Arshika 183

Ārṣika 183

uṣa̱stacci̱tramā bha̱rāsmabhya̍ṃ vājinīvati
yena̍ to̱kaṃ ca̱ tana̍yaṃ ca̱ dhāmahe̍

uṣo̱ adye̱ha goma̍tyaśvā̍vati vibhāvari
re̱vada̱sme vyu̍ccha sūnṛ̱tāvani̍

yu̱ṅkṣvā hi vā̍jinīvatyaśvā̍m̐ a̱dyāru̱ṇām̐ u̍ṣaḥ
athā̍ no̱ viśvā̱ saubhagā̍nyā va̍ha

8
a̱śvinā̍ va̱rtira̱smadā goma̍ddasrā hiraṇyavat
arvā̱gratha̍ samanasā ni ya̍cchatam

e̱ha de̍vā mayo̱bhuvā̍ dasrā̱ hira̍ṇyavartanī
u̱ṣarbudho̍ vahaṃtu so̱mapī̍taye

yāvi̱tthā śloka̍mā di̱vo jyoti̍rjanāya cakrathuḥ
ā na̱ ūrja̍ṃ vahatamaśvinā yuvam

9
a̱gniṃ taṃ ma̍nye̱ yo vasu̱rasta̱ṃ yaṃ yaṃti̍ dhe̱nava̍ḥ
asta̍marvaṃta ā̱śavo̱ 'sta̍ṃ nityāso vā̱jina̱ iṣa̍ṃ sto̱tṛbhya̱ ā bha̍ra

a̱gnirhi vā̱jina̱ṃ viśe̱ dadā̍ti viśva̱carṣa̍ṇiḥ
a̱gnī rā̱ye svābhuva̍ḥ sa prīto yāti vārya̱miṣa̍ṃ sto̱tṛbhya̱ ā bha̍ra

so a̱gniryo va̍surgṛ̱ṇe saṃ yamāya̍ti dhe̱nava̍ḥ
samarva̍to raghu̱druva̱ḥ saṃ su̱jātā̍saḥ sū̱raya̱ iṣa̍ṃ sto̱tṛbhya̱ ā bha̍ra ||3

Linked texts (4)