Angirasi 80
Aṅgirasī 80
- Language
- Sanskrit
80.1
ṛṣiḥ—venaḥ || devatā—ātmā || chandaḥ—1, 5, 8 triṣṭup; 6 puro'nuṣṭup triṣṭup;
7 upariṣṭājjyotistriṣṭup
ya ā̍tma̱dā ba̍la̱dā yasya̱ viśva̍ u̱pāsa̍te pra̱śiṣa̱ṃ yasya̍ de̱vāḥ
yo'syeśe̍ dvi̱pado̱ yaścatu̍ṣpada̱ḥ kasmai̍ de̱vāya̍ ha̱viṣā̍ vidhema
80.2
yaḥ prā̍ṇa̱to ni̍miṣa̱to ma̍hi̱tvaiko̱ rājā̱ jaga̍to ba̱bhūva̍
yasya̍ chā̱yāmṛ̱taṃ yasya̍ mṛ̱tyuḥ kasmai̍ de̱vāya̍ ha̱viṣā̍ vidhema
80.3
yaṃ kranda̍sī̱ ava̍taśvaskabhā̱ne bhi̱yasā̍ne̱ roda̍sī̱ ahva̍yethām
yasyā̱sau panthā̱ raja̍so vi̱māna̱ḥ kasmai̍ de̱vāya̍ ha̱viṣā̍ vidhema
80.4
yasya̱ dyauru̱rvī pṛ̍thi̱vī ca̍ ma̱hī yasyā̱da u̱rva1̱ntari̍kṣam
yasyā̱sau sūryo̱ vita̍to mahitva kasmai̍ de̱vāya̍ ha̱viṣā̍ vidhema
80.5
yasya̱ viśve̍ hi̱mava̍nto mahitvā sa̱ṃmudre yasya̍ ra̱sāmi̱dāhu̍ḥ
i̱māśca̱ pradiśo̱ yasya̍ bā̱hū kasmai̍ de̱vāya̍ ha̱viṣā̍ vidhema
80.6
āpo̱ agre̍ viśva̱māvṛ̍nnga̱rbhaṃ dadhā̍nā a̱mṛtā̍ ṛ̱tajñā̍ḥ
yāsu̍ de̱vīṣvadhi̍ de̱va āsī̍tkasmai̍ de̱vāya̍ ha̱viṣā̍ vidhema
80.7
hira̱ṇya̱garbha̱ḥ sama̍vartta̱tāgre̍ bhū̱tasya̍ jā̱taḥ pati̱reka̍ āsīt
sa dā̍dhāra pṛthi̱vīmuta dyāṃ kasmai̍ de̱vāya̍ ha̱viṣā̍ vidhema
80.8
āpo̍ va̱tsaṃ ja̱naya̍ntī̱rgarbhamagre̍ samai̍rayan
tasyota jā̱yamāna̍syo̱lva̍ āsīddhira̱ṇyaya̍ḥ kasmai̍ de̱vāya̍ ha̱viṣā̍ vidhema
Linked texts (3)
- Atharvaveda — Sanskrit
- Śaunakasaṃhitā — Sanskrit
- Atharvavedaprātiśākhyamūlasūtra — Sanskrit