Pramāṇa · Search · About · API

Atharvaveda 18.3

Atharvaveda 18.3

Language
Sanskrit

18.3.1

iyaṃ nārī patilokaṃ vṛṇānā ni padyata upa tvā martya pretam .
dharmaṃ purāṇamanupālayantī tasyai prajāṃ draviṇaṃ ceha dhehi ..1..

18.3.2

udīrṣva nāryabhi jīvalokaṃ gatāsumetamupa śeṣa ehi .
hastagrābhasya dadhiṣostavedaṃ patyurjanitvamabhi saṃ babhūtha ..2..

18.3.3

apaśyaṃ yuvatiṃ nīyamānāṃ jīvāṃ mṛtebhyaḥ pariṇīyamānām .
andhena yattamasā prāvṛtāsītprākto apācīmanayaṃ tadenām ..3..

18.3.4

prajānatyaghnye jīvalokaṃ devānāṃ panthāmanusaṃcarantī .
ayaṃ te gopatistaṃ juṣasva svargaṃ lokamadhi rohayainam ..4..

18.3.5

upa dyāmupa vetasamavattaro nadīnām .
agne pittamapāmasi ..5..

18.3.6

yaṃ tvamagne samadahastamu nirvāpaya punaḥ .
kyāmbūratra rohatu śāṇḍadūrvā vyalkaśā ..6..

18.3.7

idaṃ ta ekaṃ pura ū ta ekaṃ tṛtīyena jyotiṣā saṃ viśasva .
saṃveśane tanvā cāruredhi priyo devānāṃ parame sadhasthe ..7..

18.3.8

uttiṣṭha prehi pra dravaukaḥ kṛṇuṣva salile sadhasthe .
tatra tvaṃ pitṛbhiḥ saṃvidānaḥ saṃ somena madasva saṃ svadhābhiḥ ..8..

18.3.9

pra cyavasva tanvaṃ saṃ bharasva mā te gātrā vi hāyi mo śarīram .
mano niviṣṭamanusaṃviśasva yatra bhūmerjuṣase tatra gaccha ..9..

18.3.10

varcasā māṃ pitaraḥ somyāso añjantu devā madhunā ghṛtena .
cakṣuṣe mā prataraṃ tārayanto jarase mā jaradaṣṭiṃ vardhantu ..10..

18.3.11

varcasā māṃ samanaktvagnirmedhāṃ me viṣṇurnyanaktvāsan .
rayiṃ me viśve ni yacchantu devāḥ syonā māpaḥ pavanaiḥ punantu ..11..

18.3.12

mitrāvaruṇā pari māmadhātāmādityā mā svaravo vardhayantu .
varco ma indro nyanaktu hastayorjaradaṣṭiṃ mā savitā kṛṇotu ..12..

18.3.13

yo mamāra prathamo martyānāṃ yaḥ preyāya prathamo lokametam .
vaivasvataṃ saṃgamanaṃ janānāṃ yamaṃ rājānaṃ haviṣā saparyata ..13..

18.3.14

parā yāta pitara ā ca yātāyaṃ vo yajño madhunā samaktaḥ .
datto asmabhyaṃ draviṇeha bhadraṃ rayiṃ ca naḥ sarvavīraṃ dadhāta ..14..

18.3.15

kaṇvaḥ kakṣīvān purumīḍho agastyaḥ śyāvāśvaḥ sobharyarcanānāḥ .
viśvāmitro'yaṃ jamadagniratriravantu naḥ kaśyapo vāmadevaḥ ..15..

18.3.16

viśvāmitra jamadagne vasiṣṭha bharadvāja gotama vāmadeva .
śardirno atriragrabhīn namobhiḥ susaṃśāsaḥ pitaro mṛḍatā naḥ ..16..

18.3.17

kasye mṛjānā ati yanti ripramāyurdadhānāḥ prataraṃ navīyaḥ .
āpyāyamānāḥ prajayā dhanenādha syāma surabhayo gṛheṣu ..17..

