Arshika 28
Ārṣika 28
- Language
- Sanskrit
28.1
a̱bhrātṛ̍vyo̱ anā̍ tvamanāpi̱riṃga janu̍ṣā̱ sanā̍dasi
yu̱dhedāpi̍tvamiccha̍se
28.2
yo na i̱dami̱daṃ pu̱rā pra vasya̍ ā̱ninā̍ya̱ tamu̍ va stuṣe
sakhā̍ya̱ iṃdra̍mūtaye̍
28.3
ā ga̍ntā mā ri̍ṣaṇyata̱ prasthā̍vāno̱ māpa̍ sthāta̱ sama̍nyavaḥ
dṛ̱ḍhā ci̍dya̱mayi̍ṣṇavaḥ
28.4
ā yā̍hya̱yamiṃda̍ve ' śvapate gopata u̱rvarā̍pate
soma̍ somapate piba
28.5
va̱yā ha̱ svidyu̱jā va̱yaṃ prati̍ śva̱saṃta̍ṃ vṛṣa̱bhaṃ bru̍vīmahi
sa̱ṃsthe jana̍sya goma̍taḥ
28.6
gāva̍ści̱ddhā sama̍nyavaḥ sajā̱tye̍na ma̱ruta̱ḥ saba̍ṃdhavaḥ
ri̱hate̍ ka̱kubho̍ mi̱thaḥ
28.7
tvaṃ na̍ iṃdrā bhara̱ ojo̍ nṛ̱mṇā śatakrato vicarṣaṇe
ā vīra̍ṃ pṛtanā̱saha̍m
28.8
adhā̱ hīṃdra̍ girvaṇa̱ upa̍ tvā̱ kāma̍ īmahe sa̱sṛgma̍he
u̱deva̱ gmaṃta̍ u̱dabhi̍ḥ
28.9
sīda̍ntaste va̱yo yathā̍ go̱śarīte̱ madhau̍ madi̱re vi̍va̱kṣaṇe̍
a̱bhi tvā̱miṃdra̍ nonumaḥ
28.10
vayam̱ tvāma̍pū̱rvya sthū̱raṃ na ka̱ccidbhara̍nto 'va̱syava̍ḥ
va̱jriṃ ci̱traṃ havā̍mahe
Linked texts (7)
- Kauthuma (Svādhyāya Maṇḍala edition, Pāraḍī) — Sanskrit
- Chandasīsaṃhitā — Sanskrit
- Sāmavedīmantra — Sanskrit
- Āgneyagāna — Sanskrit
- Chandaḥ ārcika — Sanskrit
- Pūrvārcika — Sanskrit
- Chandasikā — Sanskrit