Atharvaveda 20.63: sūktaṃ 20.063

Atharvaveda 20.63

imā nu kaṃ bhuvanā sīṣadhāmendraśca viśve ca devāḥ .
yajñaṃ ca nastanvaṃ ca prajāṃ cādityairindraḥ saha cīkḷpāti ..1..

ādityairindraḥ sagaṇo marudbhirasmākaṃ bhūtvavitā tanūnām .
hatvāya devā asurān yadāyan devā devatvamabhirakṣamāṇāḥ ..2..

pratyañcamarkamanayaṃ chacībhirāditsvadhāmiṣirāṃ paryapaśyan .
ayā vājaṃ devahitaṃ sanema madema śatahimāḥ suvīrāḥ ..3..

ya eka idvidayate vasu martāya dāśuṣe .
īśāno apratiṣkuta indro aṅga ..4..

kadā martamarādhasaṃ padā kṣumpamiva sphurat.
kadā naḥ śuśravadgira indro aṅga ..5..

yaściddhi tvā bahubhya ā sutāvām̐ āvivāsati .
ugraṃ tatpatyate śava indro aṅga ..6..

ya indra somapātamo madaḥ śaviṣṭha cetati .
yenā haṃsi nyattriṇaṃ tamīmahe ..7..

yenā daśagvamadhriguṃ vepayantaṃ svarṇaram .
yenā samudramāvithā tamīmahe ..8..

yena sindhuṃ mahīrapo rathāmiva pracodayaḥ .
panthāmṛtasya yātave tamīmahe ..9..