Angirasi 64

Aṅgirasī 64

sīrā̍ yuñjanti ka̱vayo̍ yu̱gā vi ta̍nvate pṛ̱thak | dhīrā̍ de̱veṣu̍ sumna̱yau

yu̱nakta̱ sīrā̱ vi yu̱gā ta̍nota kṛ̱te yonau̍ vapate̱ha bīja̍m
vi̱rāja̍ḥ śru̱ṣṭiḥ sabha̍rā asa̱nno nedī̍ya̱ itsṛ̱ṇya̍ḥ pa̱kkamā ya̍van

lāṅga̍laṃ pa̱vīra̍vatsu̱śīma̍ṃ soma̱satsaru̍
udva̍patu gāma̱viṃ pra̱sthāva̍dratha̱vāha̍naṃ pīva̍rīṃ ca pra̱pharvya̍m

indra̱ḥ sītā̱ṃ ni gṛ̍hṇātu̱ tāṃ pū̱ṣābhi ra̍kṣatu | sā na̱ḥ paya̍svatī duhāmutta̍rāmuttarāṃ samā̍m

śu̱naṃ su̱phālā̱ vi tu̍dantu̱ bhūmi̍ṃ śu̱naṃ kī̱nāśā̍ anu̍ yantu vā̱hān
śu̱nāsī̍rā ha̱viṣā̱ tośa̍mānā su̱pi̱ppa̱lā oṣa̍dhīḥ kartama̱smai

śu̱naṃ vāhā̍: śu̱naṃ nara̍: śu̱naṃ kṛ̍ṣatu̱ lāṅga̍lam | śu̱naṃ va̍ra̱trā ba̍dhyantāṃ śu̱namaṣṭrāmudi̍ṅgaya

śu̱nāsī̍re̱ha sma̍ me juṣethām | yadi̱vi ca̱krathu̱: paya̱stene̱māmupa̍ siñcatam

sīte̱ vandā̍mahe̱ tvārvācī̍ subhage bhava | yathā̍ naḥ su̱manā̱ aso̱ yathā̍ naḥ su̱phalā̱ bhuva̍:

ghṛ̱tena̱ sītā̱ madhu̍nā̱ sama̍ktā̱ viśvai᳘rdevairanu̍matā ma̱rudbhi̍:
sā na̍: sīte̱ paya̍sā̱bhyāva̍vṛtsvorja̍svatī ghṛ̱tava̱tpinva̍mānā

Linked texts (2)