Atharvaveda 6.12: sūktaṃ 6.012

Atharvaveda 6.12

Language: Sanskrit

sūktaṃ 6.012

6.12.1

pari dyāmiva sūryo'hīnāṃ janimāgamam .
rātrī jagadivānyaddhaṃsāttenā te vāraye viṣam ..1..

6.12.2

yadbrahmabhiryadṛṣibhiryaddevairviditaṃ purā .
yadbhūtaṃ bhavyamāsanvattenā te vāraye viṣam ..2..

6.12.3

madhvā pṛñce nadyaḥ parvatā girayo madhu .
madhu paruṣṇī śīpālā śamāsne astu śaṃ hṛde ..3..

pari॒ dyāmi̭va॒ sūryo 'hī̭nā॒ṃ jani̭māgamam.
rātrī॒ jaga̭divā॒nyaddha॒ṃsāttenā̭ te vāraye vi॒ṣam ..1..
pari . dyām'iva . sūryaḥ . ahīnām . janima . agamam .
rātrī . jagat'iva . anyat . haṃsāt . tena . te . vāraye . viṣam .. 1 ..

6.12.3_2

sūryo dyāmiva antarikṣamiva ahīnām sarpāṇāṃ janim' kṛtsnaṃ janma sarpakulam ahaṃ paryāgamam' pariprāptavān asmi rātrī jagadiva . 'rātreścājasau' (pā 4,1,31) iti ṅīp . yathā rātriḥ svakīyena tamasā kṛtsnaṃ jagad vyāpnoti evam haṃsāt hanti gacchati vyāpnotīti haṃsa ātmā tasmād anyat kṛtsnaṃ śarīraṃ yad viṣaṃ vyāpnoti he viṣagrasta te tvadīyaṃ tad viṣaṃ tena prasiddhena bhaiṣajyena vāraye nivārayāmi .
yadbra॒hmabhi॒ryadṛṣi̭bhi॒ryadde॒vairvi̭di॒taṃ pu॒rā.
yadbhū॒taṃ bhavya̭māsa॒nvattenā̭ te vāraye vi॒ṣam ..2..
yat . brahma'bhiḥ . yat . ṛṣi'bhiḥ . yat
devaiḥ . viditam . purā .
yat . bhūtam . bhavyam . āsan'vat . tena . te . vāraye . viṣam .. 2 ..

6.12.3_3

yad bhaiṣajyaṃ brahmabhiḥ mantrairbrāhmaṇairvā sādhyaṃ yat ca ṛṣibhiḥ atīndriyārthadarśibhiḥ agastyavasiṣṭhapramukhaiḥ parijñātaṃ yat ca bhaiṣajyaṃ purā purātanakāle devaiḥ indrādibhiḥ viditam jñātaṃ yat ca bhūtam bhūtakālāvacchinnaṃ bhavyam bhāvi bhaviṣyatkālāvacchinnam āsanvat āsyayuktam . tenoccāryamāṇamantrasahitam ityarthaḥ . ‘paddan' (pā 6,1,63 ) ityādinā āsyaśabdasya matau āsan ādeśaḥ . tena sarveṇa bhaiṣajyena te tvaccharīrasthaṃ viṣaṃ vāraye nivārayāmi.
madhvā̭ pṛñce na॒dya̭1॒ḥ parva̭tā gi॒rayo॒ madhṷ.
madhu॒ parṷṣṇī॒ śīpā̭lā॒ śamā॒sne a̭stu॒ śaṃ hṛ॒de ..3..
madhvā . pṛñce . nadyaḥ . parvatāḥ . girayaḥ . madhu .
madhu . paruṣṇī . śīpālā . śam . āsne . astu . śam . hṛde .. 3 ..

6.12.3_4

madhu madhuraṃ viṣaharam amṛtam ā pṛñce ā samantāt tvaccharīre saṃpṛktaṃ karomi . pṛcī saṃparke . nadyaḥ gaṅgādyāḥ parvatāḥ himavadādyā mahāśailāḥ girayaḥ paryantaparvatāśca viṣaharaṃ madhu tvaccharīre āsiñcantu iti viśeṣato viṣaharatvāt prārthyate . paruṣṇī nāma nadī śīpālā śīpālaḥ śaivālaṃ tadyuktā . matvarthīyaḥ akāraḥ . īdṛśī paruṣṇī nāma nadī madhu āsiñcatu . īdṛśaṃ madhu viṣaharam amṛtam āsne āsyāya śam sukhakaram astu . pūrvavad āsyaśabdasya āsan ādeśaḥ. hṛde hṛdayāya ca śam sukhakaram astu .
iti ṣaṣṭhakāṇḍe dvitīyānuvāke prathama sūktam .