Mantrapada 17: atha aṣṭāviṃśaḥ paṭalaḥ
Mantrapāda 17
- Language
- Sanskrit
atha aṣṭāviṃśaḥ paṭalaḥ
17.1
śivamādau namaskṛtya śivamantraṃ ṣaḍakṣaram
vakṣye pañcākṣaraṃ cānyān śaivānmantrāṃśca kṛtsnaśaḥ
17.2
tāraṃ meṣaṃ viṣaṃ sargi śivāyeti ṣaḍakṣaraḥ
tārahīnaḥ sa evāyaṃ mantraḥ pañcākṣaraḥ smṛtaḥ
17.3
viprādibhistrayīyogyaiḥ sevyo mantraḥ ṣaḍakṣaraḥ
strīśūdrādyaistathā vedyo mantraḥ pañcākṣaro bhavet
17.4
asyaiva praṇavasyāne prāsādaṃ viniyojayet
mukhyaḥ ṣaḍakṣaro'yaṃ syāt sarveṣāṃ bhuktimuktidaḥ
17.5
vedāyantaṃ viṣṇuyuktaṃ bindunādasamanvitam
tadbījaṃ śaktipañcamyo dīrghamantre niyojayet
17.6
tāreṇa sampuṭīkṛtya nyāseṣu ca japādiṣu
viprādyaireṣa sevyaiḥ syāt strīśūdrādyairatārakam
17.7
iti
khaṃ sānugrahasargīśaṃ prāsādaṃ syāt sabindukam
śivamantro'pyayaṃ viśvasṛṣṭisthityādikāraṇam
17.8
trividhānāmapi hyeṣāmṛrṣi chando'pi daivatam
nyāsācaṃ viniyogāṃśca samānaṃ guravo viduḥ
17.9
nādākhyaṃ yat paraṃ bījaṃ sarvabhūteṣvavasthitam
muktidaṃ paramaṃ divyaṃ sarvasiddhipradāyakam
17.10
sāntaṃ sarvagataṃ śūnyaṃ mātrādvādaśakasthitam
hrasvā brahmasamākhyātā dīrghā hyaṅgāni ṣaṇmukha!
17.11
ṣaṣṭhaṃ trayodaśāntaṃ ca pañcame viniyojayet
śivaṃ taṃ tu vijānīyānmantramūrtaṃ sadāśivam
17.12
iti
tasmād dīrghaiḥ svaraisteṣāṃ prāsādamyāṅgakalpanā
tatrāpyaśāntameva syādbrahmabhistriṃśaṇi pañca hi
17.13
saprāsādaṣaḍarṇasya hṛdādyaiḥ svākṣaraiḥ saha
bindvantairhṛdayādīni svasvajātyā bhavanti hi
17.14
sarveṣāmapi caiteṣāṃ vāmadevo bhavedṛṣiḥ
paṅktiśchandaḥ śivo daivaṃ sāmānyena prakalpitam
17.15
śivatattvaṃ hi tārasya prāsādasya saśaktikam
pañcabhūtādibhūtāni tanmātrāṇīndriyāṇi ca
17.16
mano buddhirahaṅkāraḥ puruṣaḥ prakṛtistathā
rāgo vidyā kalā kālo niyatistvatha māyayā
17.17
śuddhavidyeśvarau tadvat sādeśaḥ śaktirityapi
saptaiva pañcakānyeṣu pañcārṇeṣu sthitāni hi
17.18
uktād vilomataḥ pañcatriṃśattattvasthitiḥ smṛtā
īśānapuruṣāghoravāmasadyāstu nādayaḥ
17.19
bubhukṣūṇāṃ mumukṣūṇāṃ sadyojātādayaḥ kramāt
śuklaṃ pītaṃ tathā kṛṣṇaṃ dhūmraṃ hemaṃ tathāruṇam
17.20
varṇāni ṣaṇṇāṃ varṇānāṃ vijñeyāni yathākramam
gāyatraṃ caiva gāyatramanuṣṭup triṣṭubhau tathā
17.21
bṛhatī ca virāḍuktā chandāṃsi ca yathākramam
brahmendrarudraharayo brahma skandaśca devatāḥ
17.22
hṛdaye caiva pūrvādivaktreṣu sthānamīritam
