Pramāṇa · Search · About · API

Arshika 76

Ārṣika 76

Language
Sanskrit

76.1

govitpavasva vasuviddhiraṇvidratodhā iṃdo bhuvaneṣvarpitaḥ
tvagm̐ suvīro asi soma viśvavit taṃ tvā nara upa girema āsate

76.2

tvaṃ nṛ̱cakṣā̍ a̱si so̍ma vi̱śvata̍ḥ | pava̍māna vṛṣabha tā vi dhā̍vasi
sa na̍ḥ pavasva vasu̱maddhira̍ṇyavadgavya̱ṃ syā̱ma bhuva̍neṣu jī̱vase̍

76.3

īśā̍na i̱mā bhuva̍nāni̱ īya̍se yu̱jñāna iṃdo̱ harita̍ḥ su̱parṇya̍ḥ
tāste̍ kṣaraṃtu̱ madhu̍maddhṛ̱taṃ paya̍stava vra̱te so̍ma tiṣṭhaṃtu kṛ̱ṣṭaya̍ḥ

76.1-2

1
pava̍mānasya vi̱śvavi̱tpra te̱ sargā̍ asṛkṣata | sūryya̍syeva̱ na ra̱śmaya̍ḥ

76.2-2

ke̱tuṃ kṛ̱ṇvaṃ di̱vaspari̱ viśvā̍ rū̱pābhya̍rṣasi | sa̱mudraḥ so̍ma pinvase

76.3-2

jajñāno vāca̍ṃmiṣyasi pava̍māna̱ vidha̍rmaṇi | kraṃda̍ṃ de̱vo na sūryya̍ḥ

76.1-3

2
pra somā̍so adhanviṣuḥ pava̍mānāsa̱ iṃda̍vaḥ | śrīṇā̱nā a̱psu mṛ̍jate

76.2-3

a̱bhi gāvo̍ adhanviṣurāpo̱ na pra̱vatā̍ ya̱tīḥ | pu̱nānā iṃdra̍māśata

76.3-3

pra pava̍māna dhanvasi̱ someṃdrāya̍ mā̱dana̍ḥ | nṛbhi̍rya̱to vi nī̍yase

76.4

iṃdo̱ yadadri̍bhiḥ su̱taḥ pa̱vitra̱ṃ pari̱dīya̍se | a̱ramiṃdra̍sya̱ dhāmne̍

76.5

tvam̐ so̍ma nṛ̱mādana̍ḥ pavasva carṣaṇī̱dhṛti̍ḥ | sa̱striyo̍ anu̱mādya̍ḥ

76.6

pava̍sva vṛtra̱haṃta̍ma u̱kthebhi̍ranu̱mādya̍ḥ | śuci̍ḥ pāva̱ko adbhu̍taḥ

76.3-4

śuci̍ḥ pāvaka ucyate̱ soma̍ḥ su̱taḥ sa madhu̍mān | de̱vāvī̱ragha̍śam̐saha || 7

76.1-4

pra ka̱virde̱vavī̍taye 'vyo̱ vāre̍bhiravyata | sāhvā̱nviśvā̍ a̱bhi spṛdha̍ḥ

76.2-4

sa hi ṣmā̍ jari̱tṛbhya̱ ā vāja̍ṃ go̱maṃta̱minva̍ti | pava̍mānaḥ saha̱sriṇam̍

76.3-5

pari̱ viśvā̍ni̱ ceta̍sā mṛ̱jyase̍ pavase ma̱tī | sa na̍ḥ so̱ma śravo̍ vi̱daḥ

76.4-2

a̱bhya̍rṣa bṛha̱dyaśo̍ ma̱ghava̍dbhyo dhru̱vam̐ ra̱yim | iṣa̍ṃm̐ sto̱tṛbhya̱ ā bha̍ra

76.5-2

tvam̐ rā̱jeva̍ su̱vrato̱ gira̍: somā̍vi̱veśi̍tha | pu̱nā̱no vahne̱ adbhu̍ta

76.6-2

sa vahni̍ra̱psu du̍ṣṭa̱ro mṛ̱jyamā̍no gabhastyo̍: | soma̍śca̱mūsu̍ sīdati

76.4-3

krī̱ḍurmakho̱ na mam̐ha̍yuḥ pa̱vitram̐̍ soma gāhase | dadha̱tsto̱tre su̱vīrya̍m || 7

76.1-5

ya̱vaṃya̍vaṃ no̱ aṃdha̍sā pu̱ṣṭaṃpu̍ṣṭaṃ pari̍ srava | viśvā̍ ca soma sau̱bhagā̍

76.2-5

indo̱ yathā̱ tava̱ stavo̱ yathā̍ te jā̱tamaṃdha̍saḥ | ni ba̱rhiṣi̍ pri̱ye sa̍daḥ

76.3-6

u̱ta no̍ go̱vida̍śva̱vitpava̍sva so̱māṃdha̍sā | ma̱hmū̱tame̍bhira̱dbhiḥ

76.5-3

yo ji̱nāti̱ na jīya̍te ha̱ṃti śatru̍mabhī̱tya̍ | sa pa̍vasva sahasra̱jit || 4

Linked texts (9)