Mantrapada 22: atha trayastriṃśaḥ paṭalaḥ
Mantrapāda 22
- Language
- Sanskrit
Contents
- 22.132 — 1 part
atha trayastriṃśaḥ paṭalaḥ
22.1
hanmeṣarakte mukhavṛttayukte pālī sadīrgha caraṇāvasānam
tvak cāṣṭavarṇau manurasya bījaṃ rāyāntarasthaṃ cihuraṃ sabindu
22.2
tatsaptamānantamayī tu śaktirādyantago'sya praṇavaḥ pluto'rcaḥ
japyo manuḥ sapraṇavo dvijaiḥ syāt strīśūdrayorapraṇavaḥ sa coktaḥ
22.3
antaḥ padānte munirasya yāmī devyādigāyatramathāsya daivam
chando hi viṣṇuḥ paramātmanāmā syāt pūrvasevā tu kṛte'ṣṭalakṣam
22.4
tretādiṣūktadviguṇādisaṃkhyaṃ pratyarṇamṛṣyādikamucyate'sya
gautamaśca bharadvājo viśvāmitrastataḥ param
jamadagnirvasiṣṭhaśca kāśyapo'tririhāṣṭamaḥ
22.5
agastyaśca kramādete varṇānāṃ samudīritāḥ
gāyatryuṣṇiganuṣṭup ca bṛhatī paktireva ca
22.6
triṣṭubjagatyau ca virāṭ cchandāṃsyaṣṭau yathākramam
dharo dhruvastathā soma āpo'gnirvāyureva ca
22.7
pratyūṣaśca prabhāsaśca varṇānāṃ devatāḥ smṛtāḥ
sapta bhūrādayo lokā viṣṇulokastathāṣṭamaḥ
22.8
lokāḥ syuraṣṭau varṇānāṃ varṇānyapi vadāmyaham
śuklaṃ svarṇanibhaṃ kṛṣṇaṃ saṃraktaṃ kuṅkumaprabham
22.9
padmakiñjalkanīlābhe sarvavarṇamihāṣṭamam
gandhādipañcatanmātrā mano buddhirahaṅkṛtiḥ
22.10
aṣṭākṣarāṇāṃ tattvāni kathitāni yathākramam
ṣaṣṭhādyayorudāttatvāt svarito'ntyadvitīyayoḥ
22.11
pracayastricaturthābhyāṃ nibhṛtaḥ pañcamākṣaraḥ
kruddho mahāvīrapade hyuśabdaḥ sahasra ityuktapadena yuktāḥ
22.12
svairjātibhistāni yathā caturthyā pañcaivamaṅgāni bhavanti yuktyā
durgāgaṇeśau guruvainateyau vahnayādikoṇeṣu bhavanti devāḥ
22.13
śakrādiṣu kṣetrapatiḥ svanāmnā digbandhane choṭikayā vidheyāḥ
nyāsaḥ purastāt karayośca dehe pañcāṅgavinyāsavidhiśca teṣām
22.14
sṛṣṭiḥ sthitiḥ saṃharaṇaṃ ca bhedāḥ syurbrahmacāriprabhṛtitrayāṇām
astreṇa saṃśodhya karau svavarṇaistarjādikaṃ dakṣiṇato'tha vāme
22.15
nyasyet tu tarjyantamathāṅgamantrān jyeṣṭhādikaṃ vāmakare tadantam
varṇāṅgamantrobhayatastu tāraḥ syānmadhyaparvasviha varṇamantrān
22.16
ādyantaparvasvapi tārameva nyasyet samastāṅguliṣu krameṇa
uktakramāt saṃhṛtaye vilomanyāsaḥ smṛto'tha sthitaye tu pāṇyoḥ
22.17
tarjādikaṃ cāpi kaniṣṭhikāntaṃ jyeṣṭhādyamaṅgeṣu kaniṣṭhikāntam
kākṣyāsyahṛnnābhikaṭipradeśā jānvaṅghrayaścāpi bhavanti sṛṣṭau
22.18
vilomataḥ saṃhṛtaye sthitau ca nyasyet tu nāmerhṛdayāntamarṇān
karanyāse'ṅguṣṭhābhyāmaṅguliṣu tarjāgrābhyāmaṅguṣṭhayornyaset
syānmadhyayā madhyamarjanībhyāṃ sāṅguṣṭhayānāmikayā ca tarjā
22.19
jyeṣṭhānvitā jyeṣṭhikayā kaniṣṭhā nirjyeṣṭhakābhiḥ sakalāṅgulībhiḥ
dehanyāsaṃ kuryāt
itthaṃ sadā nyastatanuṃ viśuddhaṃ naraṃ tu nārāyaṇamūrtibhājam
