Arshika 17

Ārṣika 17

na ki̱ṣṭaṃ karma̍ṇā naśadyaśca̱kāra̱ sadā̍vṛdham
iṃdra̍ṃ na ya̱jñairviśva̍gūrta̱mṛkva̍samadhṛ̱ṣṭaṃ dhṛṣṇvo̍jasā

ya ṛ̱te ci̱dabhi̍śriṣaḥ pu̱rā ja̱trubhya̍ ātṛ̱da̍ḥ
sa̍ṃdhā̱tā sa̱ṃdhiṃ ma̍ghavā̱ punnā̍vasu̱rniṣkartā̱ vihru̍ta̱ṃ puna̍:

ā tvā̍ sa̱hasra̍mā śa̱taṃ yu̱ktā rathe̍ hi̱raṇyaye̍
brahma̍yujo̱ hara̍ya iṃdra ke̱śino̱ vaha̍ṃtu̱ soma̍pītaye

ā maṃdrairi̍ṃdra̱ hari̍bhiryāhi ma̱yūra̍romabhiḥ
mā tvā̱ ke ci̱nni ye̍mu̱rinna pāśino'ti̱ dhanve̍va̱ tāṃ2 i̍hi

tvama̍ṃga pra śa̍ṃsiṣo de̱vaḥ śavi̍ṣṭha̱ martya̍m
na tvada̱nyo ma̍ghavannasti marḍi̱teṃdra̍ bravīmi te̱ vaca̍:

tvamiṃdra̱ yaśā̱ asyṛ̍jī̱ṣī śava̍saspate
tvaṃ vṛ̱trāṇi̍ ha̱ṃsyapra̍tī̱nyeka̱ itpurva̍nuttaścarṣaṇī̱dhṛti̍:

iṃdra̍middeva̱tāta̍ya̱ iṃdra̱ṃ praya̍tyadhva̱re
iṃdra̍ṃ samī̱ke va̱nino̍ havāmaha̱ iṃdra̱ṃ dhana̍sya sā̱taye̍

i̱mā u̍ tvā puruvaso̱ giro̍ vardhaṃtu yā ma̍ma̍
pāva̍kavarṇā̱: śuca̍yo vipa̱ścito̱'bhi stomai̍ranūṣata

udu̱ tye madhu̍mattamā̱ gira̱ stomā̍sa īrate
sa̱trāji̍to̱ dhana̍sā̱ akṣi̍totayo vā̱jaya̍ṃto̱ rathā̍ iva

yathā̍ gau̱ro a̱pā kṛta̱ṃ tṛṣya̍nne̱tyave̍ri̱ṇam
ā̱pi̱tve na̍: prapi̱tve tūya̱mā ga̍hi̱ kaṇve̍ṣu su̱ sacā̍ piba

Linked texts (2)