Arshika 22

Ārṣika 22

daśati

a̱sāvi̍ de̱vaṃ goṛjīkamandho̱ nya1̍sminniṃdro̍ janu̱ṣemu̍voca
bodhā̍masi tvā haryaśva ya̱jñairbodhā̍ na̱ stoma̱maṃdha̍so̱ made̍ṣu

yoni̍ṣṭa̱ iṃdra̱ sada̍ne akāri̱ tamā nṛbhi̍ḥ puruhūta̱ pra yā̍hi
aso̍ yathā no̱ ' vitā vṛ̱dhaści̍ddado vasū̍ni ma̱mada̍śca̱ somai̍ḥ

arda̍ru̱tsamasṛ̍jo̱ vi khā̍ni̱ tvama̍rṇa̱vānba̍ddhadhā̱nām̐ ara̍mṇāḥ
ma̱hāṃta̍miṃdra̱ parva̍ta̱ṃ vi yadva̍ḥ sṛ̱jaddhārā̱ ava̱ yaddānavā̱nhan

su̱ṣvā̱ṇāsa̍ iṃdra stuma̱si̍ tvā sa̱niṣyaṃta̍ścittuvinṛmṇa̱ vāja̍m
ā no̍ bhara su̱vita̱ṃ yasya̍ ko̱nā ta̱nā tmanā̍ sa̱kṣāma̍ vo̱tāḥ

ja̱gṛ̱bhā te̱ dakṣi̍ṇamiṃdra̱ hasta̍ṃ vasū̱yavo̍ vasupate vasū̱nām
vi̱dmā hi tvā go̱pati̍m̐ śūra̱ gonā̍ma̱smabhya̍ṃ ci̱traṃ vṛṣa̍ṇam̐ ra̱yiṃdā̍ḥ

indra̱ṃ naro̍ nemadhi̱tā ha̍vante̱ yatparyā̍ryā̱ yuna̍ja̱nte dhiya̱stāḥ
śū̱ro nṛ̱ṣātā̱ śrava̍saśca̱ kāma̱ ā goma̍ti vra̱je bha̍jā̱ tvaṃ na̍ḥ

vaya̍ḥ supa̱rṇā upa̍ sedu̱rindra̍ṃ pri̱yame̍dhā̱ ṛṣa̍yo̱ nādha̍mānāḥ
apa̍ dhvā̱ntamū̍rṇu̱hi pū̱rdhi cakṣu̍rmumu̱gdhyā3smānnidha̍yeva ba̱ddhān

nāke̍ supa̱rṇamupa̱ yatpata̍nta̱m̐ hṛ̱dā vena̍nto abhyaca̍kṣata tvā
hira̍ṇyapakṣaṃ varu̍ṇasya dū̱taṃ ya̱masya̱ yonau̍ śaku̱naṃ bhu̍ra̱ṇyam

brahma̍ jajñā̱naṃ pra̍tha̱maṃ pu̱rastā̱dvi sī̍mataḥ suruco̍ ve̱na āva̍ḥ
sa bu̱dhnyā̍ upa̱mā a̍sya vi̱ṣṭhāḥ sata̍śca̱ yoni̱masa̍taśca̱ viva̍ḥ

apū̱rvyā pu̍ruta̱mānya̍smai ma̱he vī̱rāya̍ tava̍se tu̱rāya̍
vi̱ra̱pśine̍ va̱jriṇe̱ śaṃta̍māni vacā̱m̐sya̍smai sthavi̱rāya̍ takṣuḥ

daśati

ava̍ dra̱pso am̐̍śuma̱tīmati̍ṣṭhadīyā̱naḥ kṛ̱ṣṇo da̱śabhi̍ḥ sa̱hasrai̍ḥ
ā̱vatta̱mindra̱ḥ śacyā̱ dhama̍nta̱mapa̱ snehi̍tiṃ nṛ̱maṇā̱ adha̍drāḥ

vṛ̱trasya̍ tvā śvasathā̱dīṣa̍māṇā̱ viśve̍ de̱vā aja̍ha̱rye sakhā̍yaḥ
ma̱rudbhi̍rindra sa̱khyaṃ te̍ astvathe̱mā viśvā̍ḥ pṛ̱tanā̍ jayāsi

vi̱dhuṃ da̍drā̱ṇam̐ sama̍ne bahū̱nāṃ yuvāna̍m̐ santa̍ṃ pali̱to ja̍gāra
de̱vasya̍ paśya kāvya̍ṃ mahi̱tvādyā ma̱māra̱ sa hyaḥ samā̍na

tvaṃ ha̱ tyatsa̍pta̱bhyo jāya̍māno ' śatrubhyo̱ abhavaḥ śatruriṃdra̍
gū̱ḍhe dyāvā̍pṛthi̱vī anva̍viṃdo vi̱bhuma̱dbhyo bhuva̍nebhyo raṇa̍ṃ dhāḥ

me̱ḍiṃ na tvā̱ vatri̍ṇaṃ bhṛṣṭimaṃta̍ṃ pu̱rudhasmāna̍ṃ vṛṣabha̱ sthira̱pnum
ka̱ro̱ṣyarya̍sta̱ruṣī̍rḍva̱syuriṃdra̍ṃ vṛ̱ddhaṃ vṛ̍tra̱haṇa̍ṃ gṛṇīṣe

pra vo̍ ma̱he ma̱hevṛ̍dhe bhara̱dhaṃ prace̍tase̱ pra su̱mati̍ṃ kṛṇudhvam
viśa̍ḥ pū̱rvīḥ pra cara̍ carṣaṇi̱prāḥ

śuna̍ṃ hvema ma̱ghavāna̍miṃdra̍ma̱sminbhare̱ nṛta̍maṃ vāja̍sātau
śṛ̱ṇvaṃta̍mu̱gramūtaye̍ sama̱tsu ghnaṃta̍ṃ vṛ̱trāṇi̍ sa̱ṃjita̱ṃ dhanā̍ni

u̱du bra̱hmāṇyai̍ra̱ta śrava̱syeṃdra̍ṃ sama̱rye ma̱hayā̍ vasiṣṭha
ā yo viśvā̍ni̱ śava̍sā ta̱tānopa̍śro̱tā ma īva̍to̱ vacā̍ṃsi

Linked texts (10)