Pramāṇa · Search · About · API

Atharvaveda 18.1

Atharvaveda 18.1

Language
Sanskrit

18.1.1

o citsakhāyaṃ sakhyā vavṛtyāṃ tiraḥ purū cidarṇavaṃ jaganvān .
piturnapātamā dadhīta vedhā adhi kṣami prataraṃ dīdhyānaḥ ..1..

18.1.2

na te sakhā sakhyaṃ vaṣṭyetatsalakṣmā yadviṣurūpā bhavati .
mahasputrāso asurasya vīrā divo dhartāra urviyā pari khyan ..2..

18.1.3

uśanti ghā te amṛtāsa etadekasya cittyajasaṃ martyasya .
ni te mano manasi dhāyyasme janyuḥ patistanvamā viviṣyāḥ ..3..

18.1.4

na yatpurā cakṛmā kaddha nūnamṛtaṃ vadanto anṛtaṃ rapema .
gandharvo apsvapyā ca yoṣā sā nau nābhiḥ paramaṃ jāmi tan nau ..4..

18.1.5

garbhe nu nau janitā dampatī kardevastvaṣṭā savitā viśvarūpaḥ .
nakirasya pra minanti vratāni veda nāvasya pṛthivī uta dyauḥ ..5..

18.1.6

ko adya yuṅkte dhuri gā ṛtasya śimīvato bhāmino durhṛṇāyūn .
āsanniṣūn hṛtsvaso mayobhūn ya eṣāṃ bhṛtyāmṛṇadhatsa jīvāt..6..

18.1.7

ko asya veda prathamasyāhnaḥ ka īṃ dadarśa ka iha pra vocat.
bṛhan mitrasya varuṇasya dhāma kadu brava āhano vīcyā nṝn ..7..

18.1.8

yamasya mā yamyaṃ kāma āgantsamāne yonau sahaśeyyāya .
jāyeva patye tanvaṃ riricyāṃ vi cidvṛheva rathyeva cakrā ..8..

18.1.9

na tiṣṭhanti na ni miṣantyete devānāṃ spaśa iha ye caranti .
anyena madāhano yāhi tūyaṃ tena vi vṛha rathyeva cakrā ..9..

18.1.10

rātrībhirasmā ahabhirdaśasyetsūryasya cakṣurmuhurun mimīyāt.
divā pṛthivyā mithunā sabandhū yamīryamasya vivṛhādajāmi ..10..

18.1.11

ā ghā tā gacchān uttarā yugāni yatra jāmayaḥ kṛṇavann ajāmi .
upa barbṛhi vṛṣabhāya bāhumanyamicchasva subhage patiṃ mat..11..

18.1.12

kiṃ bhrātāsadyadanāthaṃ bhavāti kimu svasā yan nirṛtirnigachāt.
kāmamūtā bahvetadrapāmi tanvā me tanvaṃ saṃ pipṛgdhi ..12..

18.1.13

na te nāthaṃ yamyatrāhamasmi na te tanūṃ tanvā saṃ papṛcyām .
anyena matpramudaḥ kalpayasva na te bhrātā subhage vaṣṭyetat..13..

18.1.14

na vā u te tanūṃ tanvā saṃ pipṛcyāṃ pāpamāhuryaḥ svasāraṃ nigacchāt.
asaṃyadetan manaso hṛdo me bhrātā svasuḥ śayane yacchayīya ..14..

18.1.15

bato batāsi yama naiva te mano hṛdayaṃ cāvidāmā .
anyā kila tvāṃ kakṣyeva yuktaṃ pari ṣvajātau libujeva vṛkṣam ..15..

18.1.16

anyamū ṣu yamyanya u tvāṃ pari ṣvajātau libujeva vṛkṣam .
tasya vā tvaṃ mana ichā sa vā tavādhā kṛṇuṣva saṃvidaṃ subhadrām ..16..

18.1.17

trīṇi cchandāṃsi kavayo vi yetire pururūpaṃ darśataṃ viśvacakṣaṇam .
āpo vātā oṣadhayastānyekasmin bhuvana ārpitāni ..17..

18.1.18

vṛṣā vṛṣṇe duduhe dohasā divaḥ payāṃsi yahvo aditeradābhyaḥ .
viśvaṃ sa veda varuṇo yathā dhiyā sa yajñiyo yajati yajñiyāmṛtūn ..18..

18.1.19

rapadgandharvīrapyā ca yoṣaṇā nadasya nāde pari pātu no manaḥ .
iṣṭasya madhye aditirni dhātu no bhrātā no jyeṣṭhaḥ prathamo vi vocati ..19..

