Pramāṇa · Search · About · API

Atharvaveda 3.24: sūktaṃ 3.24

Atharvaveda 3.24

Language
Sanskrit

sūktaṃ 3.24

3.24.1

payasvatīroṣadhayaḥ payasvan māmakaṃ vacaḥ .
atho payasvatīnāmā bhare'haṃ sahasraśaḥ ..1..

3.24.2

vedāhaṃ payasvantaṃ cakāra dhānyaṃ bahu .
saṃbhṛtvā nāma yo devastaṃ vayaṃ havāmahe yoyo ayajvano gṛhe ..2..

3.24.3

imā yāḥ pañca pradiśo mānavīḥ pañca kṛṣṭayaḥ .
vṛṣṭe śāpaṃ nadīriveha sphātiṃ samāvahān ..3..

3.24.4

udutsaṃ śatadhāraṃ sahasradhāramakṣitam .
evāsmākedaṃ dhānyaṃ sahasradhāramakṣitam ..4..

3.24.5

śatahasta samāhara sahasrahasta saṃ kira .
kṛtasya kāryasya ceha sphātiṃ samāvaha ..5..

3.24.6

tisro mātrā gandharvāṇāṃ catasro gṛhapatnyāḥ .
tāsāṃ yā sphātimattamā tayā tvābhi mṛśāmasi ..6..

3.24.7

upohaśca samūhaśca kṣattārau te prajāpate .
tāvihā vahatāṃ sphātiṃ bahuṃ bhūmānamakṣitam ..7..

Linked texts (1)