18.3.18

añjate vyañjate samañjate kratuṃ rihanti madhunābhyañjate .
sindhorucchvāse patayantamukṣaṇaṃ hiraṇyapāvāḥ paśumāsu gṛhnate ..18..

18.3.19

yadvo mudraṃ pitaraḥ somyaṃ ca teno sacadhvaṃ svayaśaso hi bhūta .
te arvāṇaḥ kavaya ā śṛṇota suvidatrā vidathe huyamānāḥ ..19..

18.3.20

ye atrayo aṅgiraso navagvā iṣṭāvanto rātiṣāco dadhānāḥ .
dakṣiṇāvantaḥ sukṛto ya u sthāsadyāsmin barhiṣi mādayadhvam ..20..

18.3.21

adhā yathā naḥ pitaraḥ parāsaḥ pratnāso agna ṛtamāśaśānāḥ .
śucīdayan dīdhyata ukthaśasaḥ kṣāmā bhindanto aruṇīrapa vran ..21..

18.3.22

sukarmānaḥ suruco devayanto ayo na devā janimā dhamantaḥ .
śucanto agniṃ vāvṛdhanta indramurvīṃ gavyāṃ pariṣadaṃ no akran ..22..

18.3.23

ā yūtheva kṣumati paśvo akhyaddevānāṃ janimāntyugraḥ .
martāsaścidurvaśīrakṛpran vṛdhe cidarya uparasyāyoḥ ..23..

18.3.24

akarma te svapaso abhūma ṛtamavasrann uṣaso vibhātīḥ .
viśvaṃ tadbhadraṃ yadavanti devā bṛhadvadema vidathe suvīrāḥ ..24..

18.3.25

indro mā marutvān prācyā diśaḥ pātu bāhucyutā pṛthivī dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..25..

18.3.26

dhātā mā nirṛtyā dakṣiṇāyā diśaḥ pātu bāhucyutā pṛthivī dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..26..

18.3.27

aditirmādityaiḥ pratīcyā diśaḥ pātu bāhucyutā pṛthivī dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..27..

18.3.28

somo mā viśvairdevairudīcyā diśaḥ pātu bāhucyutā pṛthivī dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..28..

18.3.29

dhartā ha tvā dharuṇo dhārayātā ūrdhvaṃ bhānuṃ savitā dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..29..

18.3.30

prācyāṃ tvā diśi purā samvṛtaḥ svadhāyāmā dadhāmi bāhucyutā pṛthivī dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..30..

18.3.31

dakṣiṇāyāṃ tvā diśi purā samvṛtaḥ svadhāyāmā dadhāmi bāhucyutā pṛthivī dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..31..

18.3.32

pratīcyāṃ tvā diśi purā saṃvṛtaḥ svadhāyāmā dadhāmi bāhucyutā pṛthivī dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..32..

18.3.33

udīcyāṃ tvā diśi purā samvṛtaḥ svadhāyāmā dadhāmi bāhucyutā pṛthivī dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..33..

18.3.34

dhruvāyāṃ tvā diśi purā saṃvṛtaḥ svadhāyāmā dadhāmi bāhucyutā pṛthivī dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..34..

18.3.35

ūrdhvāyāṃ tvā diśi purā samvṛtaḥ svadhāyāmā dadhāmi bāhucyutā pṛthivī dyāmivopari .
lokakṛtaḥ pathikṛto yajāmahe ye devānāṃ hutabhāgā iha stha ..35..

18.3.36

dhartāsi dharuno'si vaṃsago'si ..36..

18.3.37

udapūrasi madhupūrasi vātapūrasi ..37..

18.3.38

itaśca māmutaścāvatāṃ yame iva yatamāne yadaitam .
pra vāṃ bharan mānuṣā devayanto ā sīdatāṃ svamu lokaṃ vidāne ..38..