pāṇyormukheṣu dehe ca varṇāni kramaśo nyaset
17.23
aṅgamantrāṇi ca punarhṛdādyaṅgeṣu vinyaset
syāt brahmacāriṇāṃ sṛṣṭiḥ sthitiḥ syād gṛhamedhinām
17.24
vanasthānāṃ mumukṣūṇāṃ saṃhāranyāsa īritaḥ
dakṣiṇāṅguṣṭhamārabhya nyased vāmakarasya tu
17.38
pūjādau ca japādau ca ṣaṇṇāvāmantrayaṃtrayan
catvāriṃśatsamāvṛttiḥ pañcārṇasya tu mānasī
17.39
prāṇāyāmo'pi varṇānāṃ dvitrihrāsakramāt smṛtaḥ
sabindunādaṃ prāsādaṃ śatakṛtvo dhiyā japet
17.40
ekārṇānāṃ tathānyeṣāṃ nirdiṣṭaḥ prāṇasaṃyamaḥ
bījaṃ cāṣṭottaraśataṃ tajjapānte japedapi
17.41
nadyāṃ śivālaye tīrthe parvate'bhreśca saṃnidhau
gurusūryendudīpānāṃ sāhasraphalado japaḥ
17.42
apica —
ekastvekaguṇo gehe goṣṭhe daśaguṇo japaḥ
nadyāṃ śataguṇaḥ śambhoḥ
17.43
svayaṃbhuliṅgasānnidhye japo lakṣaguṇaḥ smṛtaḥ
devahradeṣu tīrtheṣu parvatāgre'mbudhestaṭe
17.44
puṇyakṣetrāśramādyeṣu japaḥ koṭiguṇo bhavet
prāgyāmyāpyottarāśāsyo japed vaśyābhicārayoḥ
17.45
pauṣṭike śāntike muktyai prāṅmukho vāpyudaṅmukhaḥ
aṅgulībhiśca rekhābhiḥ putrajīvaiḥ pravālakaiḥ
17.46
sphāṭikaiścaiva padmākṣaiḥ sauvarṇaiśca mauktikaiḥ
kuśānāṃ granthibhiścātha rudrākṣaiśca yathākramam
17.47
ekaikasmād daśaguṇaṃ japan phalamavāpnuyāt
aṅguṣṭhenākṣasūtrasya karṣaṇaṃ mokṣadaṃ smṛtam
17.48
śatrunāśāya tarjanyā śriyai madhyamayā smṛtam
anāmayā kanīyasyā śāntike pauṣṭike smṛtam
17.49
sāṅguṣṭhameva sarvābhiḥ karṣaṇaṃ sarvakāmadam
mantrasādhanādhikāraḥ
śivasya pūjāṃ nirvartya tataḥ kurvan japādikam
17.50
mantraṃ saṃsādhayet siddhyai viniyogāṃstataḥ param
snātvā sandhyāṃ samāpyādau yāgāgāraṃ gataḥ śuciḥ
17.51
maunī sūrya samārādhya samācamyopaviśya tu
ātmaśuddhiṃ vidhāyātha bhasmadigdhastripuṇḍradhṛk
17.52
tilakī candanenātha puṣpāropitamastakaḥ
sāmānyārghyokṣitadvārastena vighnaṃ sarasvatīm
17.53
gaṅgāṃ ca yamunāṃ nandimahākālau yajet kramāt
ūrdhvodumbarake śākhāmadhye dakṣiṇavāmataḥ
17.54
mūle dvāraśriyaṃ cordhve pārṣṇighātatrayeṇa tu
bhaumāṃstāṃstairantarikṣān choṭikābhirdivisthitān
17.55
vighnān nivārya svāstreṇa nārācāstrāt prasūnakam
antaḥ kṣiptvā viśedantarvāmaśākhāmupāśritaiḥ
17.56
dehalyā jvaladastreṇa kusumaṃ vinidhāya tu
svākhyayā brahmavāstvīśau svaṃ cānantāsanaṃ yajet
17.57
maunī tasmin niviṣṭo'tha sakalīkṛtavigrahaḥ
hṛtpadme sve śivajyotirbhūmadhye tu dhiyā tataḥ
17.58
