Atharvaveda 20.26: sūktaṃ 20.026
Atharvaveda 20.26
- Language
- Sanskrit
sūktaṃ 20.026
20.26.1
yogeyoge tavastaraṃ vājevāje havāmahe .
sakhāya indramūtaye ..1..
20.26.2
ā ghā gamadyadi śravatsahasriṇībhirūtibhiḥ .
vājebhirupa no havam ..2..
20.26.3
anu pratnasyaukaso huve tuvipratiṃ naram .
yaṃ te pūrvaṃ pitā huve ..3..
20.26.4
yuñjanti bradhnamaruṣaṃ carantaṃ pari tasthuṣaḥ .
rocante rocanā divi ..4..
20.26.5
yuñjanti asya kāmyā harī vipakṣasā rathe .
śoṇā dhṛṣṇū nṛvāhasā ..5..
20.26.6
ketuṃ kṛṇvann aketave peśo maryā apeśase .
samuṣadbhirajāyathāḥ ..6..