Pramāṇa · Search · About · API

Cittiprapathaka 45

Cittiprapāṭhaka 45

Language
Sanskrit

45.1

ṛ̱tava̍ḥ(1), hi śira̍ḥ(2), sa̱rva̱pṛ̱ṣṭhe pravṛ̍ṇakti(3),
a̱gnipa̍cyamāna̱mityā̍ha(4), ga̱tetyā̍ha(5), śā̱ra̱dāve̱vāsmā̍ ṛ̱tū ka̍lpayati(6), rundhe̍(7), ka̱vīnāmityā̍ha(8), prā̱ṇāḥ(9), pra̱ti̍dadhāti(10), bhavanti(11),
vācayati, catvā̱ri̍ ca(12), || anu0 6
atha saptamo'nuvākaḥ
(1)de̱vasya̍ tvā savi̱tuḥ pra̍sa̱va iti̍ raśa̱nāmāda̍tte
prasū̍tyai | a̱śvino̍rbā̱hubhyā̱mityā̍ha | a̱śvinau̱ hi de̱vānā̍madhva̱ryū āstā̍m | pū̱ṣṇo hastā̍bhyā̱mityā̍ha yatyai̍(1)
(2)āda̱de'di̍tyai̱ rāsnā̍sī̱tyā̍ha yaju̍ṣkṛtyai(2) | (3)i̱ḍa
ehyadi̍ta̱ ehi̱ sara̍svatyehītyā̍ha | e̱tāni̱ vā aśva̍syai de̱vanā̍mā̱ni | de̱vanā̍ma̱aire̱vaināmāhva̍yati(3) | (4)a̱sāvehyasāvehyasāvehītyā̍ha | e̱tāni̱ vā aśva̍syai manu̱ṣya̍nāmā̱ni

45.2

ma̱nu̱ṣya̍nā̱maire̱vainā̱māhva̍yati(4) | (5)ṣaṭ sampa̍dyante
ṣaḍvarta̱vaḥ | ṛ̱tubhi̱re̱vainā̱māhva̍yati(5) | (6)a̱di̍tyā u̱ṣṇīṣa̍masītyā̍ha | yathā̱ yaju̱re̱vaitat(6) | (7)
vā̱yure̍syai̱ḍa ityā̍ha | vā̱yude̍va̱tyo̱ vai va̱tsaḥ(7) | (8)pū̱ṣā tvā̱pāva̍sṛja̱tvityā̍ha | pau̱ṣṇā vai de̱vata̍yā pa̱śava̍ḥ

45.3

svayai̱vaina̍ṃ de̱vata̍yā̱pāva̍sṛjati(8) | (9)a̱śvibhyā̍ṃ pra̱dā̍payetyā̍ha | a̱śvinau̱ vai de̱vānā̍ṃ bhi̱ṣajau̍ | tābhyā̍me̱vāsmai̍ bheṣa̱jaṃ ka̍roti(9) | (10)yaste̱ stana̍ḥ śaśa̱ya ityā̍ha | stautye̱vainā̍ṃ(10) | (11)u̱sraṃ gha̱rmam̐ śi̍m̐ṣā̱sraṃ
gha̱rmaṃ pā̍hi gha̱rmāya̍ śim̐ṣetyā̍ha | yathā̍ brū̱yāda̱muṣmai̍
de̱hīti̍ | tā̱dṛge̱va tat(11) | (12)bṛha̱spati̍stvā̱pa̍sīda̱tvityā̍ha

45.4

brahma̱ vai de̱vānā̱ṃ bṛha̱spati̍ḥ | brahma̍ṇai̱vainā̱mupa̍sīdati(12) | (13)dāna̍va stha pe̱rava̱ ityā̍ha | me̱dhyā̍ne̱vainā̍n karoti(13) | (14)vi̱ṣa̱gṭa̱to lohi̍te̱netyā̍ha
vyāvṛ̍ttyai(14) | (15)a̱śvibhyā̍ṃ pinvasva̱ sara̍svatyai pinvasva pū̱ṣṇe pi̍ṃnvasva̱ bṛha̱spata̍ye pinva̱svetyā̍ha | e̱tābhyo hyeṣā de̱vatā̍bhyaḥ pinva̍te(15) | (16)indrā̍ya pinva̱svendrā̍ya pinva̱svetyā̍ha | indra̍me̱va bhā̍ga̱dheye̍na̱ sama̍rddhayati(16) | (17)dirindrā̱yetyā̍ha

