Pramāṇa · Search · About · API

Atharvaveda 6.25: sūktaṃ 6.025

Atharvaveda 6.25

Language
Sanskrit

sūktaṃ 6.025

6.25.1

pañca ca yāḥ pañcāśacca saṃyanti manyā abhi .
itastāḥ sarvā naśyantu vākā apacitāmiva ..1..

6.25.2

sapta ca yāḥ saptatiśca saṃyanti graivyā abhi .
itastāḥ sarvā naśyantu vākā apacitāmiva ..2..

6.25.3

nava ca yā navatiśca saṃyanti skandhyā abhi .
itastāḥ sarvā naśyantu vākā apacitāmiva ..3..

6.25.3_1

'pañca ca yāḥ' iti tṛcena gaṇḍamālānivṛttyarthaṃ pañcādhikapañcāśatsaṃkhyākaiḥ sūtroktakāṣṭhaiḥ prajvālanam ityevamādīni karmāṇi kuryāt . sūtritaṃ hi- " 'pañca ca yāḥ' iti pañcapañcāśataṃ paraśūparṇān kāṣṭhairādīpayati . kapāle praśṛtaṃ kāṣṭhenālimpayati' (kausū 30,14, 15) ityādi .
'ava mā pāpman' iti tṛcena sarvarogabhaiṣajyakarmaṇi sūtroktaprakāreṇa tantraṃ kṛtvā aparedyustrīṃstrīn puroḍāśasaṃvartāṃścatuṣpathe avacaret . sūtritaṃ hi- 'ava mā pāpman' iti titauni pūlyānyavasicya apavidhyāparedyustrīṃstrīn puroḍāśasaṃvartāṃścatuṣpathepyavacarati' ( kausū 30, 18) iti .
mahāśāntyādau kriyamāṇe nairṛtakarmaṇi etaṃ tṛcaṃ japan nadītīraṃ gacchet . “ 'ava mā pāpman' iti japannudakam abhigacchet' ( śāṃka 15,6 ) iti hi śāntikalpaḥ.
pañca̭ ca॒ yāḥ pa̭ñcā॒śacca̭ sa॒ṃyanti॒ manyā̭ a॒bhi.

6.25.3_2

i॒tastāḥ sarvā̭ naśyantu vā॒kā a̭pa॒citā̭miva ..1..

6.25.3_3

pañca . ca . yāḥ. pañcāśat . ca . sam'yanti . manyāḥ . abhi .
itaḥ . tāḥ . sarvāḥ . naśyantu . vākāḥ . apacitām'iva .. 1 ..

6.25.3_4

pañca ca pañcāśacca pañcādhikapañcāśatsaṃkhyākā yā gaṇḍamālāḥ manyāḥ galasyordhvabhāge sthitā dhamanīrmanyāśabdavācyā abhi saṃyanti sarvato vyāpnuvanti itaḥ asmāt prayogāt tāḥ tatsaṃkhyākāḥ sarvā gaṇḍamālā naśyantu vinaṣṭā bhavantu . vākāḥ vacanīyā doṣāḥ apacitāmiva pūjitāṃ pativratāṃ striyaṃ prāpya yathā parāhatā naśyanti tathetyarthaḥ .
sa॒pta ca॒ yāḥ sa̭pta॒tiśca̭ sa॒ṃyanti॒ graivyā̭ a॒bhi.
i॒tastāḥ sarvā̭ naśyantu vā॒kā a̭pa॒citā̭miva ..2..

6.25.3_5

sapta. ca . yāḥ . saptatiḥ . ca . sam'yanti . graivyāḥ . abhi .
itaḥ . tāḥ . sarvāḥ . naśyantu . vākāḥ . apacitām'iva .. 2 ..

6.25.3_6

saptādhikasaptatisaṃkhyākā yā gaṇḍamālāḥ graivyāḥ grīvāsu bhavā nāḍīḥ abhi saṃyanti abhito vyāpnuvanti . anyad vyākhyātam .
nava̭ ca॒ yā na̭va॒tiśca̭ sa॒ṃyanti॒ skandhyā̭ a॒bhi.
i॒tastāḥ sarvā̭ naśyantu vā॒kā a̭pa॒citā̭miva ..3..

6.25.3_7

nava . ca . yāḥ . navatiḥ . ca . sam'yanti . skandhyāḥ . abhi .
itaḥ . tāḥ . sarvāḥ . naśyantu . vākāḥ . apacitām'iva .. 3 ..

6.25.3_8

navottaranavatisaṃkhyākā yā gaṇḍamālāḥ skandhyāḥ . grīvābhyo'dhaḥpradeśaḥ skandhaḥ . tatra bhavā dhamanīḥ abhisaṃyanti abhito vyāpnuvanti . śeṣam uktārtham .