Atharvaveda 10.6

Language: Sanskrit

10.6.1

arātīyorbhrātṛvyasya durhārdo dviṣataḥ śiraḥ .
api vṛścāmyojasā ..1..

10.6.2

varma mahyamayaṃ maṇiḥ phālājjātaḥ kariṣyati .
pūrṇo manthena māgamadrasena saha varcasā ..2..

10.6.3

yattvā śikvaḥ parāvadhīttakṣā hastena vāsyā .
āpastvā tasmajjīvalāḥ punantu śucayaḥ śucim ..3..

10.6.4

hiraṇyasragayaṃ maṇiḥ śraddhāṃ yajñaṃ maho dadhat.
gṛhe vasatu no'tithiḥ ..4..

10.6.5

tasmai ghṛtaṃ suraṃ madhvannamannaṃ kṣadāmahe .
sa naḥ piteva putrebhyaḥ śreyaḥśreyaścikitsatu bhūyobhūyaḥ śvaḥśvo devebhyo maṇiretya ..5..

10.6.6

yamabadhnādbṛhaspatirmaṇiṃ phālaṃ ghṛtaścutamugraṃ khadiramojase .
tamagniḥ pratyamuñcata so asmai duha ājyaṃ bhūyobhūyaḥ śvaḥśvastena tvaṃ dviṣato jahi ..6..

10.6.7

yamabadhnādbṛhaspatirmaṇiṃ phālaṃ ghṛtaścutamugraṃ khadiramojase .
tamindraḥ pratyamuñcataujase vīryāya kam .
so asmai balamidduhe bhūyobhūyaḥ śvaḥśvastena tvaṃ dviṣato jahi ..7..

10.6.8

yamabadhnādbṛhaspatirmaṇiṃ phālaṃ ghṛtaścutamugraṃ khadiramojase .
taṃ somaḥ pratyamuñcata mahe śrotrāya cakṣase .
so asmai varca idduhe bhūyobhūyaḥ śvaḥśvastena tvaṃ dviṣato jahi ..8..

10.6.9

yamabadhnādbṛhaspatirmaṇiṃ phālaṃ ghṛtaścutamugraṃ khadiramojase .
taṃ sūryaḥ pratyamuñcata tenemā ajayaddiśaḥ .
so asmai bhūtimidduhe bhūyobhūyaḥ śvaḥśvastena tvaṃ dviṣato jahi ..9..

yamabadhnādbṛhaspatirmaṇiṃ phālaṃ ghṛtaścutamugraṃ khadiramojase .
taṃ bibhraccandramā maṇimasurāṇāṃ puro'jayaddānavānāṃ hiraṇyayīḥ .
so asmai śriyamidduhe bhūyobhūyaḥ śvaḥśvastena tvaṃ dviṣato jahi ..10..

10.6.11

yamabadhnādbṛhaspatirvātāya maṇimāśave .
so asmai vājinamidduhe bhūyobhūyaḥ śvaḥśvastena tvaṃ dviṣato jahi ..11..

10.6.12

yamabadhnādbṛhaspatirvātāya maṇimāśave .
tenemāṃ maṇinā kṛṣimaśvināvabhi rakṣataḥ .
sa bhiṣagbhyāṃ maho duhe bhūyobhūyaḥ śvaḥśvastena tvaṃ dviṣato jahi ..12..

10.6.13

yamabadhnādbṛhaspatirvātāya maṇimāśave .
taṃ bibhratsavitā maṇiṃ tenedamajayatsvaḥ .
so asmai sūnṛtāṃ duhe bhūyobhūyaḥ śvaḥśvastena tvaṃ dviṣato jahi ..13..

10.6.14

yamabadhnādbṛhaspatirvātāya maṇimāśave .
tamāpo bibhratīrmaṇiṃ sadā dhāvantyakṣitāḥ .
sa ābhyo'mṛtamidduhe bhūyobhūyaḥ śvaḥśvastena tvaṃ dviṣato jahi ..14..

10.6.15

yamabadhnādbṛhaspatirvātāya maṇimāśave .
taṃ rājā varuṇo maṇiṃ pratyamuñcata śaṃbhuvam .
so asmai satyamidduhe bhūyobhūyaḥ śvaḥśvastena tvaṃ dviṣato jahi ..15..