nābhikuṇḍānale hutvā havirbhirdvādaśāntajaiḥ
sati liṅge tu sāmānyamarghyaṃ dattvābhipūjya tu
17.59
nirmālyamapanīyāstrādupacāroktamārgataḥ
saṃkṣālyāśūnyaśirasaṃ śivamāvāhya pūjayet
17.60
ādhāraśaktiṃ vinyasya śuklāṃ kūrmmaśilopari
anantaṃ cāsanībhūtaṃ dharmādīn maṇḍalāni ca
17.61
padmaṃ ca śaktīrvāmādīḥ śivamūrtiṃ ca madhyataḥ
dhyāyet prāsādabījoktāṃ mūrtiṃ vidyāmayīṃ vibhoḥ
17.62
pañcabrahmoktavaktraṃ daśabhujamathavā vedabāhuṃ trinetraṃ
dhūrdhūradhaiḥ dugaṅgaḥ phaṇigaṇavilasatsatkapardaṃ dadhānam
khaṭvāṅgaṃ śūlaśaktī varadabhayaharaṃ dakṣiṇairnoṃbhiranyairnāgaṃ rudrākṣamālāṃ ḍamarukasahitaṃ cotpalaṃ bījapūram
17.63
dhavalavapuṣamabje saṃniviṣṭaṃ trinetraṃ varadamabhayameṇaṃ cāpi ṭaṅkaṃ dadhānam
yugabhujamahigaṅgācandracañcatkapardaṃ bhujacountvalayahāraṃ kṛttivastraṃ prapadye
17.64
prāsādapañcaṣaṭsaptasaptavarṇamanupūjane
mūrtidvayamidaṃ proktaṃ tayorekāṃ samāśrayet
17.65
pañcavaktro daśabhujo daśārṇamya sadāśivaḥ
śaktyā vāmāṅkagatayā manonmanyā samanvitaḥ
17.66
dhyātvā pūjya śivo liṅge niṣkale sakale'tha vā
sthire vā calaliṅge vā kṣaṇike vāpyabhāvataḥ
17.67
kāni tāni kṣaṇikāni
saikataṃ mārttikaṃ paiṣṭaṃ cānnajaṃ phalajaṃ tathā
gandhajaṃ nāvanītaṃ ca gomayaṃ cāṣṭamaṃ smṛtam
17.68
yathopapattyā kṣaṇikaṃ liṅgaṃ kṛtvā savedikam
tasminnāvāhya ceṭṭeśaṃ nirapekṣaṃ visarjayet
17.69
udvāsitaśive liṅge caṇḍamiṣṭvā visṛjya tu
kṣaṇikaṃ pīṭhasahitamagādhāmbhasi nikṣipet
17.70
manasā hṛdayāmbhoje vahnau vā sūryamaṇḍale
jale vā sthaṇḍile vāpi yathāyogaṃ yathāruci
17.71
evaṃ mūrtiṃ samāvāhya vidyādehaṃ ca tadgatam
brahmāṃgaiḥ pañcavedāṣṭatrayodaśakalāṣṭakaiḥ
17.72
īśānapuruṣāghoravāmadevaiḥ kramoditaiḥ
sadyojātena śaktyanto vidyādeho dharādikaiḥ
17.73
śivamūrtīṃśca śaktyantāḥ śuddhavidyāntamāsanam
dhyātvaivamāsanaṃ mūrtiṃ vidyādehaṃ ca sādhakaḥ
17.74
yathopacārapaṭale proktamāvāhayecchivam
sthāpanaṃ saṃnirodhaṃ cāpyavakuṇṭhaṃ prarocanam
17.75
amṛtīkaraṇaṃ ca syādupacāroktamārgataḥ
aṅgāni brahmaṛkṣāṇi tārahṛdbījanāmabhiḥ
17.76
namaḥ svāhā svadhā vauṣaḍ vaṣaḍityasya mastake
puṣpāñjaliṃ samāyojya dhyātvā devaṃ sadāśivam
17.77
bhogāṅgāni tadaṅgebhyo dīpebhya iva dīpakāḥ
samānīyāneleśeśnarakṣovāyudaleṣvatha
17.78
vinyasya netraṃ purataḥ śivāstraṃ digdaleṣvatha
pūjayet tu śivāṅgāni varābhayakarāṇi tu
17.79
