Atharvaveda 15.2

Language: Sanskrit

15.2.1

sa udatiṣṭhatsa prācīṃ diśamanu vyacalat. [1]
taṃ bṛhacca rathantaraṃ cādityāśca viśve ca devā anuvyacalan . [2]
bṛhate ca vai sa rathantarāya cādityebhyaśca viśvebhyaśca devebhya ā vṛścate ya evaṃ vidvāṃsaṃ vrātyamupavadati . [3]
bṛhataśca vai sa rathantarasya cādityānāṃ ca viśveṣāṃ ca devānāṃ priyaṃ dhāma bhavati ya evaṃ veda . [4]
tasya prācyāṃ diśi śraddhā puṃścalī mitro māgadho vijñānaṃ vāso'haruṣṇīṣaṃ rātrī keśā haritau pravartau kalmalirmaṇiḥ . [5]
bhūtaṃ ca bhaviṣyacca pariṣkandau mano vipathaṃ..6..
mātariśvā ca pavamānaśca vipathavāhau vātaḥ sārathī reṣmā pratodaḥ..7..
kīrtiśca yaśaśca puraḥsarau
ainaṃ kīrtirgacchatyā yaśo gacchati ya evaṃ veda ..15.2.1.. [8]

15.2.2

sa udatiṣṭhatsa dakṣiṇāṃ diśamanu vyacalat. [9]
taṃ yajñāyajñiyaṃ ca vāmadevyaṃ ca yajñaśca yajamānaśca paśavaścānuvyacalan . [10]
yajñāyajñiyāya ca vai sa vāmadevyāya ca yajñāya ca yajamānāya ca paśubhyaścā vṛścate ya evaṃ vidvāṃsaṃ vrātyamupavadati . [11]
yajñāyajñiyasya ca vai sa vāmadevyasya ca yajñasya ca yajamānasya ca paśūnāṃ ca priyaṃ dhāma bhavati ya evaṃ veda . [12]
tasya dakṣiṇāyāṃ diśyuṣāḥ puṃścalī mantro māgadho vijñānaṃ vāso'haruṣṇīṣaṃ rātrī keśā haritau pravartau kalmalirmaṇiḥ . [13]
amāvāsyā ca paurṇamāsī ca pariṣkandau mano vipathaṃ mātariśvā ca pavamānaśca vipathavāhau vātaḥ sārathī reṣmā pratodaḥ
kīrtiśca yaśaśca puraḥsarau .
ainaṃ kīrtirgacchatyā yaśo gacchati ya evaṃ veda ..15.2.2.. [14]

15.2.3

sa udatiṣṭhatsa pratīcīṃ diśamanu vyacalat. [15]
taṃ vairūpaṃ ca vairājaṃ cāpaśca varuṇaśca rājānuvyacalan . [16]
vairūpāya ca vai sa vairājāya cādbhyaśca varuṇāya ca rājña ā vṛścate ya evaṃ vidvāṃsaṃ vrātyamupavadati . [17]
vairūpasya ca vai sa vairājasya cāpāṃ ca varuṇasya ca rājñaḥ priyaṃ dhāma bhavati ya evaṃ veda . [18]
tasya pratīcyāṃ diśīrā puṃścalī haso māgadho vijñānaṃ vāso'haruṣṇīṣaṃ rātrī keśā haritau pravartau kalmalirmaṇiḥ . [19]
ahaśca rātrī ca pariṣkandau mano vipathaṃ mātariśvā ca pavamānaśca vipathavāhau vātaḥ sārathī reṣmā pratodaḥ
kīrtiśca yaśaśca puraḥsarau .
ainaṃ kīrtirgacchatyā yaśo gacchati ya evaṃ veda ..15.2.3.. [20]

15.2.4

sa udatiṣṭhatsa udīcīṃ diśamanu vyacalat. [21]
taṃ śyaitaṃ ca naudhasaṃ ca saptarṣayaśca somaśca rājānuvyacalan . [22]
śyaitāya ca vai sa naudhasāya ca saptarṣibhyaśca somāya ca rājña ā vṛścate ya evaṃ vidvāṃsaṃ vrātyamupavadati . [23]
śyaitasya ca vai sa naudhasasya ca saptarṣīṇāṃ ca somasya ca rājñaḥ priyaṃ dhāma bhavati ya evaṃ veda . [24]
tasyodīcyāṃ diśi vidyutpuṃścalī stanayitnurmāgadho vijñānaṃ vāso'haruṣṇīṣaṃ rātrī keśā haritau pravartau kalmalirmaṇiḥ . [25]
śrutaṃ ca viśrutaṃ ca pariṣkandau mano vipathaṃ mātariśvā ca pavamānaśca vipathavāhau vātaḥ sārathī reṣmā pratodaḥ [26]
kīrtiśca yaśaśca puraḥsarau . [27]
ainaṃ kīrtirgacchatyā yaśo gacchati ya evaṃ veda ..15.2.4.. [28]

15.2.4_1

asmin sūkte pratyakṣarūpeṇa prācī, dakṣiṇā, pratīcī, udīcī iti catasṛṇāṃ diśānāṃ ullekhamasti. kintu parokṣarūpeṇa eṣa pratīyate yat atra aṣṭānāṃ diśānāṃ varṇanamasti. kathaṃ, ayaṃ aṣṭasakhī śabdopari ṭippaṇītaḥ spaṣṭaṃ bhaviṣyati.