Pramāṇa · Search · About · API

Arshika 197

Ārṣika 197

Language
Sanskrit

197.1

ā̱śuḥ śi̍śā̱no vṛ̍ṣa̱bho na bhī̱mo gha̍nāgha̱naḥ kṣobha̍ṇaścarṣaṇī̱nām
sa̱ṃkraṃda̍no ' nimi̱ṣa e̍kavī̱raḥ śa̱tag̍ senā a̍jayatsākamiṃdra̍ḥ

197.2

sa̱ṃkraṃda̍nenānimi̱ṣeṇa̍ ji̱ṣṇunā̍ yutkāre̍ṇa duścyava̱nena̍ dhṛ̱ṣṇunā̍
tadiṃdre̍ṇa jayata tatsa̍hadhva̱ṃ yudho̍ nara̱ iṣu̍hastena̱ vṛṣṇā̍

197.1-2

sa i̍ṣu̱hastai̱ḥ sa ni̍ṣa̱ṃgibhi̍rva̱śī sag̍sraṣṭā̱ sa yudha iṃdro̍ ga̱ṇena̍
saṃ'sṛ̍ṣṭaji̱tsoma̍pā bā̱huśa̍rdhyu̱3śaya̍dhanvā̱ prati̍hi̱tābhi̱rastā̍ || 3

197.1-3

bṛha̍spate̱ pari̍ dīyā̱ rathe̍na rakṣo̱hāmitrā̍m̐ apa̱bādha̍mānaḥ
pra̱bhaṃja̍ntsenāḥ pramṛ̱ṇo yu̱dhā jaya̍nna̱smāka̍medhyavi̱tā rathā̍nām

197.2-2

ba̱lavi̍jñāyaḥ sthavi̍raḥ pravī̍raḥ saha̍svānvā̱jī saha̍māna u̱graḥ
a̱bhi̱vīro̍ a̱bhisa̍tvā saho̱jā jaitra̱miṃdra̱ ratha̱mā ti̍ṣṭha go̱vit

197.3

go̱tra̱bhida̍ṃ go̱vida̱ṃ vajra̍bāhuṃ jaya̍nta̱majma̍ pramṛ̱ṇaṃta̱moja̍sā
i̱maṃ sa̍jātā̱ anu̍ vīrayadhva̱miṃdra̍m̐ sakhāyo̱ anu̱ saṃ ra̍bhadhvam

197.1-4

2
a̱bhi go̱trāṇi̱ saha̍sā̱ gāha̍māno 'dayo vī̱raḥ śa̱tamanyu̱riṃdra̍ḥ
du̱ścyava̍naḥ pṛtanā̱ṣāḍayudhyo̍ 'smāka̱m̐ senā̍ avatu̱ pra yu̱tsu

197.2-3

iṃdra̍ āsāṃ ne̱tā bṛha̱spati̱rdakṣi̍ṇā ya̱jñaḥ pura̍ etu̱ soma̍ḥ
de̱va̱se̱nānā̍ma̱bhibha̍ṃjatīnāṃ jaya̍ṃtīnāṃ ma̱ruto̍ ya̱ṃtvagram

197.3-2

iṃdra̍sya̱ vṛṣṇo̍ varu̍ṇasya̱ rājña̍ ādi̱tyānā̍ṃ ma̱rutā̱m̐ śardha̍ u̱gram
ma̱hāma̍nasāṃ bhuvanacya̱vānā̱ṃ ghoṣo̍ de̱vānā̱ṃ jaya̍tā̱muda̍sthāt

197.1-5

3
uddha̍rṣaya maghava̱nnāyu̍dhā̱nyutsatva̍nāṃ māma̱kānā̱ṃ manā̍m̐si
udvṛtra̱hanvā̱jinā̱ṃ vāji̍nā̱nyudrathā̍nāṃ jayatāṃ yaṃtu̱ ghoṣā̍ḥ

197.2-4

a̱smāka̱miṃdra̱ḥ samṛ̍teṣu dha̱neṣva̱smāka̱ṃ yā iṣa̍va̱stā ja̍yaṃtu
a̱smāka̍ṃ vī̱rā utta̍re bhava̍ntva̱smām̐ u̍ de̱vā ava̍tā̱ have̍ṣu

197.4

asau̱ yā senā̍ maruta̱ḥ pare̍ṣā̱mabhye̍ti na̱ oja̍sā̱ spardha̍mānā
tā̍ gūha̱ta̱ tama̱sāpa̍vra̱tena̱ yathai̍teṣāma̱nyo a̱nyaṃ na jā̱nāt || 3

197.1-6

a̱mīṣā̱ṃ citta̍ṃ pratilo̱bhaya̍ṃtī gṛ̱hṇāṃgā̍nya̱nve pa̍rehi
a̱bhi prehi̱ nirda̍ha hṛ̱tsu śokai̍raṃdhe̱nāmi̱trāstama̍sā sacaṃtām

197.2-5

pretā̱ jaya̍tā nara̱ iṃdro̍ va̱ḥ śarma̍ yacchatu
u̱grā va̍ḥ saṃtu bā̱havo̱ ' nādhṛ̍ṣyā yathāsa̍tha

197.5

ava̍sṛṣṭā̱ parā̍ pata̱ śara̍vye̱ brahma̍saṃśite
ga̱chāmi̱trānpra pa̍dyasva̱ māmīṣā̱ṃ kaṃ ca̱ nocchi̍ṣaḥ || 3

Linked texts (3)