tatrāstraṃ jvalanaprakhyaṃ strīrūpaṃ ca caturbhujam
dhyātvaivamekāvaraṇaprāsāde saṃyajecchivam
17.80
pañcākṣarādimantrāṇāṃ pañcāvaraṇasaṃvṛtaḥ
pūjanīyaḥ śivo nityaṃ bhogamokṣaphalecchubhiḥ
17.81
tatrāpyaṅgairbrahmabhiśca prathamāvaraṇaṃ smṛtam
dvitīyaṃ cāṣṭavidyeśairnandīśādyaistṛtīyakam
17.82
caturthamapi lokeśaistadastraiḥ pañcamā vṛtiḥ
tadyathā —
aṅgaiśca brahmabhiścādyaṃ proktamāvaraṇaṃ hi tat
17.83
vidyeśvarān yajedaṣṭau pīṭhaprānte'mbujād bahiḥ
anandasūkṣmau ca śivottamaśca syādekanetraśca śikhaṇḍisaṃjñaḥ
śrīkaṇṭhanāmā ca tatastrimūrtirathe rudro'pi ca digdigvidiksthāḥ
17.84
prācyāṃ nandimahākālau yāmye bhṛṅgivināyakau
17.85
paścime tu vṛṣaskandau devīcaṇḍau tathottare
indrādyairdaśalokaiśaiścaturthāvaraṇaṃ smṛtam
17.86
sthiraliṅgaṃ yadā pūjyaṃ tatra lokādhipāvṛtau
indrāt prācyāṃ tu vṛṣabhaṃ śayānaṃ nāmato yajet
17.87
yamāt paścimato vighnaṃ vīrabhadraṃ ca paścime
mātaraḥ syustayormadhye sapta pūjyāḥ svanāmabhiḥ
17.88
brāhmī māheśvarī caiva kaumārī vaiṣṇavī tathā
vārāhendrī tu cāmuṇḍītyathāsāmagrataḥ punaḥ
17.89
nirṛterdakṣiṇe śāstā tatputraścātha satyakaḥ
prabhā devī dakṣiṇato durgā vāyostu pūrvataḥ
17.90
dhanadāt paścime skandaścaṇḍeśaścaiva gocare
kṣetrapālaṃ ca caṇḍād prāk tāniṣṭvāśvāvṛtiṃ yajet
17.91
vṛṣādyāḥ kṣetrapālāntāḥ pūjyā liṅgaṃ sthiraṃ yadā
na cale sthaṇḍile pūjyāḥ pūjyā vetyapare jaguḥ
17.92
vajraṃ śaktiṃ tathā daṇḍaṃ khaḍgaṃ pāśāṅkuśau gadām
triśūlaṃ padmamityastraiḥ pañcamī tu vṛtirbhavet
17.93
itthaṃ sapañcāvaraṇamiṣṭvā śambhuṃ tathānale
ghṛtenānnena ca tilairhutvānnena baliṃ kṣipet
17.94
yathā -
rudrāścāpyatha mātaro'pi ca gaṇā yakṣāśca pūrvādigāḥ
śarvādyā grahadaityarākṣasavarā nāgāśca madhye tataḥ
nakṣatrāṇi tadantarālavidiśāsvīśādikā rāśayo
viśve kṣetrapatiḥ pradakṣiṇavaśād durgā ca tebhyaḥ kṣipet
17.95
dvitīyamaṇḍale cāpi śakrādyā daśa lokapāḥ
tebhyaśca tadbahiḥ kṣepyo mantreṇānena vai baliḥ
17.96
oṃ vāyasādibhyaḥ samayabhedibhyaḥ ṭha ṭha
balimantrāṃstu saṃhṛtya prāṅgaṇe kṛtamaṇḍale
ye rudrā raudrakarmāṇo raudrasthānanivāsinaḥ
17.97
saumyāścaiva tu ye kecit saumyasthānanivāsinaḥ
mātaro raudrarūpāśca gaṇānāmadhipāśca ye
17.98
sarve suprītamanasaḥ pratigṛhṇantvimaṃ balim
siddhiṃ yacchantu me kṣipraṃ bhayebhyaḥ pāntu māṃ sadā
17.99
tābhyastebhyo nama iti baliṃ nikṣipya,
