Apocryphal hymns of the Rigveda (Khilas) 5.7
Ṛgvedakhilāni 5.7
- Language
- Sanskrit
Contents
- 5.7.4 — 5 parts
5.7.1
hotā yakṣad agnim samidhā suṣamidhā samiddham nābhā pṛthivyās saṃgathe vāmasya./ varṣmam diva iḍas pade vetv ājyasya hotar yaja./
hotā yakṣat tanūnapātam aditer garbham bhuvanasya gopām./
madhvā adya devo devebhyo deva yānān patho anaktu vetv ājyasya hotar yaja./
hotā yakṣan narāśaṃsam nṛśastam nṝmḥ praṇetram./ gobhir vapāvān syād vīraiś śaktīvān rathaiḥ prathamayāvā hiraṇyaiś candrī vetv ājyasya hotar yaja./
hotā yakṣad agnim iḍa īḍito devo devam āvakṣad dūto havyavāḍ amūraḥ./ upa imam yajñam upa imām devo deva hūtim avatu vetv ājyasya hotar yaja./
hotā yakad barhis suṣṭarīma ūrṇa ṃradā asmin yajñe vi ca pra ca prathām svāsastham devebhyaḥ./ ā īm enad adya vasavo rudrā ādityās sadantu priyam indrasya astu vetv ājyasya hotar yaja./
hotā yakṣad dura ṛṣvāḥ kavaṣyo koṣa dhāvanīr ud ātābhir jihatām viprakṣobhiś śrayantām./ suprāyaṇā asmin yajñe viśrayantām ṛtā vṛdho vyantv ājyasya hotar yaja./19
hotā yakṣad uṣāsā naktā bṛhatī spueśasā nṝmḥ patibhyo yonim kṛṇvāne./ saṃsmayamāne indreṇa devair ā idam barhis sīdatām vītām ājyasya hotar yaja./
hotā yakṣad daivyā hotārā mandrā potārā kavī pracetasā./ sviṣṭam adya anyāḥ karad iṣā svabhigūrtam anya ūrjā svatavasā imam yajñam divi deveṣu dhattām vītām ājyasya hotar yaja./
hotā yakṣat tisro devīr apasām apastamā achidram adya idam apas tanvatām./
hotā yakṣat tvaṣṭāram aciṣṭam apākam retodhām viśva vasam yaśodhām./ puru rūpam akāma karśanam supoṣaḥ poṣais syāt suvīro vīrair vetv ājyasya hotar yaja./
hotā yakṣad vanaspatim upa avasrakṣad dhiyo joṣṭāram śaśaman naraḥ./ svadāt svadhitir ṛtuthā adya devo devebhyo havyāvāḍ vetv ājyasya hotar yaja./
hotā yakṣad agnim svājā ājyasya svāhā medasas svāhā stokānām svāhā svāhā kṛtīnām svāhā havya sūktīnām./ svāhā devā ājyapā juṣāṇā agna ājyasya vyantu hotar yaja.//20
5.7.2
ajaid agnir asanad vājan ni devo devebhyo havyavāṭ./ prāñjobhir hinvāno dhenābhiḥ kalpamāno yajñasya āyuḥ./ pratirann upapreṣa hotar havyā devebhyaḥ./
hotā yakṣad agnim ājyasya juṣatām havir hotar yaja./
hotā yakṣat somam ājyasya juṣatām havir hotar yaja./
hotā yakṣad agnī ṣomau chāgasya vapāyā medaso juṣetām havir hotar yaja./
hotā yakṣad agnī ṣomau puroḍāśasya juṣetām havir hotar yaja./ RvKh_5.7.2f: hotā yakṣad agnī ṣomau chāgasya haviṣa āttām adya madhyato meda udbhṛtam purā deveṣobhyaḥ purā pauruṣeyyā gṛbho ghastām nūnam ghāe ajrāṇām yavasa prathamānām sumatkṣarāṇām śata rudriyānām agniṣvāttānām pīva upavasanānām pārśvataś śroṇitaś śitāmata utsādato aṅgād aṅgād avattānām karata eva agnī ṣomau juṣetām ahvir hotar yaja.//21
devebhyo vanapate havīṃṣi hiraṇya parṇa pradivas te artham./ pradakṣiṇid raśanayā niyūya ṛtasya vakṣi pathibhī rajiṣṭhaiḥ./
hotā yakṣad vanaspatim abhi hi piṣṭatamayā rabhiṣṭayā raśanayā adhita./ yatra agner ājyasya haviṣaḥ priyā dhāmāni yatra somasya ājyasya haviṣaḥ priyā dhāmāni yatra agnīṣ omayoś chāgasya haviṣaḥ priyā dhāmāni yatrā vanaspateḥ priyā pāthāṃsi yatra devānām ājyapānām priyā dhāmāni yatra agner hotuḥ priyā dhāmāni tatra etam prastuty eva upastuty eva upāvasrakṣad rabhīyām sam iva kṛtvī karad evam devo vanaspatir juṣatām havir hotar yaja./
