Pramāṇa · Search · About · API

Arshika 120

Ārṣika 120

Language
Sanskrit

120.1

su̱sami̍ddho na̱ ā va̍ha de̱vām̐2 agne̍ ha̱viṣma̍te | hotā̍: pāva̱ka yakṣi̍ ca

120.2

madhu̍maṃtaṃ tanū̱napādya̱jñaṃ de̱veṣu̍ naḥ kave | a̱dyā kṛ̍ṇuṣvūtaye̍

120.3

narāśa̍ṃsami̱ha pri̱yama̱sminya̱jña upa̍ hvaye | madhu̍jihvaṃ havi̱ṣkṛtam

120.4

agne̍ su̱khata̍me̱ rathe̍ de̱vām̐2 ī̍ḷita̱ ā va̍ha | asi̱ hotā̱ manu̍rhitaḥ

120.1-2

1
yadya̍ sūra u̱dite̍ ' nāgā mi̱tro arya̍mā | suvāti̍ savi̱tā bhaga̍:

120.2-2

su̱prā̱vīra̍stu sa̱ kṣaya̍: pra nu yāma̍ntsudānavaḥ | ye no̱ aṃho̍ ' ti̱pipra̍ti

120.3-2

u̱ta sva̱rājo̍ adi̍tirada̱bdhasya̍ vra̱tasya̍ ye | ma̱ho rājāna īśa̍te

120.1-3

2
u̱ tvā ma̍daṃtu somā̍: kṛ̱ṇuṣva rādho̍ adrivaḥ | ava̍ brahma̱dviṣo̍ jahi

120.2-3

pa̱dā pa̱ṇīm̐rarā̍dhaso̱ ni bā̍dhasva ma̱hām̐2 a̍si | na hi tvā kaśca̱ na prati̍

120.3-3

tvamī̍śiṣe su̱tānā̱miṃdra̱ tvamasu̍tānām | tvaṃ rājā̍ janā̱nām

120.1-4

3
ā jāgṛ̍virvipra̍ ṛ̱taṃ ma̍tī̱nāṃ soma̍: punā̱no a̍sa̱dyonū̍ṣu
sapa̍ṃti̱ yaṃ mi̍thu̱nāso̱ nikā̍mā adhva̱ryavo̍ ra̱thirā̍saḥ su̱hastā̍:

120.2-4

sa pu̍nā̱na upa̍ sū̱re dadhā̍na̱ obhe a̍prā̱ roda̍sī̱ vi ṣa āva̍:
pri̱yā ci̱dyasya̍ priya̱sāta̍ ū̱tī sa̱to dhana̍ṃ kā̱riṇe̱ na pra ya̍ṃsat

120.3-4

sa vardha̍tā̱ vardhana̍: pū̱yamā̍na̱ḥ somo̍ mī̱ḍhvām̐2 a̱bhi no̱ jyoti̍ṣāvīt
yatra̍ na̱ḥ pūrve̍ pi̱tara̍: pada̱jñāḥ sva̍rvido̍ a̱bhi gā adri̍mu̱kṣan

120.1-5

4
mā ci̱danyadvi śa̍m̐sata sakhāyo̱ mā ri̍ṣaṇyata
indra̍mitstotā vṛṣa̱ṇam̐ sacā̍ su̱te muhu̍ru̱kthā ca̍ śam̐sata

120.2-5

ava̍krakṣiṇaṃ vṛṣa̱bhaṃ yathā̱ juva̱ṃ gāṃ na ca̍rṣaṇī̱saha̍m
vi̱dve̱ṣaṇam̐ saṃva̍nanamu̱bhaya̍ṃkaraṃ mam̐hi̍ṣṭhamubhayā̱vina̍m

120.1-6

5
udu̱ tye madhu̍mattamā̱ gira̱ stomā̍sa īrate
sa̱trā̱jito̍ dhana̱sā akṣitotayo vā̱jayaṃto̱ rathā̍ iva

120.2-6

kaṇvā̍ iva̱ bhṛga̍va̱: sūryā̍ iva̱ viśva̱middhi̱tamā̍śata
indram̐̍ sto̱mebhi̍rma̱haya̍ṃta ṛ̱ghava̱: priyamèdhāso asvaran

120.1-7

6
paryū̍ ṣu pra dha̍nva vāja̱sāta̍ye̱ pari̍ vṛ̱trāṇi̍ sa̱kṣaṇi̍:
dvi̱ṣastara̍dhyā ṛ̱ṇayā̍ na īrase

120.2-7

ajī̍jano̱ hi pa̍vamāna̱ sūrya̍ vi̱dhāre̍ śakmanā̱ paya̍:
gojīra̍yā ram̐ha̍māṇa̱: pura̍ṃdhyā

120.3-5

anu̍ hi tvā su̱taḥ soma̱ madāmasi̍0

120.1-8

7
pari̍ pra dhanva̍0

120.2-8

e̱vāmṛ̍tāya ma̱he kṣayā̍ya̱ sa śu̱kro a̍rṣa di̱vyaḥ pī̱yūṣa̍:

120.3-6

indra̍ste̱ soma̍ su̱tasya̍ peyā̱tkratve̱ dakṣāya̱ viśve̍ ca de̱vāḥ

120.1-9

8
sūrya̍syeva ra̱śmayo̍ drāvayi̱tnavo̍ matsa̱rāsa̍: prasu̱taḥ sā̱kamīra̍te
tantuṃ tataṃ pari sargāsa āśavo nendrādṛte pavate dhāma kiṃ cana

120.2-9

upo matiḥ pṛcyate sicyate madhu mandrājanī codate aṃtarāsani
pavamānaḥ saṃtaniḥ sunvatāmiva madhumāṃ drapsaḥ pari vāramarṣati

120.3-7

ukṣā mimeti prati yaṃti dhenavo devasya devīrupa yaṃti niṣkṛtam
atyakramīdarjunaṃ vāramavyayamatakaṃ na niktaṃ pari somo avyata

120.1-10

9
agniṃ naro dīdhitibhiraraṇyorhastacyutaṃ janayata praśastam
dūredṛśaṃ gṛhapatimathavyum

120.2-10

tamagnimaste vasavo nyṛṇvaṃtsupraticakṣamavase kutaścit
dakṣāyyo yo dama āsa nityaḥ

120.3-8

preddho agne dīdihi puro no 'jasrayā sūryyā yaviṣṭha
tvām̐ śaśvaṃta upa yaṃti vājāḥ

120.1-11

10
ayaṃ gauḥ pṛśnirakramīdasadanmātaraṃ puraḥ | pitaraṃ ca prayaṃtsvaḥ

120.2-11

aṃtaścarati rocanāsya prāṇādapānatī | vyakhyanmahiṣo divam

120.11

trim̐śaddhāma vi rājati vākpataṃgāya dhīyate | prati vastoraha dyubhiḥ ||3

Linked texts (7)