tato'dbhiḥ pāṇipādaṃ tu prakṣālyācamya vāgyataḥ
pradakṣiṇanamaskārastutimistaṃ prasādya tu
17.100
niveditānnaṃ nirmālyaṃ sati caṇḍe nivedayet
tat kṣipet salile'gnau vā śilpikarmakarādayaḥ
17.101
dāsyo vāpi tadaśnīyustadanye cet pam̐tanti te
yathopacāramārgeṇa cakravartyupacārataḥ
17.102
gītanṛttādivibhavairmanasā cāminanditam
tadagre tu japenmantraṃ japapūjādikaṃ tataḥ
17.103
mantrairguhyātiguhyādyairdevapāde samarpayet
yathā -
guhyātiguhyagoptā tvaṃ gṛhāṇāsmatkṛtaṃ japam
17.104
siddhirbhavati me yena tvatprasādāt tvayi sthi(tam?tā |)
yatkiñcit karma he deva ! sadā sukṛtaduṣkṛtam
17.105
tanme śivapadasthasya huṃ kṣaṃ kṣapaya śaṅkara!
śivo dātā śivo bhoktā śivaḥ sarvamidaṃ jagat
17.106
śivo yajati sarvatra yaḥ śivaḥ so'hameva hi
sāṅgamūlāṅgamitvebhirpayecculukāmbubhiḥ
17.107
athāsya siddhamantrasya viniyogā bhavanti hi
mantraḥ pracyavate vīryād viniyogaṃ vinā yataḥ
17.108
ekādaśajapāt snānaprokṣaṇānnodakādikam
āyurāyogyadaṃ nṛṇāmaghadoṣāpahaṃ ca tat
17.109
dūrvātilājyacchinnānāṃ lakṣahomo'pamṛtyujit
sarvarogagrahakleśaharamāyurvavardhanam
17.110
parvatāgre mahānadyāṃ japāccāyuravāpnuyāt
ādityābhimukho lakṣaṃ japeścāṣṭottaraṃ śatam
17.111
juhvat sājyastilān rogān jayeccāyuśca vindati
śanaiścaradine'śvatthamālabhyāpi japet tathā
17.112
aṣṭottaraśatālabdhamauṣadhaṃ vā lajaṃ pibet
audarairmucyate rogairviṣamanyanmṛtaṃ bhavet
17.113
ādityābhimukhaḥ sthitvā nābhidaghne jale japet
sahasraṃ vā śataṃ nityamāyurārogyavardhanam
17.114
nadyambhaḥpūritaṃ kumbhaṃ yathāvadyutaṃ japet
spṛṣṭvābhiṣekastena syād graharogopamṛtyujit
17.115
svabījasampuṭaṃ kukṣau nyastaṃ śūlādināśanam
brāhmīṃ ghṛtarasaṃ vāpi candrasūryoparāgayoḥ
17.116
āmokṣājjapitaṃ pītvā prajñāśrutadharo bhavet
ārdrākṛṣṇacaturdaśyāṃ tathā kṛṣṇāṣṭamīṣu vā
17.118
grahaṇe viṣvayanayormāsaṃ prāk samupoṣitaḥ
pūjayed bhasmadigdhāṅgaḥ śivaṃ śaktyā japedapi
17.118-2
palaṃ śvetavacācūrṇaṃ kāpelājyaṃ catuṣpalam
mantreṇāyutamālabdhaṃ pītvā sarvajñatāmiyāt
17.119
paurṇamāsyāṃ yadā māghasaṃkrāntiḥ sā sarasvatī
prāk trirātroṣitastasyāṃ śivamabhyarcya yathāvidhe
17.120
japed rātrāvanaśano bhasmadigdho nadītaṭe
prātaḥ snānādikaṃ kṛtvā gavyājyaṃ bhasmamiśritam
17.121
palāśapatragaṃ spṛṣṭvā japitvāṣṭasahasrakam