18.1.20

so citnu bhadrā kṣumatī yaśasvatyuṣā uvāsa manave svarvatī .
yadīmuśantamuśatāmanu kratumagniṃ hotāraṃ vidathāya jījanan ..20..

18.1.21

adha tyaṃ drapsaṃ vibhvaṃ vicakṣanaṃ virābharadiṣiraḥ śyeno adhvare .
yadī viśo vṛṇate dasmamāryā agniṃ hotāramadha dhīrajāyata ..21..

18.1.22

sadāsi raṇvo yavaseva puṣyate hotrābhiragne manuṣaḥ svadhvaraḥ .
viprasya vā yacchaśamāna ukthyo vājaṃ sasavāmupayāsi bhūribhiḥ ..22..

18.1.23

udīraya pitarā jāra ā bhagamiyakṣati haryato hṛtta iṣyati .
vivakti vahniḥ svapasyate makhastaviṣyate asuro vepate matī ..23..

18.1.24

yaste agne sumatiṃ marto akhyatsahasaḥ sūno ati sa pra śṛṇve .
iṣaṃ dadhāno vahamāno aśvairā sa dyumāmamavān bhūṣati dyūn ..24..

18.1.25

śrudhī no agne sadane sadhasthe yukṣvā rathamamṛtasya dravitnum .
ā no vaha rodasī devaputre mākirdevānāmapa bhūriha syāḥ ..25..

18.1.26

yadagna eṣā samitirbhavāti devī deveṣu yajatā yajatra .
ratnā ca yadvibhajāsi svadhāvo bhāgaṃ no atra vasumantaṃ vītāt..26..

18.1.27

anvagniruṣasāmagramakhyadanvahāni prathamo jātavedāḥ .
anu sūrya uṣaso anu raśmīn dyāvāpṛthivī ā viveśa ..27..

18.1.28

pratyagniruṣasāmagramakhyatpratyahāni prathamo jātavedāḥ .
prati sūryasya purudhā ca raśmīn prati dyāvāpṛthivī ā tatāna ..28..

18.1.29

dyāvā ha kṣāmā prathame ṛtenābhiśrāve bhavataḥ satyavācā .
devo yan martān yajathāya kṛṇvantsīdaddhotā pratyaṅsvamasuṃ yan ..29..

18.1.30

devo devān paribhūrṛtena vahā no havyaṃ prathamaścikitvān .
dhūmaketuḥ samidhā bhāṛjīko mandro hotā nityo vācā yajīyān ..30..

18.1.31

arcāmi vāṃ vardhāyāpo ghṛtasnū dyāvābhūmī śṛṇutaṃ rodasī me .
ahā yaddevā asunītimāyan madhvā no atra pitarā śiśītām ..31..

18.1.32

svāvṛgdevasyāmṛtaṃ yadī gorato jātāso dhārayanta urvī .
viśve devā anu tatte yajurgurduhe yadenī divyaṃ ghṛtaṃ vāḥ ..32..

18.1.33

kiṃ svin no rājā jagṛhe kadasyāti vrataṃ cakṛmā ko vi veda .
mitrasciddhi ṣmā juhurāṇo devāṃ chloko na yātāmapi vājo asti ..33..

18.1.34

durmantvatrāmṛtasya nāma salakṣmā yadviṣurūpā bhavāti .
yamasya yo manavate sumantvagne tamṛṣva pāhyaprayucchan ..34..

18.1.35

yasmin devā vidathe mādayante vivasvataḥ sadane dhārayante .
sūrye jyotiradadhurmāsyaktūn pari dyotaniṃ carato ajasrā ..35..

18.1.36

yasmin devā manmani saṃcarantyapīcye na vayamasya vidma .
mitro no atrāditiranāgāntsavitā devo varuṇāya vocat..36..

18.1.37

sakhāya ā śiṣāmahe brahmendrāya vajriṇe .
stuṣa ū ṣu nṛtamāya dhṛṣṇave ..37..

18.1.38

śavasā hyasi śruto vṛtrahatyena vṛtrahā .
maghairmaghono ati śūra dāśasi ..38..

18.1.39

stego na kṣāmatyeṣi pṛthivīṃ mahī no vātā iha vāntu bhūmau .
mitro no atra varuṇo yujamāno agnirvane na vyasṛṣṭa śokam ..39..

18.1.40

stuhi śrutaṃ gartasadaṃ janānāṃ rājānaṃ bhīmamupahatnumugram .
mṛḍā jaritre rudra stavāno anyamasmatte ni vapantu senyam ..40..

18.1.41

sarasvatīṃ devayanto havante sarasvatīmadhvare tāyamāne .
sarasvatīṃ sukṛto havante sarasvatī dāśuṣe vāryaṃ dāt..41..

