Arshika 147

Ārṣika 147

a̱bhi tvā̍ pūrva̱pīta̍ya̱ iṃdra̍ stome̍bhirāya̱vaḥ
sa̱mīcī̱nāsa̍ ṛ̱bhava̍ḥ samasvara̱nnudrā̍ gṛ̱ṇaṃta̱ pūrvyam

a̱syediṃdro̍ vāvṛdhe vṛṣṇya̱ṃ śavo̱ made̍ su̱tasya̍ vi̱ṣṇavi̍
a̱dyā tama̍sya mahi̱māna̍māyavo 'nu̍ ṣṭuvaṃti pū̱rvathā̍ ||2

pra vā̍marcaṃtyu̱kthino̍ nīthā̱vido̍ jari̱tāra̍: | iṃdrā̍gnī iṣa̱ ā vṛ̍ṇe

iṃdrā̍gnī nava̱tiṃ puro̍ dāsa̱patnī̍radhūnutam | sā̱kameke̍na̱ karma̍ṇā

iṃdrā̍gnī apa̱sasparyupa̱ pra ya̍ṃti dhī̱taya̍: | ṛ̱tasya̍ pa̱thyā3 anu̍

iṃdrā̍gnī tavi̱ṣāṇi̍ vāꣲ sadha̱sthāni̱ prayā̍ꣲsi ca | yu̱vora̱tsūrya̍ꣲ hi̱tam ||4

śa̱gdhyū3 ṣu śa̍cīpata̱ iṃdra̍ viśvā̍bhirū̱tibhi̍:
bhaga̍ṃ na hi tvā ya̱śasa̍ṃ vasu̱vida̱manu̍ śūra̱ carā̍masi

pauro̍ aśva̍sya purukṛdgavā̍ma̱syutso̍ deva hira̱ṇyaya̍:
na kirhi dānaṃ pari̍ ma̱rdhiṣa̱tve yadyadyāmi̱ tadā bhara̍ ||2

tvaꣲ hyehi̍ cerave vi̱dā bhaga̍ṃ vasu̱ttaye̍
udvā̍vṛṣasva maghavanga̱viṣṭa̍ya udiṃdrāśvami̍ṣṭaye

tvaṃ pu̱ru sa̱hasrā̍ṇi śa̱tāni̍ ca yū̱thā dānā̍ya ma̱ṃhase̍
ā pu̍ra̱ṃdara̍ṃ cakṛma vipra̍vacasa̱ iṃdra̍ṃ gāyaṃto 'va̍se ||2

yo viśvā̍ dayate̱ vasu̱ hotā̍ ma̱ṃdro janā̍nām
madho̱rna pātrā̍ pratha̱mānya̱smai pra stomā̍ yaṃtva̱gnaye̍

aśva̍ṃ na gī̱rbhī ra̱thyaꣲ su̍dānavo ma̱rmṛjya̍ṃte de̱vaya̍vaḥ
u̱bhe to̱ke tana̍ye̱ dasma̱ viṣpa̍te̱ parṣi̱ rādho̍ ma̱ghonā̍m ||2

Linked texts (5)