Atharvaveda 20.89: sūktaṃ 20.089
Atharvaveda 20.89
- Language
- Sanskrit
sūktaṃ 20.089
20.89.1
asteva su prataraṃ lāyamasyan bhūṣann iva pra bharā stomamasmai .
vācā viprāstarata vācamaryo ni rāmaya jaritaḥ soma indram ..1..
20.89.2
dohena gāmupa śikṣā sakhāyaṃ pra bodhaya jaritarjāramindram .
kośaṃ na pūrṇaṃ vasunā nyṛṣṭamā cyāvaya maghadeyāya śūram ..2..
20.89.3
kimaṅga tvā maghavan bhojamāhuḥ śiśīhi mā śiśayaṃ tvā śṛṇomi .
apnasvatī mama dhīrastu śakra vasuvidaṃ bhagamindrā bharā naḥ ..3..
20.89.4
tvāṃ janā mamasatyeṣvindra saṃtasthānā vi hvayante samīke .
atrā yujaṃ kṛṇute yo haviṣmān nāsunvatā sakhyaṃ vaṣṭi śūraḥ ..4..
20.89.5
dhanaṃ na spandraṃ bahulaṃ yo asmai tīvrāntsomāmāsunoti prayasvān .
tasmai śatrūntsutukān prātarahno ni svaṣṭrān yuvati hanti vṛtram ..5..
20.89.6
yasmin vayaṃ dadhimā śaṃsamindre yaḥ śiśrāya maghavā kāmamasme .
ārāccitsan bhayatāmasya śatrurnyasmai dyumnā janyā namantām ..6..
20.89.7
ārācchatrumapa bādhasva dūramugro yaḥ śambaḥ puruhūta tena .
asme dhehi yavamadgomadindra kṛdhī dhiyaṃ jaritre vājaratnām ..7..
20.89.8
pra yamantarvṛṣasavāso ajman tīvrāḥ somā bahulāntāsa indram .
nāha dāmānaṃ maghavā ni yaṃsan ni sunvate vahati bhūri vāmam ..8..
20.89.9
uta prahāmatidīvā jayati kṛtamiva śvaghnī vi cinoti kāle .
yo devakāmo na dhanaṃ ruṇaddhi samittaṃ rāyaḥ sṛjati svadhābhiḥ ..9..
20.89.10
gobhiṣṭaremāmatiṃ durevāṃ yavena vā kṣudhaṃ puruhūta viśve .
vayaṃ rājasu prathamā dhanānyariṣṭāso vṛjanībhirjayema ..10..
20.89.11
bṛhaspatirnaḥ pari pātu paścādutottarasmādadharādaghayoḥ .
indraḥ purastāduta madhyato naḥ sakhā sakhibhyo varīyaḥ kṛṇotu ..11..