Pramāṇa · Search · About · API

Atharvaveda 2.18: sūktaṃ 2.18

Atharvaveda 2.18

Language
Sanskrit

sūktaṃ 2.18

2.18.1

bhrātṛvyakṣayaṇamasi bhrātṛvyacātanaṃ me dāḥ svāhā ..1..

2.18.2

sapatnakṣayaṇamasi sapatnacātanaṃ me dāḥ svāhā ..2..

2.18.3

arāyakṣayaṇamasyarāyacātanaṃ me dāḥ svāhā ..3..

2.18.4

piśācakṣayaṇamasi piśācacātanaṃ me dāḥ svāhā ..4..

2.18.5

sadānvākṣayaṇamasi sadānvācātanaṃ me dāḥ svāhā ..5..

2.18.5_1

caturthe'nuvāke nava sūktāni . tatra 'bhrātṛvyakṣayaṇam' iti prathamasūktena abhicārakarmaṇi śarasamidādhānam kṛṣṇavrīhiyavatilādyāvapanaṃ ca kuryāt (tu. kausū 48,1; 2).
atra 'arāyakṣayaṇam' ityādyāstisraḥ cātanagaṇe ( kausū 8,25 ) paṭhitāḥ . atastasya gaṇasya yatrayatra viniyogastatratatra āsāṃ viniyogo draṣṭavyaḥ.
bhrātṛvyakṣayaṇamasi bhrātṛvyacātanaṃ me dāḥ svāhā ..1..

2.18.5_2

bhrātṛvya'kṣayaṇam . asi . bhrātṛvya'cātanam . me . dāḥ . svāhā .. 1 ..

2.18.5_3

atrāpi homādhārogniḥ saṃbodhyaḥ homadravyaṃ vā . he agne tvaṃ bhrātṛvyakṣayaṇam asi bhrātṛvyaḥ śatruḥ . bhrātṛśabdād 'vyantsapatne' (pā 4,1,145 ) iti vyanpratyayaḥ . tasya kṣayaṇaṃ vināśanam asi . kṣi kṣaye ityasmād bhāve karaṇe vā lyuṭ . ato me mahyaṃ bhrātṛvyacātanam bhrātṛvyanāśanam . cātayatirnāśanakarmā (tu. ni 6,30) ityuktam . dāḥ dehi . svāheti pūrvavad yojyam .
sapatnakṣayaṇamasi sapatnacātanaṃ me dāḥ svāhā ..2..

2.18.5_4

sapatna'kṣayaṇam . asi . sapatna'cātanam . me . dāḥ . svāhā .. 2 ..

2.18.5_5

sapatnaśabdaḥ śatruparyāyaḥ . 'vyantsapatne' (pā 4,1,145 ) iti sūtre sapatnaśabdaḥ sapatnīva sapatna iti ivārthe akārapratyayānto vyākhyātaḥ . yadyapi bhrātṛvyasapatnaśabdau paryāyau tathāpyatra ubhayorapi pṛthagupādānād ātmīyānātmīyarūpeṇa bhedo draṣṭavyaḥ . gatam anyat .
arāyakṣayaṇamasyarāyacātanaṃ me dāḥ svāhā ..3..

2.18.5_6

arāya'kṣayaṇam . asi . arāya'cātanam . me . dāḥ . svāhā ..3..

2.18.5_7

arāyakṣayaṇam arāyāḥ adāyinaḥ dānopalakṣitanikhilaśreyovighnakāriṇaḥ . teṣāṃ kṣayaṇam . rā dāne ityasya nañā bahuvrīhiḥ . anyat pūrvavat .
piśācakṣayaṇamasi piśācacātanaṃ me dāḥ svāhā ..4..

2.18.5_8

piśāca'kṣayaṇam . asi . piśāca'cātanam . me . dāḥ . svāhā .. 4 ..

2.18.5_9

piśācāḥ piśitāśino bhūtaviśeṣāḥ. piśitaṃ māṃsam aśnantīti ‘karmaṇyaṇ' (pā 3,2,1). pṛṣodarādiṣu pāṭhāt piśitāśaśabdayoḥ piśācau ādeśau . gatam anyat .
sadānvākṣayaṇamasi sadānvācātanaṃ me dāḥ svāhā ..5..

2.18.5_10

sadānvā'kṣayaṇam . asi . sadānvā'cātanam . me . dāḥ . svāhā .. 5..

2.18.5_11

sadānvākṣayaṇam sadā nonūyamānā ākrośakāriṇyaḥ piśācyaḥ. sadānvā iti niḥsālasūkte ( a 2,14 ) vyākhyātam .
iti dvitīyakāṇḍe caturthe'nuvāke prathamaṃ sūktam..