Arshika 24

Ārṣika 24

ardhaprapāṭhakaḥ
gāya̍nti tvā gāya̱triṇo̱ ' rcantya̱rkama̱rkiṇa̍ḥ
bra̱hmāṇa̍stvā śatakrata̱ udda̱śaśa̍miva yemire

indra̍ṃ vi̱śvā a̍vīvṛdhantsamu̱dravya̍casa̱ṃ gira̍ḥ
ra̱thītama̍ṃ rathī̱nāṃ vājā̍nā̱ṃ satpa̍ti̱ṃ pati̍m

i̱mami̍ṃdra su̱taṃ pi̍ba̱ jyeṣṭha̍ma̱martya̱ṃ mada̍m
śu̱krasya̍ tvābhya̱kṣara̱ndhārā̍ ṛ̱tasya̍ sā̱dane̍

yadi̍ṃdra̱ citra̱ ma i̱ha nāsti̍ vādā̱tamadri̍vaḥ
rādha̍stanno vi̱dadva̍sa u̱bhayā̍ha̱styā bha̍ra

śru̱dhī hava̍ṃ tira̱ścyā i̍ndra̱ yastvā̍ saparya̍ti
su̱vīrya̍sya̱ goma̍to rā̱yaspū̱rdhi ma̱hān a̍si

a̱sāvi̱ soma̱ iṃdra̍ te̱ śavi̍ṣṭha dhṛ̱ṣṇavā ga̍hi
ā tvā̍ pṛṇaktvindri̱yaḥ raja̱ḥ sūryo̍ na ra̱śmibhi̍ḥ

e̍ṃdra yā̱hi hari̍bhirupa̍ ka̱ṇvasya̍ suṣṭu̱tim
di̱vo a̱muṣya̍ śāsa̱to diva̍ṃ ya̱ya di̍vāvaso

ā tvā̱ giro̍ rathī̱rivā̍sthuḥ su̱teṣu̍ girvaṇaḥ
a̱bhi tvā̱ sama̍nūṣata̱ gāvo̍ va̱tsaṃ na dhe̱nava̍ḥ

eto̱ nvindra̍ṃ stavāma śu̱ddhaṃ śu̱ddhena̱ sāmnā̍
śu̱ddhairu̱kthairvā̍vṛ̱dhvāṃsa̍ṃ śu̱ddhairā̱śīrvā̍nmamattu

yo ra̱yiṃ vo̍ ra̱yiṃta̍mo̱ yo dyu̱mnairdhumra̍vattamaḥ
soma̍: su̱taḥ sa i̍ndra te 'sti svadhāpate̱ mada̍:

Linked texts (5)