10.6.16

yamabadhnādbṛhaspatirvātāya maṇimāśave .
taṃ devā bibhrato maṇiṃ sarvāṃllokān yudhājayan .
sa ebhyo jitimidduhe bhūyobhūyaḥ śvaḥśvastena tvaṃ dviṣato jahi ..16..

10.6.17

yamabadhnādbṛhaspatirvātāya maṇimāśave .
tamimaṃ devatā maṇiṃ pratyamuñcanta śambhuvam .
sa ābhyo viśvamidduhe bhūyobhūyaḥ śvaḥśvastena tvaṃ dviṣato jahi ..17..

10.6.18

ṛtavastamabadhnatārtavāstamabadhnata .
saṃvatsarastaṃ baddhvā sarvaṃ bhūtaṃ vi rakṣati ..18..

10.6.19

antardeśā abadhnata pradiśastamabadhnata .
prajāpatisṛṣṭo maṇirdviṣato me'dharāmakaḥ ..19..

10.6.20

atharvāṇo abadhnatātharvaṇā abadhnata .
tairmedino aṅgiraso dasyūnāṃ bibhiduḥ purastena tvaṃ dviṣato jahi ..20..

10.6.21

taṃ dhātā pratyamuñcata sa bhūtaṃ vyakalpayat.
tena tvaṃ dviṣato jahi ..21..

10.6.22

yamabadhnādbṛhaspatirdevebhyo asurakṣitim .
sa māyaṃ maṇirāgamadrasena saha varcasā ..22..

10.6.23

yamabadhnādbṛhaspatirdevebhyo asurakṣitim .
sa māyaṃ maṇirāgamatsaha gobhirajāvibhirannena prajayā saha ..23..

10.6.24

yamabadhnādbṛhaspatirdevebhyo asurakṣitim .
sa māyaṃ maṇirāgamatsaha vrīhiyavābhyāṃ mahasā bhūtyā saha ..24..

10.6.25

yamabadhnādbṛhaspatirdevebhyo asurakṣitim .
sa māyaṃ maṇirāgaman madhorghṛtasya dhārayā kīlālena maṇiḥ saha ..25..

10.6.26

yamabadhnādbṛhaspatirdevebhyo asurakṣitim .
sa māyaṃ maṇirāgamadūrjayā payasā saha draviṇena śriyā saha ..26..

10.6.27

yamabadhnādbṛhaspatirdevebhyo asurakṣitim .
sa māyaṃ maṇirāgamattejasā tviṣyā saha yaśasā kīrtyā saha ..27..

10.6.28

yamabadhnādbṛhaspatirdevebhyo asurakṣitim .
sa māyaṃ maṇirāgamatsarvābhirbhūtibhiḥ saha ..28..

10.6.29

tamimaṃ devatā maṇiṃ mahyaṃ dadatu puṣṭaye .
abhibhuṃ kṣatravardhanaṃ sapatnadambhanaṃ maṇim ..29..

10.6.30

brahmaṇā tejasā saha prati muñcāmi me śivam .
asapatnaḥ sapatnahā sapatnān me'dharāmakaḥ ..30..

10.6.31

uttaraṃ dviṣato māmayaṃ maṇiḥ kṛṇotu devajāḥ .
yasya lokā ime trayaḥ payo dugdhamupāsate .
sa māyamadhi rohatu maṇiḥ śraiṣṭhyāya mūrdhataḥ ..31..

10.6.32

yaṃ devāḥ pitaro manuṣyā upajīvanti sarvadā .
sa māyamadhi rohatu maṇiḥ śraiṣṭhyāya mūrdhataḥ ..32..

10.6.33

yathā bījamurvarāyāṃ kṛṣṭe phālena rohati .
evā mayi prajā paśavo'nnamannaṃ vi rohatu ..33..

10.6.34

yasmai tvā yajñavardhana maṇe pratyamucaṃ śivam .
taṃ tvaṃ śatadakṣiṇa maṇe śraiṣṭhyāya jinvatāt..34..

10.6.35

etamidhmaṃ samāhitaṃ juṣaṇo agne prati harya homaiḥ .
tasmin vidhema sumatiṃ svasti prajāṃ cakṣuḥ paśūntsamiddhe jātavedasi brahmaṇā ..35..

Linked texts (2)

Śaunakasaṃhitā — Sanskrit
Aṅgirasī — Sanskrit