Arshika 188

Ārṣika 188

vi̱dhuṃ da̍drā̱ṇaṃ sama̍ne ba̱hūnāṃ yuvā̍na̱m̐ santa̍ṃ pali̱to ja̍gāra
de̱vasya̍ paśya̱ kāvya̍ṃ mahi̱tvādyā ma̱māra̱ sa hyaḥ samāna̍

śāka̍manā śā̱ko a̍ru̱ṇaḥ su̍pa̱rṇa ā yo ma̱haḥ śūra̍ḥ sanā̱danī̍ḍaḥ
yacci̱keta̍ sa̱tyamittanna mogha̱ṃ vasu̍ spārhama̱ta jeto̍ta dā̱tā

aibhi̍rda̱de vṛṣṇyā̱ paum̐syā̍ni̱ yebhi̍raukṣaddvṛtra̱hatyā̍ya va̱jrī
ye karma̍ṇaḥ kri̱yamā̍ṇasya ma̱ha ṛ̱tekarma̍mudajā̍yaṃta de̱vāḥ

7
a̱sti somo̍ a̱yam̐ su̱taḥ piba̍ṃtyasya ma̱ruta̍ḥ | uta sva̱rājño̍ a̱śvinā̍

piba̍ṃti mi̱tro a̍rya̱mā tanā̍ pū̱tasya̍ varu̍ṇaḥ | tri̱ṣadha̱sthasya̱ jāva̍taḥ

u̱to nva̍sya joṣa̍mā iṃdra̱ḥ sutasya̍ goma̍taḥ | prāta̱rhote̍va matsati

8
bā̱ṇma̱hām̐ asi sūrya ba̱ḍādi̍tya ma̱hām̐ asi
ma̱haste̍ sa̱to ma̍hi̱mā pa̍ni̱ṣṭama ma̱hnā de̍va ma̱hām̐ asi

baṭ sūrya̱ śrava̍sā ma̱hām̐ asi sa̱trā de̍va ma̱hām̐ asi
ma̱hnā de̱vānāma̍su̱ryaḥ pu̱rohi̍to vi̱bhu jyoti̱radā̍bhyam

9
u̍pa no̱ hari̍bhiḥ su̱taṃ yā̍hi̱ madā̍nāṃ pate | upa̍ no̱ hari̍bhiḥ su̱tam

dvi̱tā yo vṛ̍tra̱haṃta̍mo vi̱da iṃdra̍ḥ śatakratuḥ | upa̍ no̱ hari̍bhiḥ su̱tam

tvam̐ hi vṛ̍traha̱nneṣā̍ṃ pātā̱ somā̍nāmasi̍ | upa̍ no̱ hari̍bhiḥ su̱tam

10
pra vo̱ mahe̱ mahe̍vṛdhe bhara̱dhaṃ prace̍tase̱ pra su̱mati̍ṃ kṛṇudhvam
viśa̍ḥ pū̱rvīḥ pra ca̍ra carṣaṇiprāḥ

u̱ruvyaca̍se mahi̱ne su̱vṛktimiṃdrā̍ya̱ brahma̍ janayaṃta viprāḥ
tasya̍ vra̱tāni̱ na mi̍na̍ṃti dhīrā̍ḥ

iṃdra̱ṃ vāṇī̍ranūttamanyumeva sa̱trā rājā̍naṃ dadhire saha̱dhyai
harya̱śvāya̍ barhayā̱ samāpīn ||3

Linked texts (5)