Arshika 7

Ārṣika 7

iti prathamaḥ prapāṭhakaḥ samāptaḥ
puru̍ vā̱ dāśivām̐2 voce̱'ri̱ragne̱ tava̍ svi̱dā
to̱dasye̍va̱ śaraṇa̱ ā ma̍ha̱sya

pra hotre̍ pū̱rvyaṃ vaco̱'gnaye̍ bharatā bṛ̱hat
vipā̱m̐ jyotī̍m̐ṣi̱ bibhra̍te̱ na ve̱dhase̍

a̱gne vāja̍sya̱ goma̍ta̱ īśā̍na sa̱haso yaddo
a̱sme dhe̍hi jātavedo̱ mahi̱ śrava̍ḥ

a̱gne yaji̍ṣṭho a̱dhva̱re de̱vāṃ de̍vaya̱te ya̍ja
hotā̍ ma̱ndro vi rā̍jasyati̱ sridha̍ḥ

ja̱jñānaḥ sa̱pta mā̱tṛbhi̍rme̱dhāmāśā̍sata̱ śriye
a̱yaṃ dhru̱vo ra̱yī̱ṇāṃ ci̍keta̱dā

u̱ta syā no̱ divā̍ ma̱tiradi̍tirūta̱yāga̍mat
sā śaṃtā̍tā mayaskaradapa̱ sridha̍ḥ

ī̱ḍi̱ṣvā hi pra̍tī̱vyā̍3ya̱jasva̍ jā̱tave̍dasa̱m
cariṣṇudhūmamagṛbhītaśociṣam

na tasya̍ mā̱yayā̍ ca̱ na ri̱purī̍śīta̱ martya̍ḥ
yo a̱gnaye̱ dadā̍śa ha̱vyadāta̍ye

apa̍ tyaṃ vṛ̱jina̍ᳵ ri̱puᳵ ste̱nama̍gne du̱rādhya̍m
davi̍ṣṭhamasya satpate kṛdhī su̱gam

śru̱dhyagne̍ navasya me̱ stoma̍sya vīra vi̱śvapa̍te
ni mā̱yina̍stapa̱sā ra̍kṣa̱so da̍ha

Linked texts (8)