa kṣe̱triya̍ṃ vi̱ṣāṇa̍yā̱ viṣū̍cīnamanīnaśat
54.2
anu̍ tvā hari̱ṇo vṛṣā̍ pa̱dbhiśca̱turbhi̍rakramīt
viṣā̍ṇe̱ vi ṣye̍ gu̱ṣpita̱ṃ yada̍sya kṣe̱triya̍ṃ hṛ̱di
54.3
a̱do yada̍va̱roca̍te catu̍ṣpakṣamiva ccha̱diḥ
tenā̍ te sarvaṃ kṣetriyamaṅgebhyo nāśayāmasi
54.4
a̱mūrye di̱vi su̱bhage̱ vi̱cṛtau̱ nāma̍ tārake
vi kṣetri̍yasya muñcatāmadha̱maṃ pāśa̍mutta̱mam
54.5
āpa̱ iddhā u̍ bheṣa̱jīrāpo̍ amīva̱cāta̍nīḥ
āpo̱ viśva̍sya bheṣa̱jīstāstvā̍ muñcantu kṣetri̱yāt
54.6
yadā̍su̱teḥ kriyamā̍ṇāyāḥ kṣetri̱yaṃ tvā̱ vyāna̍śe
vedā̱haṃ tasya̍ bheṣa̱jaṃ kṣetri̍yaṃ nāśayāmi̱ tvat
54.7
apa̱vāse̱ nakṣa̍trāṇāmapa̱vāsa̍ u̱ṣasā̍mu̱ta | apā̍smatsa̱rvaṃ du̍rbhū̱tamapa̍ kṣetri̱yamu̍cchatu
Linked texts (2)
- Atharvaveda — Sanskrit
- Śaunakasaṃhitā — Sanskrit