Pramāṇa · Search · About · API

Atharvaveda 10.7

Atharvaveda 10.7

Language
Sanskrit

10.7.1

10.7
kasminn aṅge tapo asyādhi tiṣṭhati kasminn aṅga ṛtamasyādhyāhitam .
kva vrataṃ kva śraddhāsya tiṣṭhati kasminn aṅge satyamasya pratiṣṭhitam ..1..

10.7.2

kasmādaṅgāddīpyate agnirasya kasmādaṅgātpavate mātariśva .
kasmādaṅgādvi mimīte'dhi candramā maha skambhasya mimāno aṅgam ..2..

10.7.3

kasminn aṅge tiṣṭhati bhūmirasya kasminn aṅge tiṣṭhatyantarikṣam .
kasminn aṅge tiṣṭhatyāhitā dyauḥ kasminn aṅge tiṣṭhatyuttaraṃ divaḥ ..3..

10.7.4

kva prepsan dīpyata ūrdhvo agniḥ kva prepsan pavate mātariśvā .
yatra prepsantīrabhiyantyāvṛtaḥ skambhaṃ taṃ brūhi katamaḥ svideva saḥ ..4..

10.7.5

kvārdhamāsāḥ kva yanti māsāḥ saṃvatsareṇa saha saṃvidānāḥ .
yatra yantyṛtavo yatrārtavāḥ skambhaṃ taṃ brūhi katamaḥ svideva saḥ ..5..

10.7.6

kva prepsantī yuvatī virūpe ahorātre dravataḥ saṃvidāne .
yatra prepsantīrabhiyantyāpaḥ skambhaṃ taṃ brūhi katamaḥ svideva saḥ ..6..

10.7.7

yasmintstabdhvā prajāpatirlokāntsarvāmadhārayat.
skambhaṃ taṃ brūhi katamaḥ svideva saḥ ..7..

10.7.8

yatparamamavamaṃ yacca madhyamaṃ prajāpatiḥ sasṛje viśvarūpam .
kiyatā skambhaḥ pra viveśa tatra yan na prāviśatkiyattadbabhūva ..8..

10.7.9

kiyatā skambhaḥ pra viveśa bhūtaṃ kiyadbhaviṣyadanvāśaye'sya .
ekaṃ yadaṅgamakṛṇotsahasradhā kiyatā skambhaḥ pra viveśa tatra ..9..

10.7.10

yatra lokāmśca kośāṃścāpo brahma janā viduḥ .
asacca yatra saccānta skambhaṃ taṃ brūhi katamaḥ svideva saḥ ..10..

10.7.11

yatra tapaḥ parākramya vrataṃ dhārayatyuttaram .
ṛtaṃ ca yatra śraddhā cāpo brahma samāhitāḥ skambhaṃ taṃ brūhi katamaḥ svideva saḥ ..11..

10.7.12

yasmin bhūmirantarikṣaṃ dyauryasminn adhyāhitā .
yatrāgniścandramāḥ sūryo vātastiṣṭhantyārpitāḥ skambhaṃ taṃ brūhi katamaḥ svideva saḥ ..12..

10.7.13

yasya trayastriṃśaddevā aṅge sarve samāhitāḥ .
skambhaṃ taṃ brūhi katamaḥ svideva saḥ ..13..

10.7.14

yatra ṛṣayaḥ prathamajā ṛcaḥ sāma yajurmahī .
ekarṣiryasminn ārpitaḥ skambhaṃ taṃ brūhi katamaḥ svideva saḥ ..14..

10.7.15

yatrāmṛtaṃ ca mṛtyuśca puruṣe'dhi samāhite .
samudro yasya nāḍyaḥ puruṣe'dhi samāhitāḥ skambhaṃ taṃ brūhi katamaḥ svideva saḥ ..15..

10.7.16

yasya catasraḥ pradiśo nāḍyastiṣṭhanti prathamāḥ .
yajño yatra parākrāntaḥ skambhaṃ taṃ brūhi katamaḥ svideva saḥ ..16..

10.7.17

ye puruṣe brahma viduste viduḥ parameṣṭhinam .
yo veda parameṣṭhinaṃ yaśca veda prajāpatim .
jyeṣṭhaṃ ye brāhmaṇaṃ viduste skambhamanusaṃviduḥ ..17..

10.7.18

yasya śiro vaiśvānaraścakṣuraṅgiraso'bhavan .
aṅgāni yasya yātavaḥ skambhaṃ taṃ brūhi katamaḥ svideva saḥ ..18..

10.7.19

yasya brahma mukhamāhurjihvāṃ madhukaśāmuta .
virājamūdho yasyāhuḥ skambhaṃ taṃ brūhi katamaḥ svideva saḥ ..19..

10.7.20

yasmādṛco apātakṣan yajuryasmādapākaṣan .
sāmāni yasya lomānyatharvāṅgiraso mukhaṃ skambhaṃ taṃ brūhi katamaḥ svideva saḥ ..20..

