Atharvaveda 4.33: sūktaṃ 4.33
Atharvaveda 4.33
- Language
- Sanskrit
sūktaṃ 4.33
4.33.1
apa naḥ śośucadaghamagne śuśugdhyā rayim .
apa naḥ śośucadagham ..1..
4.33.2
sukṣetriyā sugātuyā vasūyā ca yajāmahe .
apa naḥ śośucadagham ..2..
4.33.3
pra yadbhandiṣṭha eṣāṃ prāsmākāsaśca sūrayaḥ .
apa naḥ śośucadagham ..3..
4.33.4
pra yatte agne sūrayo jāyemahi pra te vayam .
apa naḥ śośucadagham ..4..
4.33.5
pra yadagneḥ sahasvato viśvato yanti bhānavaḥ .
apa naḥ śośucadagham ..5..
4.33.6
tvaṃ hi viśvatomukha viśvataḥ paribhūrasi .
apa naḥ śośucadagham ..6..
4.33.7
dviṣo no viśvatomukhāti nāveva pāraya .
apa naḥ śośucadagham ..7..
4.33.8
sa naḥ sindhumiva nāvāti parṣa svastaye .
apa naḥ śośucadagham ..8..