Arshika 180

Ārṣika 180

a̱gniḥ pra̱tnena̱ janma̍nā̱ śuṃbhā̍nasta̱nvā̍3svām | ka̱virvipre̍ṇa vāvṛdhe

ū̱rjā napā̍tama̱ā huve̱ 'gniṃ pā̍vaka̱śoci̍ṣam | a̱sminya̱jñe sva̱dhva̱re

sa no̍ mitramaha̱stvamagne̍ śu̱kreṇa̍ śo̱ciṣā̍ | de̱vairā sa̍tsi ba̱rhiṣi̍

1
utte̱ śuṣmā̍so asthū̱ rakṣo̍ bhi̱ṃdaṃto̍ adrivaḥ | nu̱dasva̱ yāḥ pari̍spṛdhaḥ

a̱yā ni̱jaghni̱roja̍sā ratha̱saṃge̱ dhane̍ hi̱te | stvā a̍bi̱bhyuṣā̍ hṛ̱dā

a̱sya vra̱tāni̍ nā̱dhṛṣe̍ pava̍mānasya dū̱ṣyā | ruja̱ yastvā̱ pṛ̍tanya̱ti

taṃ hi̍nvaṃti mada̱cyuta̱ḥ hari̍ṃ na̱dīṣu̍ vā̱jina̍m | iṃdu̱miṃdrā̍ya matsaram ||4

ā maṃdrairi̍ṃdra̱ hari̍bhiryā̱hi ma̱yūra̍romabhiḥ
mā tvā̱ ke ci̱nni ye̍mu̱rinna pāśino̱ 'ti̱ dhanve̍va̱ tām̐2 i̍hi

vṛtrakhādo̱ vala̍rujaḥ pu̱rāṃ darmo̍ a̱pāma̱jaḥ
sthā̱tā ratha̍sya̱ haryo̍ra̱bhiśva̍ra̱ indro̍ dṛ̱ḍhā ci̍dāru̱jaḥ

gaṃbhī̱rām̐2 u̱dadhī̍m̐2ri̱va kratu̍ṃ puṣyasi̱ gā i̍va
pra su̱gopā̱ yava̍saṃ dhe̱navo̱ yathā̱ hrada̍ṃ ku̱lyā i̍vāśata

3
yathā̍ gau̱ro a̍pā kṛ̱taṃ tṛṣya̍nne̱tyave̍ri̱ṇam
ā̱pi̱tve na̍ḥ prapi̱tve tūya̱mā ga̍hi kaṇve̍ṣu su̱ sacā̍ piba

mada̍ṃtu tvā maghava̱nniṃda̍vo̱ rādho̍de̱yāya̍ sunva̱te
ā̱muṣyā̱ soma̍mapibaśca̱mū su̱taṃ jyeṣṭhā̱ṃ tadda̍dhiṣe̱ saha̍ḥ || 2

tvama̍ṃga pra śa̍ṃsiṣo de̱vaḥ śa̍viṣṭha̱ martya̍m
na tvada̱nyo ma̍ghavannasti marḍi̱teṃndra̍ bravīmi te̱ vaca̍ḥ

mā te̱ rādhā̍ṃsi̱ mā ta ū̱tayo̍ vaso̱ 'smānkadā̍ ca̱nā da̍bhan
viśvā̍ ca na upamimīhi̱ mānu̍ṣa̱ vasū̍ni carṣa̱ṇibhya̱ ā || 2

Linked texts (5)