10.7.21

asacśākhāṃ pratiṣṭhantīṃ paramamiva janā viduḥ .
uto sanmanyante'vare ye te śākhāmupāsate ..21..

10.7.22

yatrādityāśca rudrāśca vasavaśca samāhitāḥ .
bhūtaṃ ca yatra bhavyaṃ ca sarve lokāḥ pratiṣṭhitāḥ skambhaṃ taṃ brūhi katamaḥ svideva saḥ ..22..

10.7.23

yasya trayastriṃśaddevā nidhiṃ rakṣanti sarvadā .
nidhiṃ tamadya ko veda yaṃ devā abhirakṣatha ..23..

10.7.24

yatra devā brahmavido brahma jyeṣṭhamupāsate .
yo vai tān vidyātpratyakṣaṃ sa brahmā veditā syāt..24..

10.7.25

bṛhanto nāma te devā ye'sataḥ pari jajñire .
ekaṃ tadaṅgaṃ skambhasyāsadāhuḥ paro janāḥ ..25..

10.7.26

yatra skambhaḥ prajanayan purāṇaṃ vyavartayat.
ekaṃ tadaṅgaṃ skambhasya purāṇamanusaṃviduḥ ..26..

10.7.27

yasya trayastriṃśaddevā aṅge gātrā vibhejire .
tān vai trayastriṃśaddevān eke brahamavido viduḥ ..27..

10.7.28

hiraṇyagarbhaṃ paramamanatyudyaṃ janā viduḥ .
skambhastadagre prāsiñcaddhiraṇyaṃ loke antarā ..28..

10.7.29

skambhe lokāḥ skambhe tapaḥ skambhe'dhyṛtamāhitam .
skambha tvā veda pratyakṣamindre sarvaṃ samāhitam ..29..

10.7.30

indre lokā indre tapa indre'dhyṛtamāhitam .
indraṃ tvā veda pratyakṣaṃ skambhe sarvaṃ pratiṣṭhitam ..30..

10.7.31

nāma nāmnā johavīti purā sūryātpuroṣasaḥ .
yadajaḥ prathamaṃ saṃbabhūva sa ha tatsvarājyamiyāya yasmān nānyatparamasti bhūtam ..31..

10.7.32

yasya bhūmiḥ pramāntarikṣamutodaram .
divaṃ yaścakre mūrdhānaṃ tasmai jyeṣṭhāya brahmaṇe namaḥ ..32..

10.7.33

yasya sūryaścakṣuścandramāśca punarṇavaḥ .
agniṃ yaścakra āsyaṃ tasmai jyeṣṭhāya brahmaṇe namaḥ ..33..

10.7.34

yasya vātaḥ prāṇāpānau cakṣuraṅgiraso'bhavan .
diśo yaścakre prajñānīstasmai jyeṣṭhāya brahmaṇe namaḥ ..34..

10.7.35

skambho dādhāra dyāvāpṛthivī ubhe ime skambho dādhārorvantarikṣam .
skambho dādhāra pradiśaḥ ṣaḍurvīḥ skambha idaṃ viśvaṃ bhuvanamā viveśa ..35..

10.7.36

yaḥ śramāttapaso jāto lokāntsarvāntsamānaśe .
somaṃ yaścakre kevalaṃ tasmai jyeṣṭhāya brahmaṇe namaḥ ..36..

10.7.37

kathaṃ vāto nelayati kathaṃ na ramate manaḥ .
kimāpaḥ satyaṃ prepsantīrnelayanti kadā cana ..37..

10.7.38

mahadyakṣaṃ bhuvanasya madhye tapasi krāntaṃ salilasya pṛṣṭhe .
tasmin chrayante ya u ke ca devā vṛkṣasya skandhaḥ parita iva śākhāḥ ..38..

10.7.39

yasmai hastābhyāṃ pādābhyāṃ vācā śrotreṇa cakṣuṣā .
yasmai devāḥ sadā baliṃ prayacchanti vimite'mitaṃ skambhaṃ taṃ brūhi katamaḥ svideva saḥ ..39..

10.7.40

apa tasya hataṃ tamo vyāvṛttaḥ sa pāpmanā .
sarvāṇi tasmin jyotīṃṣi yāni trīṇi prajāpatau ..40..

10.7.41

yo vetasaṃ hiraṇyayaṃ tiṣṭhantaṃ salile veda .
sa vai guhyaḥ prajāpatiḥ ..41..

10.7.42

tantrameke yuvatī virūpe abhyākrāmaṃ vayataḥ ṣaṇmayūkham .
prānyā tantūṃstirate dhatte anyā nāpa vṛñjāte na gamāto antam ..42..

10.7.43

tayorahaṃ parinṛtyantyoriva na vi jānāmi yatarā parastāt.
pumān enadvayatyudgṛṇanti pumān enadvi jabhārādhi nāke ..43..

10.7.44

ime mayūkhā upa tastabhurdivaṃ sāmāni cakrustasarāṇi vātave ..44..

Linked texts (6)