Atharvaveda 4.32: sūktaṃ 4.32

Atharvaveda 4.32

4.32
yaste manyo'vidhadvajra sāyaka saha ojaḥ puṣyati viśvamānuṣak.
sāhyāma dāsamāryaṃ tvayā yujā vayaṃ sahaskṛtena sahasā sahasvatā ..1..

manyurindro manyurevāsa devo manyurhotā varuṇo jātavedāḥ .
manyuṃ viśa īḍate mānuṣīryāḥ pahi no manyo tapasā sajoṣāḥ ..2..

abhīhi manyo tavasastavīyān tapasā yujā vi jahi śatrūn .
amitrahā vṛtrahā dasyuhā ca viśvā vasūnyā bharā tvaṃ naḥ ..3..

tvaṃ hi manyo abhibhūtyojāḥ svayaṃbhūrbhāmo abhimātiṣāhaḥ .
viśvacarṣaṇiḥ sahuriḥ sahīyān asmāsvojaḥ pṛtanāsu dhehi ..4..

abhāgaḥ sann apa pareto asmi tava kratvā taviṣasya pracetaḥ .
taṃ tvā manyo akraturjihīḍāhaṃ svā tanūrbaladāvā na ehi ..5..

ayaṃ te asmyupa na ehyarvāṅpratīcīnaḥ sahure viśvadāvan .
manyo vajrinn abhi na ā vavṛtsva hanāva dasyūṃruta bodhyāpeḥ ..6..

abhi prehi dakṣiṇato bhavā no'dhā vṛtrāṇi jaṅghanāva bhūri .
juhomi te dharuṇaṃ madhvo agramubhāvupāṃśu prathamā pibāva ..7..

Linked texts (1)