Pramāṇa · Search · About · API

Atharvaveda 18.4

Atharvaveda 18.4

Language
Sanskrit

18.4.1

ā rohata janitrīṃ jātavedasaḥ pitṛyānaiḥ saṃ va ā rohayāmi .
avāḍḍhavyeṣito havyavāha ījānaṃ yuktāḥ sukṛtāṃ dhatta loke ..1..

18.4.2

devā yajñamṛtavaḥ kalpayanti haviḥ puroḍāśaṃ sruco yajñāyudhāni .
tebhiryāhi pathibhirdevayānairyairījānāḥ svargaṃ yanti lokam ..2..

18.4.3

ṛtasya panthāmanu paśya sādhvaṅgirasaḥ sukṛto yena yanti .
tebhiryāhi pathibhiḥ svargaṃ yatrādityā madhu bhakṣayanti tṛtīye nāke adhi vi śrayasva ..3..

18.4.4

trayaḥ suparṇā uparasya māyū nākasya pṛṣṭhe adhi viṣṭapi śritāḥ .
svargā lokā amṛtena viṣṭhā iṣamūrjaṃ yajamānāya duhrām ..4..

18.4.5

juhūrdādhāra dyāmupabhṛdantarikṣaṃ dhruvā dādhāra pṛthivīṃ pratiṣṭhām .
dhruva ā roha pṛthivīṃ viśvabhojasamantarikṣamupabhṛdā kramasva .
pratīmāṃ lokā ghṛtapṛṣṭhāḥ svargāḥ kāmaṃkāmaṃ yajamānāya duhrām ..5..

18.4.6

dhruva ā roha pṛthivīṃ viśvabhojasamantarikṣamupabhṛdā kramasva .
juhu dyāṃ gaccha yajamānena sākaṃ sruveṇa vatsena diśaḥ prapīnāḥ sarvā dhukṣvāhṛṇyamānaḥ ..6..

18.4.7

tīrthaistaranti pravato mahīriti yajñakṛtaḥ sukṛto yena yanti .
atrādadhuryajamānāya lokaṃ diśo bhūtāni yadakalpayanta ..7..

18.4.8

aṅgirasāmayanaṃ pūrvo agnirādityānāmayanaṃ gārhapatyo dakṣiṇānāmayanaṃ dakṣiṇāgniḥ .
mahimānamagnervihitasya brahmaṇā samaṅgaḥ sarva upa yāhi śagmaḥ ..8..

18.4.9

pūrvo agniṣṭvā tapatu śaṃ purastācchaṃ paścāttapatu gārhapatyaḥ .
dakṣiṇāgniṣṭe tapatu śarma varmottarato madhyato antarikṣāddiśodiśo agne pari pāhi ghorāt..9..

18.4.10

yūyamagne śaṃtamābhistanūbhirījānamabhi lokaṃ svargam .
aśvā bhūtvā pṛṣṭivāho vahātha yatra devaiḥ sadhamādaṃ madanti ..10..

18.4.11

śamagne paścāttapa śaṃ purastācchamuttarācchamadharāttapainam .
ekastredhā vihito jātavedaḥ samyagenaṃ dhehi sukṛtāmu loke ..11..

18.4.12

śamagnayaḥ samiddhā ā rabhantāṃ prājāpatyaṃ medhyaṃ jātavedasaḥ .
śṛtaṃ kṛṇvanta iha māva cikṣipan ..12..

18.4.13

yajña eti vitataḥ kalpamāna ījānamabhi lokaṃ svargam .
tamagnayaḥ sarvahutaṃ juṣantāṃ prājāpatyaṃ medhyaṃ jātavedasaḥ ..13..

18.4.14

ījānaścitamārukṣadagniṃ nākasya pṛṣṭhāddivamutpatiṣyan .
tasmai pra bhāti nabhaso jyotiṣīmāntsvargaḥ panthāḥ sukṛte devayānaḥ ..14..

18.4.15

agnirhotādhvaryuṣṭe bṛhaspatirindro brahmā dakṣiṇataste astu .
huto'yaṃ saṃsthito yajña eti yatra pūrvamayanaṃ hutānām ..15..

18.4.16

apūpavān kṣīravāṃścarureha sīdatu .
lokakṛtaḥ pathikṛto yajāmahe ye devānāṃ hutabhāgā iha stha ..16..

18.4.17

apūpavān dadhivāṃścarureha sīdatu .
lokakṛtaḥ pathikṛto yajāmahe ye devānāṃ hutabhāgā iha stha ..17..