18.3.39

svāsasthe bhavatamindave no yuje vāṃ brahma pūrvyaṃ namobhiḥ .
vi śloka eti pathyeva sūriḥ śṛṇvantu viśve amṛtāsa etat..39..

18.3.40

trīṇi padāni rupo anvarohaccatuṣpadīmanvetadvratena .
akṣareṇa prati mimīte arkamṛtasya nābhāvabhi saṃ punāti ..40..

18.3.41

devebhyaḥ kamavṛṇīta mṛtyuṃ prajāyai kimamṛtaṃ nāvṛṇīta .
bṛhaspatiryajñamatanuta ṛṣiḥ priyāṃ yamastanvamā rireca ..41..

18.3.42

tvamagna īḍito jātavedo'vāḍḍhavyāni surabhīṇi kṛtvā .
prādāḥ pitṛbhyaḥ svadhayā te akṣann addhi tvaṃ deva prayatā havīṃṣi ..42..

18.3.43

āsīnāso aruṇīnāmupasthe rayiṃ dhatta dāśuṣe martyāya .
putrebhyaḥ pitarastasya vasvaḥ pra yacchata ta ihorjaṃ dadhāta ..43..

18.3.44

agniṣvāttāḥ pitara eha gacchata sadaḥsadaḥ sadata supraṇītayaḥ .
atto havīṃṣi prayatāni barhiṣi rayiṃ ca naḥ sarvavīraṃ dadhāta ..44..

18.3.45

upahūtā naḥ pitaraḥ somyāso barhiṣyeṣu nidhiṣu priyeṣu .
ta ā gamantu ta iha śruvantvadhi bruvantu te'vantvasmān ..45..

18.3.46

ye naḥ pituḥ pitaro ye pitāmahā anūjahire somapīthaṃ vasiṣṭhāḥ .
tebhiryamaḥ samrarāṇo havīṃṣyuśann uśadbhiḥ pratikāmamattu ..46..

18.3.47

ye tātṛṣurdevatrā jehamānā hotrāvidaḥ stomataṣṭāso arkaiḥ .
āgne yāhi sahasraṃ devavandaiḥ satyaiḥ kavibhirṛṣibhirgharmasadbhiḥ ..47..

18.3.48

ye satyāso havirado haviṣpā indreṇa devaiḥ sarathaṃ tureṇa .
āgne yāhi suvidatrebhirarvāṅparaiḥ pūrvairṛṣibhirgharmasadbhiḥ ..48..

18.3.49

upa sarpa mātaraṃ bhūmimetāmuruvyacasaṃ pṛthivīṃ suśevām .
ūrṇamradāḥ pṛthivī dakṣiṇāvata eṣā tvā pātu prapathe purastāt..49..

18.3.50

ucchvañcasva pṛthivi mā ni bādhathāḥ sūpāyanāsmai bhava sūpasarpaṇā .
mātā putraṃ yathā sicābhyenaṃ bhūma ūrṇuhi ..50..

18.3.51

ucchvañcamānā pṛthivī su tiṣṭhatu sahasraṃ mita upa hi śrayantām .
te gṛhāso ghṛtaścutaḥ syonā viśvāhāsmai śaraṇāḥ santvatra ..51..

18.3.52

utte stabhnāmi pṛthivīṃ tvatparīmaṃ logaṃ nidadhan mo ahaṃ riṣam .
etāṃ sthūṇāṃ pitaro dhārayanti te tatra yamaḥ sādanā te kṛṇotu ..52..

18.3.53

imamagne camasaṃ mā vi jihvaraḥ priyo devānāmuta somyānām .
ayaṃ yaścamaso devapānastasmin devā amṛtā mādayantām ..53..

18.3.54

atharvā pūrṇaṃ camasaṃ yamindrāyābibharvājinīvate .
tasmin kṛṇoti sukṛtasya bhakṣaṃ tasmin induḥ pavate viśvadānīm ..54..

