Angirasi 79: atha caturthaṃ kāṇḍam

Aṅgirasī 79

atha saptamaḥ prapāṭhakaḥ

ṛṣiḥ—venaḥ || devatā—bṛhaspatiḥ, ādityaḥ || chandaḥ—1, 3, 4, 6, 7 triṣṭup;
2, 5 puro'nuṣṭup triṣṭup

brahma̍ jajñānaṃ pra̍tha̱maṃ pu̱rastā̱dvi sī̍ma̱taḥ su̱ruco̍ ve̱na āva̍ḥ
sa bu̱dhnyā̍ upa̱mā a̍sya vi̱ṣṭhāḥ sa̱taśca̱ yoni̱masa̍taśca̱ vi va̍ḥ

i̱yaṃ pi̱tryā rā̱ṣṭryetvagre̍ pra̱thamāya̍ ja̱nuṣe̍ bhuva̱neṣṭhā̍ḥ
tasmā̍ e̱taṃ su̱ruca̍ṃ hvā̱rama̍haṃ gha̱rmaṃ śrī̍ṇantu pra̱thamāya̍ dhā̱syave̍

pra yo ja̱jñe vi̱dvāna̍sya bandhu̱rviśvā̍ de̱vānā̱ṃ jani̍mā vivakti
brahma̱ brahma̍ṇa ujja̍bhāra ma̱dhyānnī̱cairuccai̍ḥ sva̱dhā a̱bhi pra ta̍sthau

sa hi di̱vaḥ sa pṛ̍thi̱vyā ṛ̍ta̱sthā ma̱hī kṣema̱ṃ roda̍sī askabhāyat
ma̱hānma̱hī a̍skabhāya̱dvi jā̱to dyāṃ sa̱dma pārthi̍vaṃ ca̱ raja̍ḥ

sa bu̱dhnyā̍dā̱ṣṭra ja̱nuṣo̱bhyagra̱ṃ bṛha̱spati̍rdeva̱tā tasya̍ sa̱mrāṭ
aha̍ryacchu̱kraṃ jyoti̍ṣo ja̱niṣṭhātha̍ dyu̱manto̱ vi va̍santu vi̱prāḥ

nū̱naṃ tada̍sya kā̱vyo hi̍noti ma̱ho de̱vasya̍ pū̱rvyasya̱ dhāma̍
e̱ṣa ja̍jñe ba̱hubhi̍ḥ sā̱kama̱itthā pūrve̱ ardhe̍ vi̱ṣi̍te sa̱sannu̍

yo'tha̍rvāṇaṃ pi̱tara̍ṃ de̱vaba̍ndhuṃ bṛha̱spati̱ṃ nama̍sāva̍ ca̱ gacchā̍t
tvaṃ viśve̍ṣāṃ jani̱tā yathāsa̍ḥ ka̱virde̱vo na da̱bhāya̍tsvadhā̱vān

Linked texts (2)