45.5

tasmā̱dindro̍ de̱vatā̍nā̱ṃ bhūyi̍ṣṭha̱ bhākta̍maḥ(17)
(18)gāya̱tro'si̱ traiṣṭu̍bho'si̱ jāga̍tamasīti̍ śapho̱paya̍mānāda̍tte | chando̍bhire̱vainā̍nāda̍tte(18) | (19)sa̱horjjā
bhā̱genopa̱mehītyā̍ha | ūrjja̍ e̱vaina̍ṃ bhā̱gama̍kaḥ(19)
(20)a̱śvinau̱ vā e̱tadya̱jñasya̱ śira̍ḥ prati̱dadha̍tāvabrūtāṃ
ā̱vābhyā̍me̱va pūrvā̍bhyā̱ṃ vaṣa̍ṭ kri̱yātā iti̍ | indrā̍śvinā̱ madhu̍naḥ sā̱ra̱ghasyetyā̍ha | a̱śvibhyā̍me̱va pūrvā̍bhyāṃ vaṣa̍ṭ karoti | atho̱ aśvināvèva bhā̱gadhèyè̍na
sama̍rdhayati(20)

45.6

(21)gha̱rmaṃ pā̍ta vasavò yaja̍tā̱ vaḍi̍tyā̍ha | vasū̍nè̱va
bhā̱gadhèyè̍na̱ sama̍rdhayati(21) | (22)yadvaṣa̍ṭ ku̱ryāt | yāta̍yāmāsya vaṣaṭkā̱raḥ syā̍t | yanna vaṣa̍ṭ ku̱ryāt
rakṣā̍m̐si ya̱jñam̐ ha̍nyuḥ | vaḍi̍tyā̍ha | pa̱ròkṣa̍mè̱va vaṣa̍ṭ karòti | nāsya̍ yā̱tayā̍mā vaṣaṭkā̱rò bha̍vati
na ya̱jñam̐ rakṣā̍m̐si ghnanti(22)

45.7

(23)svāhā̍ tvā̱ sūrya̍sya ra̱śmayè̍ vṛṣṭivana̍yè juhòmītyā̍ha | yò vā a̍sya pu̱ṇyò ra̱śmiḥ | sa vṛ̍ṣṭivaniḥ | tasmā̍ è̱vaina̍ṃ juhòti(23) | (24)madhu̍ havi̱rasītyā̍ha | sva̱daya̍tyè̱vaina̍ṃ(24) | (25)sūrya̍sya tapa̍stapètyā̍ha
yathā̱ yaju̍rè̱vaitat(25) | (26)dyāvā̍pṛthi̱vībhyā̍ṃ tvā pari̍gṛhṇāmītyā̍ha | dyāvā̍pṛthi̱vībhyā̍mè̱vaina̱ṃ pari̍gṛhṇāti(26)

45.8

(27)a̱ntari̍kṣeṇa tvopa̍yacchāmītyā̍ha | a̱ntari̍kṣeṇai̱vaina̍mupa̍yacchata | na vā e̱taṃ ma̍nu̱ṣyo̍ bharttumarhati(27)
(28)de̱vānā̍ṃ tvā pitṛ̱ṇāmanu̍mato bha̱rttum̐ śakeyamityā̍ha | de̱vaire̱vaina̍ṃ pitṛ̱bhiranu̍mata ā̱datte(28) | (29)vi vā
e̱name̱tada̍rdhayanti | yat pa̱ścāt pra̱vṛjya̍ pu̱ro juhva̍ti
tejo̍'si tejo'nuprehītyā̍ha | teja̍ e̱vāsmi̍n dadhāti(29) | (30)di̱vispṛ̱ṅmā mā̍ him̐sīrantarikṣaspṛ̱ṅmā
mā̍ him̐sīḥ pṛthivispṛ̱ṅmā mā̍ him̐sī̱rityā̍hāhi̍ṃm̐sāyai(30)