18.4.18

apūpavān drapsavāṃścarureha sīdatu .
lokakṛtaḥ pathikṛto yajāmahe ye devānāṃ hutabhāgā iha stha ..18..

18.4.19

apūpavān ghṛtavāṃścarureha sīdatu .
lokakṛtaḥ pathikṛto yajāmahe ye devānāṃ hutabhāgā iha stha ..19..

18.4.20

apūpavān māṃsavāṃścarureha sīdatu .
lokakṛtaḥ pathikṛto yajāmahe ye devānāṃ hutabhāgā iha stha ..20..

18.4.21

apūpavān annavāṃścarureha sīdatu .
lokakṛtaḥ pathikṛto yajāmahe ye devānāṃ hutabhāgā iha stha ..21..

18.4.22

apūpavān madhumāṃścarureha sīdatu .
lokakṛtaḥ pathikṛto yajāmahe ye devānāṃ hutabhāgā iha stha ..22..

18.4.23

apūpavān rasavāṃścarureha sīdatu .
lokakṛtaḥ pathikṛto yajāmahe ye devānāṃ hutabhāgā iha stha ..23..

18.4.24

apūpavān apavāṃścarureha sīdatu .
lokakṛtaḥ pathikṛto yajāmahe ye devānāṃ hutabhāgā iha stha ..24..

18.4.25

apūpāpihitān kumbhān yāṃste devā adhārayan .
te te santu svadhāvanto madhumanto ghṛtaścutaḥ ..25..

18.4.26

yāste dhānā anukirāmi tilamiśrāḥ svadhāvatīḥ .
tāste santūdbhvīḥ prabhvīstāste yamo rājānu manyatām ..26..

18.4.27

akṣitiṃ bhūyasīm ..27..

18.4.28

drapsaścaskanda pṛthivīmanu dyāmimaṃ ca yonimanu yaśca pūrvaḥ .
samānaṃ yonimanu saṃcarantaṃ drapsaṃ juhomyanu sapta hotrāḥ ..28..

18.4.29

śatadhāraṃ vāyumarkaṃ svarvidaṃ nṛcakṣasaste abhi cakṣate rayim .
ye pṛnanti pra ca yacchanti sarvadā te duhrate dakṣiṇāṃ saptamātaram ..29..

18.4.30

kośaṃ duhanti kalaśaṃ caturbilamiḍāṃ dhenuṃ madhumatīṃ svastaye .
ūrjaṃ madantīmaditiṃ janeṣvagne mā hiṃsīḥ parame vyoman ..30..

18.4.31

etatte devaḥ savitā vāso dadāti bhartave .
tattvaṃ yamasya rājye vasānastārpyaṃ cara ..31..

18.4.32

dhānā dhenurabhavadvatso asyāstilo'bhavat.
tāṃ vai yamasya rājye akṣitāmupa jīvati ..32..

18.4.33

etāste asau dhenavaḥ kāmadughā bhavantu .
enīḥ śyenīḥ sarūpā virūpāstilavatsā upa tiṣṭhantu tvātra ..33..

18.4.34

enīrdhānā hariṇīḥ śyenīrasya kṛṣṇā dhānā rohiṇīrdhenavaste .
tilavatsā ūrjamasmai duhānā viśvāhā santvanapasphurantīḥ ..34..

18.4.35

vaiśvānare haviridaṃ juhomi sāhasraṃ śatadhāramutsam .
sa bibharti pitaraṃ pitāmahān prapitāmahān bibharti pinvamānaḥ ..35..

18.4.36

sahasradhāraṃ śatadhāramutsamakṣitaṃ vyacyamānaṃ salilasya pṛṣṭhe .
ūrjaṃ duhānamanapasphurantamupāsate pitaraḥ svadhābhiḥ ..36..

18.4.37

idaṃ kasāmbu cayanena citaṃ tatsajātā ava paśyateta .
martyo'yamamṛtatvameti tasmai gṛhān kṛṇuta yāvatsabandhu ..37..

18.4.38

ihaivaidhi dhanasanirihacitta ihakratuḥ .
ihaidhi vīryavattaro vayodhā aparāhataḥ ..38..

18.4.39

putraṃ pautramabhitarpayantīrāpo madhumatīrimāḥ .
svadhāṃ pitṛbhyo amṛtaṃ duhānā āpo devīrubhayāṃstarpayantu ..39..

