Arshika 156

Ārṣika 156

viśve̍bhiragne a̱gnibhi̍ri̱maṃ ya̱jñami̱daṃ vaca̍ḥ | cano̍ dhāḥ sahaso yaho

yacci̱ddhi śaśva̍tā̱ tanā̍ de̱vaṃde̍va̱ṃ yajā̍mahe | tve iddhūyate ha̱viḥ

priyo no̍ astu vi̱śpati̱rhotā̍ ma̱ndro vare̍ṇyaḥ | priyāḥ sva̱gnayo̍ va̱yam||3

indra̱ṃ vo vi̱śvata̱spari̱ havā̍mahe̱ jane̍bhyaḥ | a̱smākama̍stu keva̍laḥ

sa no̍ vṛṣanna̱muṃ ca̱ruṃ sa̱trādā̍va̱nnapā̍ vṛdhi | a̱smabhya̍mapratiṣkutaḥ

vṛṣā̍ yū̱theva̱ va̍ṃsagaḥ kṛ̱ṣṭīri̍yatyo̍jasā | īśā̍no̱ apra̍tiṣkutaḥ ||3

tvaṃ na̍ścitra ū̱tyā vaso̍ rā̱dhā̍ṃsi codaya
asya rā̱yastvama̍gne ra̱thīra̍si vi̱dā gā̱dhaṃ tu̱ce tu na̍ḥ

parṣi̍ to̱kaṃ tana̍yaṃ pa̱rtṛbhi̍ṣṭvamada̍bdhairaprayu̱vabhi̍ḥ
agne̱ heḍā̍ṃsi̱ daivyā̍ yuyodhi no ' de̱vāni̱ hrurā̍ṃsi ca ||2

kimi̱tte vi̍ṣṇo pari̱cakṣi̱ nāma̱ pra yadva̍va̱kṣe śi̍pi̱viṣṭo a̍smi
mā vapò̍ a̱smadapa̍ gūha e̱tadyada̱nyarū̍paḥ sa̱miye̍ ba̱bhūtha̍

pra tatte̍ a̱dya śi̍pi̱viṣṭa̱ havya̱marya̱ḥ śa̍ṃsāmi va̱yunā̍ni vi̱dvān
taṃ tvā̍ gṛṇāmi ta̱vasama̍tyā̱nkṣaya̍ntamasya̱ raja̍saḥ parā̱ke

vaṣa̍ṭte viṣṇavāsa̱ ā kṛ̍ṇomi̱ tanme̍ juṣasva śipiviṣṭa ha̱vyam
vardha̍ntu tvā suṣṭutayo giro̍ me yū̱yaṃ pā̍ta sva̱stibhi̱ḥ sadā̍ naḥ

Linked texts (3)