Arshika 4

Ārṣika 4

de̱vo vo̍ draviṇo̱dāḥ pūrṇī viva̍ṣṭvā̱sicam̍
u̱dvā si̍ñcadhva̱mupa̍ vā pṛṇadhva̱mādiddho de̱va oha̍te

praitu̱ brahma̍ṇa̱spati̱ḥ pra de̱vye̍tu sū̱nṛtā̍
acchā̍ vī̱raṃ narya̍ṃ pa̱ṅktirādha̍saṃ de̱vā ya̱jñaṃ na̍yantu naḥ

ū̱rdhva ū̱ ṣu ṇā̍ ū̱taye̱ tiṣṭhā̍ de̱vo na sa̍vi̱tā
ū̱rdhvo vāja̍sya̱ sani̍tā̱ yada̱ñjibhi̍rvā̱ghadbhi̍rvi̱hvayā̍mahe

pra yo rā̱ye ni̱nīṣa̍ti̱ marto̱ yaste̍ vaso̱ dāśa̍t
sa vī̱raṃ dha̍tte a̱gna u̍ktha̱śa̍ṃsina̱ṃ tmanā̍ sa̱hasra̍poṣi̱ṇam

pra vo̍ ya̱jñaṃ pu̍rū̱ṇāṃ viśā̍ṃ de̱vaya̍tīnām
a̱gniṃ sū̱ktebhi̱rvaco̍bhirvṛṇīma̱he yaḥ sa̍mi̱dhandha̱ indha̍te

a̱yama̱gniḥ su̱vīrya̱syeśe̍ hi̱ saubha̍gasya
rā̱ya ī̍śe svapa̱tyasya̍ goma̍ta̱ īśe̍ vṛtra̱thyā̍nām

tvama̍gne gṛha̱pati̱stvam̐ hotā̍ no adhva̱re
tvaṃ potā̍ viśvavāra pracetā̱ yakṣi̱ yāsi̍ ca̱ vārya̍m

sakhā̍yastvā vavṛmahe de̱vaṃ martā̍sa ū̱taye̍
a̱pāṃ napā̍ta̱ḥ subhaga̍ṃ su̱dam̐sa̍sa̱m̐ su̱pratū̍rtimane̱hasa̍m

Linked texts (9)