Atharvaveda 2.15: sūktaṃ 2.15

Atharvaveda 2.15

Language: Sanskrit

sūktaṃ 2.15

2.15.1

yathā dyauśca pṛthivī ca na bibhīto na riṣyataḥ .
evā me prāṇa mā bibheḥ ..1..

2.15.2

yathāhaśca rātrī ca na bibhīto na riṣyataḥ .
evā me prāṇa mā bibheḥ ..2..

2.15.3

yathā sūryaśca candraśca na bibhīto na riṣyataḥ .
evā me prāṇa mā bibheḥ ..3..

2.15.4

yathā brahma ca kṣatraṃ ca na bibhīto na riṣyataḥ .
evā me prāṇa mā bibheḥ ..4..

2.15.5

yathā satyaṃ cānṛtaṃ ca na bibhīto na riṣyataḥ .
evā me prāṇa mā bibheḥ ..5..

2.15.6

yathā bhūtaṃ ca bhavyaṃ ca na bibhīto na riṣyataḥ .
evā me prāṇa mā bibheḥ ..6..

'yathā dyauḥ' iti sūktena āyuṣkāmaḥ sthālīpākam odanaṃ śāntyudakena saṃprokṣya abhimantrya prāśnīyāt . sūtrita hi-- “ 'yathā dyauḥ', 'manase cetase dhiye' (a 6,41) iti mahāvrīhīṇāṃ sthālīpākaṃ śrapayitvā śāntyudakena upasicya abhimantrya prāśayati” ( kausū 54,11) iti .
yathā dyauśca pṛthivī ca na bibhīto na riṣyataḥ .
evā me prāṇa mā bibheḥ ..1..

2.15.6_2

yā . dyauḥ. ca . pṛthivī . ca . na . bibhītaḥ . na . riṣyataḥ .
eva . me. prāṇa . mā . bibheḥ .. 1 ..

2.15.6_3

dyauḥ dyuloko devādyāśrayabhūtaḥ, pṛthivī bhūloko manuṣyādibhirāśritaḥ . parasparasamuccayārthau cakārau . tāvubhau lokau yathā yena prakāreṇa devamanuṣyādibhiḥ sarvairupajīvyatvād upajīvyavighātakasya kasyacidapi asaṃbhavād na bibhītaḥ bhayaśaṅkāṃ na prāpnutaḥ. ñibhī bhaye . yathā ca na riṣyataḥ na vinaśyataḥ. riṣa hiṃsāyām . devādikaḥ. 'yāvadyathābhyām' (pā 8,1,66 ) iti ākhyātasya nighātapratiṣedhaḥ. eva evam . 'nipātasya ca' (pā 6,3,136) iti sāṃhitiko dīrghaḥ. me madīya he prāṇa tvaṃ mā bibheḥ śatrugraharogādibhyo bhayaśaṅkāṃ maraṇaśaṅkāṃ ca mā kārṣīḥ . anena mantrasāmarthyena dyāvāpṛthivīvat cirakālāvasthānayukto bhavetyarthaḥ . bibheriti . māṅi luṅi prāpte chāndaso laṅ .
yathāhaśca rātrī ca na bibhīto na riṣyataḥ .
evā me prāṇa mā bibheḥ ..2..

2.15.6_4

yathā . ahaḥ. ca . rātrī . ca . na . bibhītaḥ . na . riṣyataḥ .
eva . me. prāṇa . mā. bibheḥ .. 2..

2.15.6_5

ahaśca rātrī ca ahorātrau kalpāntasthāyitvād yathā na bibhītaḥ na riṣyataḥ . evā ma ityādi pūrvavat . evaṃ sarveṣvapi paryāyeṣu yojyam . rātrīti . 'rātreścājasau' (pā 4, 1,31) iti ṅīp .
yathā sūryaśca candraśca na bibhīto na riṣyataḥ .
evā me prāṇa mā bibheḥ ..3..

2.15.6_6

yathā . sūryaḥ . ca . candraḥ . ca . na bibhītaḥ . na . riṣyataḥ .
eva . me . prāṇa . mā . bibheḥ .. 3..

2.15.6_7

spaṣṭo'rthaḥ.
yathā brahma ca kṣatraṃ ca na bibhīto na riṣyataḥ .
evā me prāṇa mā bibheḥ ..4..

2.15.6_8

yathā . brahma . ca . kṣatram . ca . na . bibhītaḥ . na . riṣyataḥ .
eva . me . prāṇa . mā . bibheḥ .. 4 ..

2.15.6_9

brahma brāhmaṇajātiḥ kṣatram kṣatriyajātiḥ. jāternityatvābhyupagamāt bhītyādyabhāvaḥ.
yathā satyaṃ cānṛtaṃ ca na bibhīto na riṣyataḥ .
evā me prāṇa mā bibheḥ ..5..

2.15.6_10

yathā . satyam . ca . anṛtam . ca . na . bibhītaḥ . na . riṣyataḥ .
eva . me . prāṇa . mā . bibheḥ .. 5..

2.15.6_11

satyam yathārthabhāṣaṇam . anṛtam mithyābhāṣaṇam . lokavyavahārasya pravāhanityatvāt satyānṛtayorapi bhītyādyabhāvaḥ. tadabhimānidevatāpekṣayā vā.
yathā bhūtaṃ ca bhavyaṃ ca na bibhīto na riṣyataḥ .
evā me prāṇa mā bibheḥ ..6..

2.15.6_12

yathā . bhūtam . ca . bhavyam . ca . na . bibhītaḥ . na . riṣyataḥ .
eva . me . prāṇa . mā . bibheḥ .. 6..

2.15.6_13

bhūtam sattāṃ prāptaṃ vastujātam . bhavyam bhaviṣyad utpatsyamānaṃ vastujātam . pūrvavad anayorapi pravāhanityatvena bhītyādyabhāvaḥ . 'bhavyageya' (pā 3,4,68) ityādinā bhavateḥ kartari yatpratyayānto nipātitaḥ.
iti dvitīye kāṇḍe tṛtīye'nuvāke pañcamaṃ sūktam .