18.3.55

yatte kṛṣṇaḥ śakuna ātutoda pipīlaḥ sarpa uta vā śvāpadaḥ .
agniṣṭadviśvādagadaṃ kṛṇotu somaśca yo brāhmaṇāmāviveśa ..55..

18.3.56

payasvatīroṣadhayaḥ payasvan māmakaṃ payaḥ .
apāṃ payaso yatpayastena mā saha śumbhatu ..56..

18.3.57

imā nārīravidhavāḥ supatnīrāñjanena sarpiṣā saṃ spṛśantām .
anaśravo anamīvāḥ suratnā ā rohantu janayo yonimagre ..57..

18.3.58

saṃ gacchasva pitṛbhiḥ saṃ yameneṣṭāpūrtena parame vyoman .
hitvāvadyaṃ punarastamehi saṃ gacchatāṃ tanvā suvarcāḥ ..58..

18.3.59

ye naḥ pituḥ pitaro ye pitāmahā ya āviviśururvantarikṣam .
tebhyaḥ svarādasunītirno adya vathāvaśaṃ tanvaḥ kalpayāti ..59..

18.3.60

śaṃ te nīhāro bhavatu śaṃ te pruṣvāva śīyatām .
śītike śītikāvati hlādike hlādikāvati .
maṇḍūkyapsu śaṃ bhuva imaṃ svagniṃ śamaya ..60..

18.3.61

vivasvān no abhayaṃ kṛṇotu yaḥ sutrāmā jīradānuḥ sudānuḥ .
iheme vīrā bahavo bhavantu gomadaśvavan mayyastu puṣṭam ..61..

18.3.62

vivasvān no amṛtatve dadhātu paraitu mṛtyuramṛtaṃ na aitu .
imān rakṣatu puruṣān ā jarimṇo mo sveṣāmasavo yamaṃ guḥ ..62..

18.3.63

yo dadhre antarikṣe na mahnā pitṝṇāṃ kaviḥ pramatirmatīnām .
tamarcata viśvamitrā havirbhiḥ sa no yamaḥ prataraṃ jīvase dhāt..63..

18.3.64

ā rohata divamuttamāmṛṣayo mā bibhītana .
somapāḥ somapāyina idaṃ vaḥ kriyate haviraganma jyotiruttamam ..64..

18.3.65

pra ketunā bṛhatā bhātyagnirā rodasī vṛṣabho roravīti .
divaścidantādupamāmudānaḍapāmupasthe mahiṣo vavardha ..65..

18.3.66

nāke suparṇamupa yatpatantaṃ hrdā venanto abhyacakṣata tvā .
hiraṇyapakṣaṃ varuṇasya dūtaṃ yamasya yonau śakunaṃ bhuranyum ..66..

18.3.67

indra kratuṃ na ā bhara pitā putrebhyo yathā .
śikṣā ṇo asmin puruhūta yāmani jīvā jyotiraśīmahi ..67..

18.3.68

apūpāpihitān kumbhān yāṃste devā adhārayan .
te te santu svadhāvanto madhumanto ghṛtaścutaḥ ..68..

18.3.69

yāste dhānā anukirāmi tilamiśrā svadhāvatīḥ .
tāste santu vibhvīḥ prabhvīstāste yamo rājānu manyatām ..69..

18.3.70

punardehi vanaspate ya eṣa nihitastvayi .
yathā yamasya sādana āsātau vidathā vadan ..70..

18.3.71

ā rabhasva jātavedastejasvaddharo astu te .
śarīramasya saṃ dahāthainaṃ dehi sukṛtāmu loke ..71..

18.3.72

ye te pūrve parāgatā apare pitaraśca ye .
tebhyo ghṛtasya kulyaitu śatadhārā vyundatī ..72..

18.3.73

etadā roha vaya unmṛjānaḥ svā iha bṛhadu dīdayante .
abhi prehi madhyato māpa hāsthāḥ pitṝnāṃ lokaṃ prathamo yo atra ..73..

Linked texts (6)