pītvā tatpañcagavyaṃ vā jñānaṃ prajñāṃ ca vindati
17.122
haṃsavāgīśvarībījaiḥ saṃpuṭaṃ tu ṣaḍakṣaram
lakṣatrayaṃ japed dhyātvā sarvajño nacirād bhavet
17.123
evaṃ ṣaḍakṣaraṃ mantrī haṃsavāgīśvarīyutam
vratyādeśāśano bhaktyā lakṣāṇāṃ daśakāni tu
17.124
japet krameṇāṇimādīn prāpya vidyādharo bhavet
bilvacchāyāgato nityamayutaṃ prajapecchuciḥ
17.125
tatphalaṃ juhuyāt sājyamaṣṭottarasahasrakam
alakṣmīmapakṛṣyātha māsena dhanavān bhavet
17.126
māsau māsāṃśca ṣaḍvābaddhaṃ ya evaṃ juhuyājjapan
saṃpūjayan śivaṃ bhaktyā śriyā sa dhanado bhavet
17.127
palāśakusumaiḥ putraḥ syāddhutestatsamiddhutāt
utpātaśatrubādhānāṃ sadyaḥ śāntirbhaveṣyati
17.128
grahapīḍāsu hutvāṣṭasahasramayutaṃ japet
sādhyaistilairbhavecchāntirduḥsvapne'ṣṭaśataṃ hutāt
17.129
grahaṇe liṅgamabhyarcya dhyātveṣṭamayutaṃ japet
labhate tadbhavaṃ śānti tathā vāyutahomataḥ
17.130
sarvatra liṅgamabhyarcya kuryāt karmāṇi saṃnidhau
ābhicārakaśāntiḥ syāt trisandhye japahomataḥ
17.131
tacca pratisrutaṃ karma śatrumevābhigacchati
viṣaraktasamāsiktaiḥ syād vidveṣo bibhītakaiḥ
17.132
tīkṣṇatailahutāllākṣānniyate hyamaro'pyāreḥ
vāmorulikhitaṃ nāma mantrairvarṇāntaritaṃ kramāt
17.133
niśayā niśi vāmena talenācchādya tajjapet
ākarṣayet striyaṃ dhyāyan pāśākarṣaṇavihvalām
17.134
anenaiva prayogeṇa puṃsāṃ cākarṣaṇaṃ smṛtam
caturdaśīṣu kṛṣṇāsu ṣaṭsu tīre payonidheḥ
17.135
saikataṃ liṅgamabhyarcya nirāhāro'yutaṃ japet
ṣaṭsvevāparasandhyāsu saptamyāmatha maṇḍale
17.136
padmamadhye'bhipūjyeśaṃ tasya dakṣiṇato yajet
vīrabhadraṃ ca vighneśaṃ japāpuṣpaistu mātṛbhiḥ
17.137
japāpuṣpāyutaṃ cāgnau juhuyācca tadagrataḥ
tataḥ sa mātṛbhirvighnaṃ vīrabhadraṃ ca paśyati
17.138
tato'bhīṣṭaṃ varaṃ labdhvā modate devavacciram
bāṇapuṣpāyutairhutvā yuddhe vijayamāpnuyāt
17.139
yaddarṇapuṣpairjuhuyāt taddarṇaṃ labhate'mbare
pāñcagavyaṃ caruṃ prāśnan pañcalakṣaṃ japenmanum
17.140
pātakebhyaśca pāpebhyo mucyate nātra saṃśayaḥ
parvatāgraṃ samāruhya triḥsnāyī vratyabhojanaḥ
17.141
yamaiḥ saniyamairyuktaḥ koṭisaṃkhyaṃ ṣaḍakṣaram
japecca pūjayelliṅgaṃ maunavratadharaḥ śuciḥ
17.142
so'nenaiva śarīreṇa khecaraḥ kāmarūpadhṛk
aṇimādiguṇaiśvaryaṃ labdhvā siddhaiśca sāmaraiḥ
17.143
vandyamāno gaṇaiśaiśca pūjyamānaḥ sa sarvavit
sarvalokābhigāmī syāt sarvān devāṃśca paśyati
17.144