45.9

(31)suva̍rasi suva̍rme yaccha̱ diva̍ṃ yaccha di̱vo mā̍ pāhītyā̍ha | ā̱śiṣa̍me̱vaitāmāśā̍ste(31) | (32)śiro̱ vā
e̱tadya̱jñasya̍ | yat pra̍va̱rgyaḥ | ā̱tmā vā̱yuḥ | u̱dyatya̍vātanāmānyā̍ha | ā̱tmanne̱va ya̱jñasya̱ śiraḥ prati̍dadhāti(32) | (33)ana̍vānaṃ | prā̱ṇānā̱m̐ santa̍tyai(33)
(34)pañcā̍ha

45.10

pāṅkto̍ ya̱jñaḥ | yāvā̍ne̱va ya̱jñaḥ | tasya̱ śira̱ḥ prati̍dadhāti(34) | (35)a̱gnaye̍ tvā vasu̍mate̱ svāhetyā̍ha
a̱sau vā ā̍di̱tyo'gnirvasu̍mān | tasmā̍ e̱vaina̍ṃ juhoti(35) | (36)somā̍ya tvā ru̱drava̍te̱ svāhetyā̍ha
ca̱ndramā̱ vai somo̍ ru̱dravān | tasmā̍ e̱vaina̍ṃ juhoti
varu̍ṇāya tvā''di̱tyava̍te̱ svāhetyā̍ha

45.11

a̱psu vai varu̍ṇa ādi̱tyavān̍ | tasmā̍ e̱vaina̍ṃ juhoti
bṛha̱spata̍ye tvā vi̱śvade̍vyāvate̱ svāhetyā̍ha | brahma̱ vai de̱vānā̱ṃ bṛha̱spati̍ḥ | brahma̍ṇa e̱vaina̍ṃ juhoti(36) | (37)sa̱vi̱tre tva̍rbhumate̍ vi̱bhumate̍ pra̱bhumate̱ vāja̍vate̱ svāhetyā̍ha | saṃvatsa̱ro vai sa̍vita̱rbhumān vi̱bhumān pra̍bhu̱mān
vāja̍vān | tasmā̍ e̱vaina̍ṃ juhoti(37) | (38)ya̱māya̍
tvāṅgi̍rasvate pitṛ̱mate̱ svāhetyā̍ha | prā̱ṇo vai ya̱mo'ṅgi̍rasvān pitṛ̱mān

45.12

tasmā̱ evaina̍ṃ juhoti(38) | (39)e̱tābhya̍ e̱vaina̍ṃ de̱vatā̍bhyo juhoti(39) | (40)daśa̱ sampa̍dyante | daśā̍kṣarā
vi̱rāṭ | anna̍ṃ vi̱rāṭ | vi̱rājaivānnādya̱mava̍rundhe(40)
(41)rauhi̱ṇābhyā̱ṃ vai de̱vāḥ su̍va̱rgaṃ lo̱kamā̍yan | tadrauhi̱ṇayo̍ rauhiṇa̱tvaṃ | yadrau̍hi̱ṇau bha̍va̱taḥ | rauhi̱ṇābhyā̍me̱va tadyaja̍mānaḥ suva̱rgaṃ lo̱kame̍ti(41) || (42)aha̱rjyoti̍ḥ ke̱tunā̍ juṣatā̱m̐ sujyo̍ti̱rjyoti̍ṣā̱m̐ svāhā̱
rātri̱rjyoti̍ḥ ke̱tunā̍ juṣatā̱m̐ sujyo̍ti̱rjyoti̍ṣā̱m̐
svāhetyā̍ha | ā̱dityame̱va tada̱muṣmi̍m̐llo̱ke'hnā̍ pu̱rastā̍ddādhāra | rātriyā avastā̍t | tasmā̍da̱sāvā̍di̱tyo'muṣmi̍m̐llo̱ke'̍horā̱trābhyā̍ṃ dhṛ̱taḥ(42)

Linked texts (5)