18.4.40

āpo agniṃ pra hiṇuta pitṝṃrupemaṃ yajñaṃ pitaro me juṣantām .
āsīnāmūrjamupa ye sacante te no rayiṃ sarvavīraṃ ni yachān ..40..

18.4.41

samindhate amartyaṃ havyavāhaṃ ghṛtapriyam .
sa veda nihitān nidhīn pitṝn parāvato gatān ..41..

18.4.42

yaṃ te manthaṃ yamodanaṃ yan māṃsaṃ nipṛṇāmi te .
te te santu svadhāvanto madhumanto ghṛtaścutaḥ ..42..

18.4.43

yāste dhānā anukirāmi tilamiśrāḥ svadhāvatīḥ .
tāste santūdbhvīḥ prabhvīstāste yamo rājānu manyatām ..43..

18.4.44

idaṃ pūrvamaparaṃ niyānaṃ yenā te pūrve pitaraḥ paretāḥ .
purogavā ye abhisāco asya te tvā vahanti sukṛtāmu lokam ..44..

18.4.45

sarasvatīṃ devayanto havante sarasvatīmadhvare tāyamāne .
sarasvatīṃ sukṛto havante sarasvatī dāśuṣe vāryaṃ dāt..45..

18.4.46

sarasvatīṃ pitaro havante dakṣiṇā yajñamabhinakṣamāṇāḥ .
āsadyāsmin barhiṣi mādayadhvamanamīvā iṣa ā dhehyasme ..46..

18.4.47

sarasvati yā sarathaṃ yayāthokthaiḥ svadhābhirdevi pitṛbhirmadantī .
sahasrārghamiḍo atra bhāgaṃ rāyaspoṣaṃ yajamānāya dhehi ..47..

18.4.48

pṛthivīṃ tvā pṛthivyāmā veśayāmi devo no dhātā pra tirātyāyuḥ .
parāparaitā vasuvidvo astvadhā mṛtāḥ pitṛṣu saṃ bhavantu ..48..

18.4.49

ā pra cyavethāmapa tan mṛjethāṃ yadvāmabhibhā atrocuḥ .
asmādetamaghnyau tadvaśīyo dātuḥ pitṛṣvihabhojanau mama ..49..

18.4.50

eyamagan dakṣiṇā bhadrato nā anena dattā sudughā vayodhāḥ .
yauvane jīvān upapṛñcatī jarā pitṛbhya upasaṃparāṇayādimān ..50..

18.4.51

idaṃ pitṛbhyaḥ pra bharāmi barhirjīvaṃ devebhya uttaraṃ stṛṇāmi .
tadā roha puruṣa medhyo bhavan prati tvā jānantu pitaraḥ paretam ..51..

18.4.52

edaṃ barhirasado medhyo'bhūḥ prati tvā jānantu pitaraḥ paretam .
yathāparu tanvaṃ saṃ bharasva gātrāṇi te brahmaṇā kalpayāmi ..52..

18.4.53

parṇo rājāpidhānaṃ carūṇāmūrjo balaṃ saha ojo na āgan .
āyurjīvebhyo vidadhaddīrghāyutvāya śataśāradāya ..53..

18.4.54

ūrjo bhāgo ya imaṃ jajānāśmānnānāmādhipatyaṃ jagāma .
tamarcata viśvamitrā havirbhiḥ sa no yamaḥ prataraṃ jīvase dhāt..54..

18.4.55

yathā yamāya harmyamavapan pañca mānavāḥ .
evā vapāmi harmyaṃ yathā me bhūrayo'sata ..55..

18.4.56

idaṃ hiraṇyaṃ bibhṛhi yatte pitābibhaḥ purā .
svargaṃ yataḥ piturhastaṃ nirmṛḍḍhi dakṣiṇam ..56..

18.4.57

ye ca jīvā ye ca mṛtā ye jātā ye ca yajñiyāḥ .
tebhyo ghṛtasya kulyaitu madhudhārā vyundatī ..57..

18.4.58

vṛṣā matīnāṃ pavate vicakṣaṇaḥ sūro ahnāṃ pratarītoṣasāṃ divaḥ .
prāṇaḥ sindhūnāṃ kalaśāmacikradadindrasya hārdimāviśan manīṣayā ..58..

18.4.59

tveṣaste dhūma ūrṇotu divi ṣaṃ chukra ātataḥ .
sūro na hi dyutā tvaṃ kṛpā pāvaka rocase ..59..

18.4.60

pra vā etīndurindrasya niṣkṛtiṃ sakhā sakhyurna pra mināti saṃgiraḥ .
marya iva yoṣāḥ samarṣase somaḥ kalaśe śatayāmanā pathā ..60..

