Arshika 68

Ārṣika 68

pra ta̱ āśri̍nīḥ pavamāna dhe̱navo̍ di̱vyā asṛ̍gra̱npaya̍sā̱ dharī̍maṇi
prāṃta̍ri̱kṣātsthāvi̍rī̱ste asṛ̍kṣata̱ ye tvā̍ mṛ̱jaṃtyu̍ṣiṣāṇa vedhasaḥ

u̱bhayata̍ḥ pavamānasya ra̱śmayo̍ dhru̱vasya̍ sa̱taḥ pari̍ yaṃti ke̱tava̍ḥ
yadī̍ pa̱vitre̱ adhi̍ mṛ̱jyate̱ hari̍ḥ sattā ni yonau̍ ka̱laśe̍ṣu sīdati

viśvā̱ dhāmā̍ni viśvacakṣa ṛkvasaḥ prabhoṣṭe sa̱taḥ pari̍ yaṃti ke̱tava̍ḥ
vyāna̍śī pavase soma̱ dharma̍ṇā̱ pati̱rviśva̍sya̱ bhuva̍nasya rājasi

1
pa̱vamā̍no ajījanaddi̱vaści̱traṃ na tanya̱tum | jyoti̍rvaiśvāna̱raṃ bṛ̱hat

pava̍māna̱ rasa̱stava̱ mado̍ rājannadugdhu̱vaḥ | vi vāra̱mavya̍marṣati

pava̍mānasya te̱ raso̱ dakṣo̱ vi rā̍jati dyu̱mān | jyoti̱rviśva̍sva̱rddaśe̍ ||3

pra yadgāvo̱ na bhūrṇi̍yastve̱ṣā ayā̍so̱ akra̍muḥ | ghnaṃta̍ḥ kṛ̱ṣṇāmapa̱ tvaca̍m

su̱vitasya̍ vanāmahe 'ti̱ setu̍ṃ du̱rādhya̍m | sā̱hvāma̱ dasyu̍mavra̱tam

śṛ̱ṇve vṛ̱ṣṭeriva̍ sva̱naḥ pava̍mānasya̱ śuṣmi̍ṇaḥ | cara̍ṃti vi̱dyuto̍ di̱vi

ā pava̍sva ma̱hīmiṣa̱ṃ goma̍diṃdo̱ hira̍ṇyavat | aśva̍vatsoma vī̱rava̍t

pava̍sva viśvacarṣa̱ṇa̱ ā ma̱hī roda̍sī pṛṇa | u̱ṣāḥ sūryo̱ na ra̱śmibhi̍ḥ

pari̍ naḥ śarma̍yaṃtyā dhāra̍yā soma vi̱śvata̍ḥ | sarā̱ rase̍va vi̱ṣṭapa̍m

Linked texts (7)