koṭitrayaṃ japedevaṃ yastvasau sādhakottamaḥ
pratyakṣatāmiyāt tasya sahāmbaḥ parameśvaraḥ
17.145
bahunātra kimuktena sāṃbasyeśasya tuṣṭaye
naiteṣāṃ śivamantrāṇāmanyo mantro'sti kaścana
17.146
svavarṇāśramadharmāṇāmānārāṇāṃ ca pālakaḥ
dīkṣito guruṇā mantraṃ sa sādhayitumarhati
17.147
vibhītakakarañjārkasnuhicchāyāṃ na saṃśrayet
palaṇḍulaśunālāmbugṛñjanāni tuṣodakam
17.148
matsyamāṃsāni madyaṃ ca kakubhāṇḍaṃ tathāllupam
kāṃsyāśanaṃ ca śāṅgrāṣṭaṃ nālīśākaṃ silindhrakam
17.149
yātayāmaṃ gatarasaṃ pūtiparyuṣitādikam
ajñānādyaśucispṛṣṭaṃ śāvasūtakabhojanam
17.150
gaiṇānnaṃ gaṇikānnaṃ ca kṣatraviṭśūdrabhojanam
pratilomānulomānā mannāni ca vivarjayet
17.151
adṛṣṭvā cāpyasaṃpūjya liṅgaṃ nādyānna vā pibet
gogurvāgamavedānāṃ śivabhaktadvijanmanām
17.152
sacchātrāṇāṃ ca devānāṃ nindāṃ dūreṇa varjayet
iṣṭāpūrte yathāśakti kurvan nityaṃ jitendriyaḥ
17.153
yathoktaṃ phalamāpnoti mantrairebhistu mānavaḥ
viniyogādhikāraḥ
tāraṃ prasādabījaṃ ca śivāyaiti namontakam
17.154
śivasya mūlamantro'yaṃ saptavarṇo'khilārthadaḥ
prāsādoktāṅgabījānte śikārādyakṣarāṇi tu
17.155
saṃyojya jātiyuktāni tasyāṅgāni bhavanti hi
sānusvāraṃ tu khaṃ netramantro'pi syāt sajātikaiḥ
17.156
dadhīcaścaiva gāyatramṛṣiścchandaśca daivatam
śivaśca sādhanādyaṃ ca viniyogaśca pūrvavat
17.157
satāraḥ śaktibījādiḥ prokto mantraḥ ṣaḍakṣaraḥ
śaivāṣṭākṣara uddiṣṭo dharmakāmārthamokṣadaḥ
17.158
prāsādādisvaṣaḍvarṇaiḥ prāsādoktāṅgapūrvakaiḥ
svasvajātisamāyuktairasyāpyaṅgāni ṣaḍ vi(daḥ?duḥ)
17.159
ṛṣiḥ śilādo bṛhatī chando daivaṃ śivaḥ svayam
asyāpi sādhanādyaṃ tu viniyogāśca pūrvavat
17.160
śaivāṣṭākṣarādhikāraḥ
asyaivāṣṭākṣarasyānte cinmantraṃ yojayed yadā
mantro daśākṣaraḥ śaivaḥ kalpavṛkṣa iveṣṭadaḥ
17.161
sabindukhaṃ bhṛguḥ sargī cinmantro'yaṃ hi kīrtitaḥ
aṣṭākṣaroktānyaṅgāni ṣaḍasyāpi bhavanti hi
17.162
sanatkumāraḥ paṅktiśca pārvatīsahitaḥ śivaḥ
ṛṣyādyāḥ sādhanādyāśca viniyogāḥ puroditāḥ
17.163
ṣaṇmantrāṇāmapi hyeṣāṃ sāmānyaṃ deśiko viduḥ
ṣaḍete hi mahāmantrāḥ mūlamantrāḥ śivasya hi
17.164
naiṣāmasādhyaṃ ko'pyasti puruṣārtho hi vāñchitaḥ
itīme samāsāt samālokya kalpāṃstathā śaivamantrāḥ ṣaḍeva pradhānāḥ
tathā sārabhūtāḥ śrutīnāṃ kṛtīnāṃ hitāyopadiṣṭāḥ samastā viśiṣṭāḥ
Linked texts (1)
- Īśānaśivagurudevapaddhati — Īśānaśivagurudeva, Sanskrit