18.1.42

sarasvatīṃ pitaro havante dakṣiṇā yajñamabhinakṣamāṇāḥ .
āsadyāsmin barhiṣi mādayadhvamanamīvā iṣa ā dhehyasme ..42..

18.1.43

sarasvati yā sarathaṃ yayāthokthaiḥ svadhābhirdevi pitṛbhirmadantī .
sahasrārghamiḍo atra bhāgaṃ rāyaspoṣaṃ yajamānāya dhehi ..43..

18.1.44

udīratāmavara utparāsa un madhyamāḥ pitaraḥ somyāsaḥ .
asuṃ ya īyuravṛkā ṛtajñāste no'vantu pitaro haveṣu ..44..

18.1.45

āhaṃ pitṝntsuvidatrāmavitsi napātaṃ ca vikramaṇaṃ ca viṣṇoḥ .
barhiṣado ye svadhayā sutasya bhajanta pitvasta ihāgamiṣṭhāḥ ..45..

18.1.46

idaṃ pitṛbhyo namo astvadya ye pūrvāso ye aparāsa īyuḥ .
ye pārthive rajasyā niṣaktā ye vā nūnaṃ suvṛjanāsu dikṣu ..46..

18.1.47

mātalī kavyairyamo aṅgirobhirbṛhaspatirṛkvabhirvāvṛdhānaḥ .
yāṃśca devā vāvṛdhurye ca devāṃste no'vantu pitaro haveṣu ..47..

18.1.48

svāduṣkilāyaṃ madhumām̐ utāyaṃ tīvraḥ kilāyaṃ rasavām̐ utāyam .
uto nvasya papivāṃsamindraṃ na kaścana sahata āhaveṣu ..48..

18.1.49

pareyivāṃsaṃ pravato mahīriti bahubhyaḥ panthāmanupaspaśānam .
vaivasvataṃ saṃgamanaṃ janānāṃ yamaṃ rājānaṃ haviṣā saparyata ..49..

18.1.50

yamo no gātuṃ prathamo viveda naiṣā gavyūtirapabhartavā u .
yatrā naḥ pūrve pitaraḥ paretā enā jajñānāḥ pathyā anu svāḥ ..50..

18.1.51

barhiṣadaḥ pitara ūtyarvāgimā vo havyā cakṛmā juṣadhvam .
ta ā gatāvasā śaṃtamenādhā naḥ śaṃ yorarapo dadhāta ..51..

18.1.52

ācyā jānu dakṣiṇato niṣadyedaṃ no havirabhi gṛṇantu viśve .
mā hiṃsiṣṭa pitaraḥ kena cin no yadva āgaḥ puruṣatā karāma ..52..

18.1.53

tvaṣṭā duhitre vahatuṃ kṛṇoti tenedaṃ viśvaṃ bhuvanaṃ sameti .
yamasya mātā paryuhyamānā maho jāyā vivasvato nanāśa ..53..

18.1.54

prehi prehi pathibhiḥ pūryāṇairyenā te pūrve pitaraḥ paretāḥ .
ubhā rājānau svadhayā madantau yamaṃ paśyāsi varuṇaṃ ca devam ..54..

18.1.55

apeta vīta vi ca sarpatāto'smā etaṃ pitaro lokamakran .
ahobhiradbhiraktubhirvyaktaṃ yamo dadātyavasānamasmai ..55..

18.1.56

uśantastvedhīmahyuśantaḥ samidhīmahi .
uśann uśata ā vaha pitṝn haviṣe attave ..56..

18.1.57

dyumantastvedhīmahi dyumantaḥ samidhīmahi .
dyumān dyumata ā vaha pitṝn haviṣe attave ..57..

18.1.58

aṅgiraso naḥ pitaro navagvā atharvāṇo bhṛgavaḥ somyāsaḥ .
teṣāṃ vayaṃ sumatau yajñiyānāmapi bhadre saumanase syāma ..58..

18.1.59

aṅgirobhiryajñiyairā gahīha yama vairūpairiha mādayasva .
vivasvantaṃ huve yaḥ pitā te'smin barhiṣyā niṣadya ..59..

18.1.60

imaṃ yama prastaramā hi rohāṅgirobhiḥ pitṛbhiḥ saṃvidānaḥ .
ā tvā mantrāḥ kaviśastā vahantvenā rājan haviṣo mādayasva ..60..

18.1.61

ita eta udāruhan divaspṛṣṭhānvāruhan .
pra bhūrjayo yathā pathā dyāmaṅgiraso yayuḥ ..61..

18.1.61_1

18.1.61 ita eta udāruhan iti

18.1.61_2

ārūḍhavadāṅgirasam yāmaṃ vā

Linked texts (7)