Atharvaveda 2.19: sūktaṃ 2.19

Atharvaveda 2.19

Language: Sanskrit

sūktaṃ 2.19

2.19.1

agne yatte tapastena taṃ prati tapa yo'smān dveṣṭi yaṃ vayaṃ dviṣmaḥ ..1..

2.19.2

agne yatte harastena taṃ prati hara yo'smān dveṣṭi yaṃ vayaṃ dviṣmaḥ ..2..

2.19.3

agne yatte'rcistena taṃ pratyarca yo'smān dveṣṭi yaṃ vayaṃ dviṣmaḥ ..3..

2.19.4

agne yatte śocistena taṃ prati śoca yo'smān dveṣṭi yaṃ vayaṃ dviṣmaḥ ..4..

2.19.5

agne yatte tejastena tamatejasaṃ kṛṇu yo'smān dveṣṭi yaṃ vayaṃ dviṣmaḥ ..5..

2.19.5_1

'agne yat te' ityādibhiḥ pañcabhiḥ sūktairabhicārakarmaṇi purastāddhomān ājyena' juhuyāt ( tu. kausū 47,8).
agne yatte tapastena taṃ prati tapa yo'smān dveṣṭi yaṃ vayaṃ dviṣmaḥ ..1..

2.19.5_2

agne . yat . te . tapaḥ . tena . tam . prati . tapa . yaḥ . asmān . dveṣṭi . yam . vayam . dviṣmaḥ .. 1 ..

he agne pṛthivīsthāna te tvadīyaṃ yat tapaḥ saṃtāpanaśaktiḥ tena tapasā tam śatruṃ prati lakṣīkṛtya tapa prajvalito bhava . 'lakṣaṇetthaṃbhūtākhyāna' (pā 1,4,90) ityādinā prateḥ karmapravacanīyasaṃjñā . 'karmapravacanīyayukte” (pā 2,3,8) iti dvitīyā . yadvā karmaṇi dvitīyā . taṃ śatruṃ prati tapa. pratikūlaṃ pratimukhaṃ pratyavayavaṃ vā tapetyarthaḥ . yaḥ śatrurasmān dveṣṭi dveṣaṃ karoti yaṃ ca śatruṃ vayaṃ dviṣmaḥ apriyaṃ kurmaḥ . tam iti pūrveṇa saṃbandhaḥ . anena vyatihāranirdeśena abhicārapratyabhicārayorubhayatrāpi asya mantrasya sāmarthyaṃ darśitaṃ bhavati.
agne yatte harastena taṃ prati hara yo'smān dveṣṭi yaṃ vayaṃ dviṣmaḥ ..2..

2.19.5_4

agne . yat . te . haraḥ . tena . tam . prati . hara . yaḥ 00 .. 2 ..

2.19.5_5

haratīti haraḥ saṃharaṇasāmarthyam . krodhanāmasu pāṭhāt krodho vā . haraterasun . tena harasā tam śatruṃ prati hara saṃhara . gatam anyat .
agne yatte'rcistena taṃ pratyarca yo'smān dveṣṭi yaṃ vayaṃ dviṣmaḥ ..3..

2.19.5_6

agne . yat . te . arciḥ . tena . tam . prati . arca . yaḥ 00 .. 3 ..

2.19.5_7

arcatiratra dhātūnām anekārthatvād dīptyarthaḥ. tena arciṣā taṃ pratyarca pratidagdhuṃ dīpto bhava . uktam anyat.
agne yatte śocistena taṃ prati śoca yo'smān dveṣṭi yaṃ vayaṃ dviṣmaḥ ..4..

2.19.5_8

agne . yat . te . śociḥ . tena . tam . prati . śoca . yaḥ 00 .. 4 ..

2.19.5_9

śociḥ śokajananasāmarthyam . śuca śoke ityasmāt 'arciśucihusṛpichādichardibhya isiḥ' (pāu 2,108 ) iti karaṇe isipratyayaḥ . tena śociṣā taṃ prati śoca śokayuktaṃ kuru .
agne yatte tejastena tamatejasaṃ kṛṇu yo'smān dveṣṭi yaṃ vayaṃ dviṣmaḥ ..5..

2.19.5_10

agne . yat . te . tejaḥ. tena . tam. atejasam . kṛṇu. yaḥ 00 ..5..

2.19.5_11

teja: tīkṣṇaṃ parābhibhavanasāmarthyam . tija niśāne ityasmād asun . tena tejasā tam śatrum atejasaṃ nistejaskaṃ kṛṇu kuru . gatam anyat . yadyapyatra sūkte krameṇa nirdiṣṭāstapoharorciḥśocistejaḥśabdāḥ pañcāpi yāskena jvalannāmasu paṭhitāstathāpi sarveṣām atropādānād uktaprakāreṇa dhātvarthabhedād bhedovagantavyaḥ.
iti caturthe'nuvāke dvitīyaṃ sūktam .