Angirasi 88
Aṅgirasī 88
- Language
- Sanskrit
88.1
vātā̍jjā̱to a̱ntari̍kṣādvi̱dyuto̱ jyoti̍ṣa̱spari̍
sa no̍ hiraṇya̱jāḥ śa̱ṅkhaḥ kṛ̱śanaḥ pā̱tvaṃha̍saḥ
88.2
yo a̍gra̱to ro̍ca̱nānā̍ṃ samu̱drādadhi̍ ja̱jñiṣe̍
śa̱ṅkhena̍ ha̱tvā rakṣā̍ṃsya̱triṇo̱ vi ṣa̍hāmahe
88.3
śa̱ṅkhenāmī̍vā̱mama̍tiṃ śa̱ṅkheno̱ta sadānvā̍ḥ
śa̱ṅkho no̍ vi̱śvabhe̍ṣajaḥ kṛ̱śanaḥ pā̱tvaṃha̍saḥ
88.4
di̱vi jā̱taḥ sa̍mudra̱jaḥ sindhu̍ta̱sparyābhṛ̍taḥ
sa no̍ hiraṇya̱jāḥ śa̱ṅkha ā̍yu̱ṣprata̍raṇo ma̱ṇiḥ
88.5
samudrājjāto ma̱ṇirvṛtrājjāto di̍vāka̱raḥ
so a̱smāntsarva̍taḥ pātu hetyā de̍vāsu̱rebhya̍ḥ
88.6
hira̍ṇyānā̱meko̍si somā̱ttvamadhi̍ jajñiṣe
rathe̱ tvama̍si darśa̱ta iṣu̍dhau ro̍ca̱nastvaṃ pra ṇa āyū̍ṃṣi tāriṣat
88.7
de̱vānā̱masthi̍ kṛ̱śana̍ṃ babhūva̱ tadā̱tmanva̱ccara̱tyapsva̍1̱ntaḥ
tattte̍ badhnā̱myāyu̍ṣe̱ varca̍se̱ balā̍ya dīrghāyu̱tvāya̍ śataśā̍radāya kā̱rśanastvā̱bhi ra̍kṣatu
88.1-2
a̱naḍvāndā̍dhāra pṛthi̱vīmu̱ta dyāmana̍ḍvāndā̍dhāro̱rva̍1̱ntari̍kṣam
a̱naḍvāndā̍dhāra pra̱diśa̱ḥ ṣaḍu̱rvīra̍na̱ḍvānviśva̱ṃ bhuva̍na̱mā vi̍veśa
88.2-2
a̱naḍvānindra̍ḥ sa pa̱śubhyo̱ vi ca̍ṣṭe trya̍ṃ cha̱kro vi mi̍mīte̱ adhva̍naḥ
bhū̱taṃ bha̍vi̱ṣyadbhuva̍nā duhā̍na̱ḥ sarvā̍m̐ de̱vānā̍ṃ carati vra̱tāni̍
88.3-2
indro̍ jā̱to ma̍nu̱ṣye̍1̱ṣvantargha̱rmasta̍ptaśca̍rati̱ śośu̍cānaḥ
su̱pra̱jāḥ santa̍sa u̱dvāre̱ na sa̍ṃpṛcyo̱ nāśnī̍yāda̍na̱ḍuho̍ vi̱jānan
88.4-2
a̱naḍu̱nduhe su̱kṛta̍sya lo̱ka aina̍ṃ pyāyayati̱ pava̍mānaḥ pu̱rastā̍t
pa̱rjanyo̱ dhārā̍ ma̱ruta̱ ūdho̍ asya ya̱jñaḥ payo̱ dakṣi̍ṇā doho̍ asya
88.5-2
yasya̱ neśe̍ ya̱jñapa̍ti̱rna ya̱jño nāsya̍ dā̱teśe̱ na pra̍tigrahī̱tā
yo vi̍śva̱jidvi̍śva̱bhṛdvi̍śvakarma̱ā gha̱rmaṃ no̍ brūta yata̱maścatu̍ṣpāt
88.6-2
yena̍ de̱vāḥ sva̍rāruru̱hurhitvā śarī̍rama̱mṛta̍sya̱ nābhi̍m
tena̍ṃ geṣma su̱kṛta̍sya lo̱kaṃ gha̱rmasya̍ vra̱tena̱ tapa̍sā yaśa̱syava̍ḥ
88.7-2
indro̍ rū̱peṇā̱bhirū̍hainaṃ pra̱jāpa̍tiḥ parame̱ṣṭhī vi̱rāṭ
viśvāna̍re akramata vaiśvāna̍re a̍kramatānaḍuhya̍kramata
so̍'ha̍ṃhayata̱ so̍'dhā̍rayata
88.8
madhya̍me̱tada̍na̱ḍuho̱ yatrai̱ṣa vaha̱ āhi̍taḥ
e̱tāva̍dasya prācī̱naṃ yāvā̍ṃnpratyaṅ samāhi̍taḥ
88.9
yo vedāna̱ḍuho dohā̍ntsa̱ptānu̍pada̱svata̍ḥ
pra̱jāṃ ca̍ lo̱kaṃ cā̍pnoti̱ tathā̍ sa̱ptaṛṣa̍yo viduḥ
88.10
pa̱dbhiḥ sedi̍mavakrāma̱nnirā̍ṃ ja̱ṅghābhi̍rutkhida̱n
śrame̍ṇānaḍu̱dvānkīlā̍laṃ kī̱nāśa̍ścā̱bhi ga̍cchataḥ
88.11
dvāda̱śa vā e̱tā rātrī̍rvra̱tyā̍ āhuḥ pra̱jāpa̍teḥ
tatropa̍ bra̱hma yo ve̱da tadvā a̍naḍu̱ho vra̱tam
88.12
du̱he sā̱yaṃ du̱he prā̱tardu̱he ma̱dhyaṃdi̍na̱ṃ pari̍
dohā̍ ye a̍sya̱ saṃya̍nti̱ tānvi̱dvānupa̍dasvataḥ
Linked texts (4)
- Atharvaveda — Sanskrit
- Śaunakasaṃhitā — Sanskrit
- Paippalādasaṃhitā — Sanskrit
- Atharvavedaprātiśākhyamūlasūtra — Sanskrit