vanaspate raśanayā niyūya piṣṭatamayā vayunāni vidvān./ vahā devatrā dadhiṣo havīṃṣi pra ca dātāram amṛteṣu vocaḥ./
hotā yakṣad agnim sviṣṭakṛtam ayād agnir agner ājyasya haviṣaḥ priyā dhāmāny ayāṭ somasya ājyasya haviṣaḥ priyā dhāmāny ayāḍ agnī ṣomayoś chāgasya haviṣaḥ priyā dhāmāny ayāḍ vanaspateḥ priyā pāthāṃsy ayāḍ devānām ājyapānām priyā dhāmāni yakṣad agner hotuḥ priyā dhāmāni yakṣat svam mahimānam āyajatām ejyā iṣaḥ kṛṇotu so adhvarā jātavedā juṣatām havir hotar yaja./
agnim adya hotāram avṛṇītāyam yajamānaḥ pacan paktīḥ pacan puroḍāśam gṛhṇann agnaya ājyam gṛhṇan somāyājyam badhnann agnī ṣomābhyām chāgam sūpasthādya devo nanaspatir abhavad agnaya ājyena somāyājyena agnī ṣomābhyām chāgena āghattām tam medastaḥ prati pacata agrabhīṣṭām avīvṛdhetām puroḍāśena tvām adya ṛṣa ārṣeya ṛṣīṇām napād avṛṇītāyām yajamāno bahubhya ā saṃgatebhyaḥ./ eṣa me deveṣu vasu vāry āyakṣyata iti tā yā devā deva dānāny adus tāny asmā ā ca śāssvā ca gurasva iṣitaś ca hotar asi bhadra vācyāya preṣito mānuṣas sūkta vākāya sūktā brūhi.//22
5.7.3
devam barhis sudevam devais syāt suvīram vīrair vastor vṛjyeta aktoḥ prabhriyeta aty anyān rāyā barhiṣmato madema vasuvane vasudheyasya vetu yaja./
devīr dvāras saṃghāte vīḍvīr yāman śithirā dhruvā deva hūtau vatsa īm enās taruṇā āmimīyāt kumāro vā nava jāto mā enā arvā reṇuka kāṭaḥ praṇag vasuvane vasudheyasya vyantu yaja./
devī uṣāsā naktā vy asmin yajñe prayaty ahvetām api nūnam daivīr viśaḥ prāyāsiṣṭhām suprīte sudhite vasuvane vasudheyasya vītām yaja./
devī joṣṭrī vasudhitī yayor anya aghā dveṣāṃsi yūyavad ānyāvakṣad vasu vāryāṇi yajamānāya vasuvane vasudheyasya vītām yaja./
devī ūrja āhutī iṣam ūrjam anyāvakṣat sagdhim sapītim anyā mavena pūrvam dayamānā syāma purāṇena navam tām ūrjam ūrja āhutī ūrjayamāne adhātām vasuvane vasudheyasya vītām yaja.//23
devā daivyā hotārā potārā neṣṭārā hata agha śaṃsāv ābharad vasū vasuvane vasudheyasya vītām yaja./
devīs tisras tisro devīr iḍā sarasvatī bhāratī dyām bhāraty ādityair aspṛkṣat sarasvatī imam rudrair yajñam āvīd iha eva iḍayā vasumatyā sadhamādam madema vasuvane vasudheyasya vyantu yaja./
devo narāśaṃsas triśīrṣā ṣaḍakṣaś śatam id enam śiti pṛṣṭhā ādadhati sahasram īm pravahanti mitrā varuṇa id asya hotram arhato bṛhaspati stotram aśvinā ādhvaryavam vasuvane vasudheyasya vetu yaja./
devo vanaspatir varṣa prāvā ghṛta nirṇig dyām agreṇa aspṛkṣad āntarikṣam madhyena aprāḥ pṛthivīm upareṇa adṛṃhīd vasuvane vasudheyasya vetu yaja./
devam barhir vāritīnām nidhedhāsi pracyutīnām apracyutam nikāma dharaṇam puru spārham yaśasvad enā barhiṣāṇyā barhīṃṣy abhiṣyāma vasuvane vasudheyasya vetu yaja./
devo agnis sviṣṭakṛt sudraviṇā mandraḥ kavis satya manma āyājī hotā hotur hotur āyajīvān agne yān devān ayāḍ yām apiprer ye te hotre amatsata./ tām sasanuṣīm hotrān devaṃgamām divi deveṣu yajñam eraya imam sviṣṭakṛc ca agne hotā abhūr vasuvane vasudheyasya namovāke vīhi yaja.//
