Pramāṇa · Search · About · API

Atharvaveda 17: sūktaṃ 17.1

Atharvaveda 17

Language
Sanskrit

sūktaṃ 17.1

17.1

17.1
viṣāsahiṃ sahamānaṃ sāsahānaṃ sahīyāṃsam .
sahamānaṃ sahojitaṃ svarjitaṃ gojitaṃ saṃdhanājitam .
īḍyaṃ nāma hva indramāyuṣmān bhūyāsam ..1..

17.2

viṣāsahiṃ sahamānaṃ sāsahānaṃ sahīyāṃsam .
sahamānaṃ sahojitaṃ svarjitaṃ gojitaṃ saṃdhanājitam .
īḍyaṃ nāma hva indraṃ priyo devānāṃ bhūyāsam ..2..

17.3

viṣāsahiṃ sahamānaṃ sāsahānaṃ sahīyāṃsam .
sahamānaṃ sahojitaṃ svarjitaṃ gojitaṃ saṃdhanājitam .
īḍyaṃ nāma hva indraṃ priyaḥ prajānāṃ bhūyāsam ..3..

17.4

viṣāsahiṃ sahamānaṃ sāsahānaṃ sahīyāṃsam .
sahamānaṃ sahojitaṃ svarjitaṃ gojitaṃ saṃdhanājitam .
īḍyaṃ nāma hva indraṃ priyaḥ paśūnāṃ bhūyāsam ..4..

17.5

viṣāsahiṃ sahamānaṃ sāsahānaṃ sahīyāṃsam .
sahamānaṃ sahojitaṃ svarjitaṃ gojitaṃ saṃdhanājitam .
īḍyaṃ nāma hva indraṃ priyaḥ samānānāṃ bhūyāsam ..5..

17.6

udihyudihi sūrya varcasā mābhyudihi .
dviṣaṃśca mahyaṃ radhyatu mā cāhaṃ dviṣate radhaṃ tavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..6..

17.7

udihyudihi sūrya varcasā mābhyudihi .
āṃśca paśyāmi yāṃśca na teṣu mā sumatiṃ kṛdhi tavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..7..

17.8

mā tvā dabhantsalile apsvantarye pāśina upatiṣṭhantyatra .
hitvāśastiṃ divamārukṣa etāṃ sa no mṛḍa sumatau te syāma tavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..8..

17.9

tvaṃ na indra mahate saubhagāyādabdhebhiḥ pari pāhyaktubhistavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..9..

17.10

tvaṃ na indrotibhiḥ śivābhiḥ śaṃtamo bhava .
ārohaṃstridivaṃ divo gṛṇānaḥ somapītaye priyadhāmā svastaye tavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..10..

17.11

tvamindrāsi viśvajitsarvavitpuruhūtastvamindra .
tvamindremaṃ suhavaṃ stomamerayasva sa no mṛḍa sumatau te syāma tavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..11..

17.12

adabdho divi pṛthivyāmutāsi na ta āpurmahimānamantarikṣe .
adabdhena brahmaṇā vāvṛdhānaḥ sa tvaṃ na indra divi ṣaṃ charma yaccha tavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..12..

17.13

yā ta indra tanūrapsu yā pṛthivyāṃ yāntaragnau yā te indra pavamāne svarvidi .
yayendra tanvā'ntarikṣaṃ vyāpitha tayā na indra tanvā śarma yaccha tavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..13..

17.14

tvāmindra brahmaṇā vardhayantaḥ sattraṃ ni ṣedurṛṣayo nādhamānāstavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..14..

17.15

tvaṃ tṛtaṃ tvaṃ paryeṣyutsaṃ sahasradhāraṃ vidathaṃ svarvidaṃ tavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..15..

17.16

tvaṃ rakṣase pradiśaścatasrastvaṃ śociṣā nabhasī vi bhāsi .
tvamimā viśvā bhuvanānu tiṣṭhasa ṛtasya panthāmanveṣi vidvāṃstavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..16..

17.17

pañcabhiḥ parāṅtapasyekayārvāṅaśastimeṣi sudine bādhamānastavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..17..

17.18

tvamindrastvaṃ mahendrastvaṃ lokastvaṃ prajāpatiḥ .
tubhyaṃ yajño vi tāyate tubhyaṃ juhvati juhvatastavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..18..

17.19

asati satpratiṣṭhitaṃ sati bhūtaṃ pratiṣṭhitam .
bhūtaṃ ha bhavya āhitaṃ bhavyaṃ bhūte pratiṣṭhitaṃ tavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..19..

17.20

śukro'si bhrājo'si .
sa yathā tvaṃ bhrājatā bhrājo'syevāhaṃ bhrājatā bhrājyāsam ..20..

17.21

rucirasi roco'si .
sa yathā tvaṃ rucyā roco'syevāhaṃ paśubhiśca brāhmaṇavarcasena ca ruciṣīya ..21..

17.22

udyate nama udāyate nama uditāya namaḥ .
virāje namaḥ svarāje namaḥ samrāje namaḥ ..22..

17.23

astaṃyate namo'stameṣyate namo'stamitāya namaḥ .
virāje namaḥ svarāje namaḥ samrāje namaḥ ..23..

17.24

udagādayamādityo viśvena tapasā saha .
sapatnān mahyaṃ randhayan mā cāhaṃ dviṣate radhaṃ tavedviṣṇo bahudhā vīryāṇi .
tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..24..

17.25

āditya nāvamārukṣaḥ śatāritrāṃ svastaye .
aharmātyapīparo rātriṃ satrāti pāraya ..25..

17.26

sūrya nāvamārukṣaḥ śatāritrāṃ svastaye .
rātriṃ mātyapīparo'haḥ satrāti pāraya ..26..

17.27

prajāpaterāvṛto brahmaṇā varmaṇāhaṃ kaśyapasya jyotiṣā varcasā ca .
jaradaṣṭiḥ kṛtavīryo vihāyāḥ sahasrāyuḥ sukṛtaścareyam ..27..

17.28

parivṛto brahmaṇā varmaṇāhaṃ kaśyapasya jyotiṣā varcasā ca .
mā mā prāpann iṣavo daivyā yā mā mānuṣīravasṛṣṭāḥ vadhāya ..28..

17.29

ṛtena gupta ṛtubhiśca sarvairbhūtena gupto bhavyena cāham .
mā mā prāpatpāpmā mota mṛtyurantardadhe'haṃ salilena vācaḥ ..29..

17.30

agnirmā goptā pari pātu viśvataḥ udyantsūryo nudatāṃ mṛtyupāśān .
vyucchantīruṣasaḥ parvatā dhruvāḥ sahasraṃ prāṇā mayyā yatantām ..30..

Linked texts (6)