18.4.61

akṣann amīmadanta hyava priyāmadhūṣata .
astoṣata svabhānavo viprā yaviṣṭhā īmahe ..61..

18.4.62

ā yāta pitaraḥ somyāso gambhīraiḥ pathibhiḥ pitṛyāṇaiḥ .
āyurasmabhyaṃ dadhataḥ prajāṃ ca rāyaśca poṣairabhi naḥ sacadhvam ..62..

18.4.63

parā yāta pitaraḥ somyāso gambhīraiḥ pathibhiḥ pūryāṇaiḥ .
adhā māsi punarā yāta no gṛhān havirattuṃ suprajasaḥ suvīrāḥ ..63..

18.4.64

yadvo agnirajahādekamaṅgaṃ pitṛlokaṃ gamayaṃ jātavedāḥ .
tadva etatpunarā pyāyayāmi sāṅgāḥ svarge pitaro mādayadhvam ..64..

18.4.65

abhūddūtaḥ prahito jātavedāḥ sāyaṃ nyahna upavandyo nṛbhiḥ .
prādāḥ pitṛbhyaḥ svadhayā te akṣann addhi tvaṃ deva prayatā havīṃṣi ..65..

18.4.66

asau hā iha te manaḥ kakutsalamiva jāmayaḥ .
abhyenaṃ bhūma ūrṇuhi ..66..

18.4.67

śumbhantāṃ lokāḥ pitṛṣadanāḥ pitṛṣadane tvā loka ā sādayāmi ..67..

18.4.68

ye asmākaṃ pitarasteṣāṃ barhirasi ..68..

18.4.69

uduttamaṃ varuṇa pāśamasmadavādhamaṃ śrathāya .
adhā vayamāditya vrate tavānāgaso aditaye syāma ..69..

18.4.70

prāsmatpāśān varuṇa muñca sarvān yaiḥ samāme badhyate yairvyāme .
adhā jīvema śaradaṃ śatāni tvayā rājan gupitā rakṣamāṇāḥ ..70..

18.4.71

agnaye kavyavāhanāya svadhā namaḥ ..71..

18.4.72

somāya pitṛmate svadhā namaḥ ..72..

18.4.73

pitṛbhyaḥ somavadbhyaḥ svadhā namaḥ ..73..

18.4.74

yamāya pitṛmate svadhā namaḥ ..74..

18.4.75

etatte pratatāmaha svadhā ye ca tvāmanu ..75..

18.4.76

etatte tatāmaha svadhā ye ca tvāmanu ..76..

18.4.77

etatte tata svadhā ..77..

18.4.78

svadhā pitṛbhyaḥ pṛthiviṣadbhyaḥ ..78..

18.4.79

svadhā pitṛbhyo antarikṣasadbhyaḥ ..79..

18.4.80

svadhā pitṛbhyo diviṣadbhyaḥ ..80..

18.4.81

namo vaḥ pitara ūrje namo vaḥ pitaro rasāya ..81..

18.4.82

namo vaḥ pitaro bhāmāya namo vaḥ pitaro manyave ..82..

18.4.83

namo vaḥ pitaro yadghoraṃ tasmai namo vaḥ pitaro yatkrūraṃ tasmai ..83..

18.4.84

namo vaḥ pitaro yacchivaṃ tasmai namo vaḥ pitaro yatsyonaṃ tasmai ..84..

18.4.85

namo vaḥ pitaraḥ svadhā vaḥ pitaraḥ ..85..

18.4.86

ye'tra pitaraḥ pitaro ye'tra yūyaṃ stha yuṣmāṃste'nu yūyaṃ teṣāṃ śreṣṭhā bhūyāstha ..86..

18.4.87

ya iha pitaro jīvā iha vayaṃ smaḥ .
asmāṃste'nu vayaṃ teṣāṃ śreṣṭhā bhūyāsma ..87..

18.4.88

ā tvāgna idhīmahi dyumantaṃ devājaram .
yadgha sā te panīyasī samiddīdayati dyavi .
iṣaṃ stotṛbhya ā bhara ..88..

18.4.89

candramā apsvantarā suparṇo dhāvate divi .
na vo hiraṇyanemayaḥ padaṃ vindanti vidyuto vittaṃ me asya rodasī ..89..

18.4.89_1

śrāddhopari paurāṇikāḥ saṃdarbhāḥ

18.4.89_2

gayāśrāddha vidhiḥ

Linked texts (8)