5.7.4.24
hotā yakṣad indram harivām indro dhānā attu pūṣaṇvān karambham sarasvatīvān bhāratīvān parivāpa indrasya apūpo mitrā varuṇayoḥ payasyā prātas sāvasya puroḍāśām indraḥ prasthitām juṣāṇo vetu hotar yaja.//24
5.7.4.25
hotā yakṣad indram harivān indro dhānā attu pūṣaṇvān karambham sarasvatīvān bhāratīvān parivāpa indrasya apūpo mādhyaṃdinasya savanasya puroḍāśām indraḥ prasthitām juṣāṇo vetu hotar yaja./
hotā yakṣad indram harivān indro dhānā attu pūṣaṇvān karambham sarasvatīvān bhāratīvān parivāpa indrasya apūpas tṛtīyasya savanasya puroḍāśām indraḥ prasthitam juṣāṇo vetu hotar yaja./
hotā yakṣad agniḥ puroḍāśānām juṣatām havir hotar yaja./
hotā yakṣad vāyum agregām agreyāvānam agre somasya pātāram karad evam vāyur āvasā gamaj juṣatām vetu pibatu somam hotar yaja.//25
5.7.4.26
hotā yakṣad indra vāyū arhantā rihāṇā gavyābhir gomantā bhriyantām vīrasyā śukrayā enayor niyuto go agrayāṇām vīrau kaśā aśva purastāt tāsām iha prayāṇam āstika vimocanam karata eva indra vāyū juṣetām vītām pibatām somam hotar yaja./
hotā yakṣan mitrā varuṇā sukṣattrā riśādasā ni cin miṣantā nicirā nicayyāṃsākṣṇaś cid gātu vittara anulbaṇena cakṣasā ṛtam ṛtam iti dīdhyānā karata evam mitrā varuṇā juṣetām vītām pibetām somam hotar yaja./
hotā yakṣad aśvinā nāsatyā dīdyagnī rudra vartanī ny antareṇa cakreṇa ca vāmīr iṣa ūrja āvahatam suvīrās sanutareṇa anaruṣo bādhetām madhukaśayā imam yajñam yuvānā mimikṣatām karata eva aśvinā juṣetām vītām pibetām soma hotar yaja./
hotā yakṣad indram prātaḥ prātas sāvasy arvāvato gamad ā parāvata ā uror antarikṣād ā svāt sadhasthād ime asmai śukrā madhu ścutaḥ prashitā indrāya somās tām juṣatām vetu pibatu somam hotar yaja.
hotā yakṣad indram mādhyaṃdinasya savanasya niṣkevalyasya bhāgasya attāram pātāram śrotāram havam āgantāram asyā dhiyo vitāram sunvato yajamānasya vṛdham obhā kukṣi pṛṇatām vārtraghnam ca māhgonam ca ime asmai śukrā manthinaḥ prasthitā indrāya somās tām juṣaṭām vetu pibatu somam hotar yaja.//26
5.7.4.27
hotā yakṣad indram tṛtīyasya savanasya ṛbhumato vibhumato vājavato bṛhaspativato viśvadevyāvatas sam asya madāḥ prātastanāgmata sam mādhyaṃdinās samidātanās teṣām samukṣitānām gaura iva pragāhyā vṛṣāyasvāyūyā bāhubhyām upayāhi haribhyām prapruthyā śipre niṣpṛthya ṛjīṣinn ime asmai tīvrā āśīrvantaḥ prasthitā indrāya somās tām juṣatām vetu pibatu somam hotar yaja./
hotā yakṣad indram marutvantam indro marutvān juṣatām vetu pibatu somam hotar yaja./
hotā yakṣad ādityān priyān priya dhāmnaḥ priya vratān mahas svasarasya patīn uror antarikṣasya adhyakṣān svādityam.|.avocat tad asmai sunvate yajamānāya karann evam ādityā juṣantām mandantām vyantu pibantu mandantu somam hotar yaja./
hotā yakṣad devam savitāram parāmīvān sāviṣat parāgha śaṃsam susāvitram asāviṣat tad asmai sunvate yajamānāya karad evam devas savitā juṣatām mandatām vetu pibatu somam hotar yaja./
agnim adya hotāram avṛṇītāyam sunvan yajamānaḥ pacan paktīḥ pacan puroḍāśān gṛhṇann agnaya ājyam gṛhṇan somā yājyam badhnann aṅgaye chāgam sunvann indrāya soma bhṛjja haribhyām dhānās sūpasthā adya devo vanaspatir abhavad agnaye ājyena somāyājyena agnaye chāgena indrāya somena haribhyām dhānābhir aghattam./ medastaḥ prati pacata agrabhīd avīvṛdhata puroḍāśair apād indras somam gavāśiram yavāśiram tīvra antam bahula madhyam upa utthā madā vyaśrod vimadām ānaḍ avīvṛdhata aṅgūṣais tvām adya ṛṣa ārṣeya ṛṣīṇām napād avṛṇīta āyan sunvan yajamāno bahubhya āsaṃgatebhyaḥ./ eṣa me deveṣu vasu vāry āyakṣyata iti tā yā devā deva dānāny adus tāny asmā ā ca śāssvā ca gurasva iṣitaś ca hotar asi bhadra vācyāya preṣito mānuṣas sūkta vākāya sūktā brūhi.//27
5.7.4.28
dhānā somānām indrādd hi ca piba ca babdhān te harī dhānā upa ṛjīṣam jighratām ā ratha carṣaṇe siñcasva yat tvā pṛcchād viṣam patnīḥ kva amīmadathā ity asmin sunvati yajamāne tasmai kim arāsthāḥ./ suṣṭhu suvīryam yajñasya agura udṛcam yad yad acīkamata ut tat tathā abhūdd hotar yaja./
iha mada eva maghavann indra te śvo vasumato rudravato ādityavata ṛbhumato vibhumato vājavato bṛhaspativato viśvadevyāvataś śvassutyām agnim indrāya indra agnibhyām prabrūhi./ mitra varuṇābhyām vasubhyo rudrebhyo ādityebhyo viśvebhyo devebhyo brahmaṇebhyas somyebhyas somapebhyo brahman vācam yaccha./
hotā yakṣad aśvinā somānām tiro ahnyānām trir ā vartir yātām trir aha mānayethām uto turīyam nāsatyā vājināya devāḥ./ sajūr agni rohid aśvo ghṛtasnuḥ./ sajūr uṣā arūṣebhiḥ./sajūs sūrya etaśebhiḥ./sajoṣasāv aśvinā daṃsobhiḥ karata eva aśvinā juṣetām mandetām vītām pibetām somam hotar yaja.//28
5.7.5
hotā yakṣad indram hotrāt sajūr divā pṛthivyā ṛtunā somam pibatu hotar yaja./
hotā yakṣan marutaḥ potrāt suṣṭubhas svarkā ṛtunā somam pibantu potar yaja./
hotā yakṣad grāvo neṣṭrāt tvaṣṭā sujanimā sajūr devānām patnībhir ṛtunā somam pibatu neṣṭar yaja./
hotā yakṣad agnim āgnīdhrād ṛtunā somam pibatv agnīd yaja./
hotā yakṣad indram brahmāṇam brahmaṇād ṛtunā somam pibatu brahman yaja./
hotā yakṣan mitrā varuṇā praśāstārau praśāstrād ṛtunā somam pibatām praśāstar yaja./29
hotā yakṣad devam draviṇodām hotrād ṛtubhis somam pibatu hotar yaja./
hotā yakṣad devam draviṇodām potrād ṛtubhis somam pibatu potar yaja./
hotā yakṣad devam draviṇodām neṣṭrād ṛtubhis somam pibatu neṣṭar yaja./
hotā yakṣad devam draviṇodām apād hotrād apāt potrād apān neṣṭrāt turīyam pātram amṛktam amartyam indra pānam devo draviṇodāḥ pibatu drāviṇodasaḥ./ svayam āyūyās svayam abhigūryāḥ./ svayam abhigūrtayā hotrāya ṛtubhis somasya pibatv acchāvāka yaja./
hotā yakṣad aśvinā adhvaryū ādhvaryavād ṛtunā somam pibetām adhvaryū yajatām./
hotā yakṣad agnim gṛhapatim gārhapatyāt sugṛhapatis tv adha agne yām sunvan yajamānas syāt sugṛhapatis tvam anena sunvatā yajamānas syās sugṛhapatis tvam anena sunvatā yajamānena agnir gṛhapatir gārhapatyād ṛtunā somam pibatu gṛhapate yaja.//30//RvKh_(Kuntāpa adhyāya)VIII-XXII:
Linked texts (1)
- Taittirīyabrāhmaṇa — Sanskrit