22.20
viṣābhicārārirujo grahādyā vrajanti dūreṇa vihāya bhītāḥ
vinyastamantro'pyaśuciryadā yad dhautāṅghrirācamya punaśca mantrī
22.21
strātvāthavā nyastatanuryathāvat punarjapādyaṃ vidadhīta kṛtyam
aṣṭākṣaraṃ pañcakapañcasaṃkhyaṃ saṃyamya vāyuṃ manasā japitvā
22.22
prāṇasya samyaṅniyamo'yamuktastāṃstrīṃñjapādau tanutāṃ tathānte
śuśrūṣayā vā mahatā dhanena prājñaṃ guruṃ tadvidamarcayitvā
22.23
tattoṣakṛnmantramavāpya tasmāt taddakṣiṇāṃ svānuguṇāṃ ca dattvā
kurvan svavarṇāśramakarma sarvaṃ pūjāṃ ca bhaktyā haraye yathoktām
22.24
vratyāśanaḥ śastayathoktadeśe saṃsādhayenmantramimaṃ yathāvat
nāradīye -
manaḥsaṃharaṇaṃ śaucaṃ maunaṃ mantrārthacintanam
22.25
avyagratvamanirvedo japasampattihetavaḥ
gṛñjanaṃ cāranālaṃ ca śārṅgaṣṭā kāṃsyabhojanam
22.26
mantravīryatapoghnāni tasmāt tāni vivarjayet
kārañjīṃ na bhajecchāyāṃ nādyāt tatpāduke spṛśet
22.27
na vastrāntaramācchādya kadācijjalamuttaret
yātayāmaṃ gatarasaṃ pūtiparyuṣitādikam
22.28
nāśnātu na divāsvapnaṃ na seveta parastriyaḥ
ahiṃsā satyamasteyaṃ brahmacaryāparigrahau
22.29
santoṣaśaucasvādhyāyatapāṃsīśvarabhāvanā
etān yamān saniyamān kurvan mantrāṃśca sādhayet
22.30
karañjaṃ ca palaṇḍuṃ ca matsyamāṃsau madhūni ca
chatrākaṃ jālapādāni nālīśokālukāni ca
22.31
alābutailasiddhaṃ ca tailasikthaṃ na bhakṣayet
akṣāralavaṇāśī syāt puraścaraṇasiddhaye
22.32
śreyasvināṃ gurūṇāṃ ca sannidhau satyanujñayā
japapūjādikaṃ kuryādanyathā doṣakārakam
22.33
iti
mārgādiśīrṣasya tu pūrvapakṣe tisro navamyādyamupoṣya viṣṇum
22.34
saṃpūjya caikādaśikāniśāyāṃ prātaśca kuryādatha pūrvasevām
mantrākṣarāṇāṃ tu caturguṇāni lakṣāṇi japẏāni tato daśāṃśam
22.35
sājyaistilairvā kamalairjuhotu kuryāt svaśaktyā dvijabhojanaṃ ca
lakṣadvayānmantravaro'sya śudhyet pakṣaiścaturbhiśca tathātmaśuddhiḥ
22.36
ṣaḍbhistu lakṣaiḥ pitṛmātṛśuddhiḥ syādaṣṭalakṣairapi mantrasiddhiḥ
japād daśāṃśaṃ juhuyāt tilājyaiḥkṣīrānnapālāśasamidbhirevau
22.37
home tvaśakto dviguṇaṃ japena syāt siddhamantro dvijabhojanaiśca
saṃsādhayenmantramimaṃ tu nityaṃ saṃpūjayet taṃ vibhavānusāram
22.38
snātvā tu sāndhyaṃ ca samāpya kṛtyaṃ yāgālayaṃ prāpya kṛtāṅghriśaucaḥ
ācamya pūrṇārghyakaraḥ svamantrairdvārasthān yajedakṣatapuṣpagandhaiḥ
22.39
caṇḍaṃ pracaṇḍaṃ garuḍaṃ ca nāgnā cakraṃ tathaivobhayapārśvasaṃsthān
bhūmāvadhodhvaṃ ca yajet tadūrdhve dvāraśriyaṃ madhyagatāṃ yathāvat
22.40
kṣiptvāntarakṣeṇa tu puṣpamantaḥ praviśya yāgālayabāhyato'strāt
prākāramudbhāvya tathā niviṣṭo nijāsane vāgyamavān yathāvat
22.41
prāguktamārgeṇa tu śoṣaṇādyaiḥ śuddhātmadeho hṛdayāmbujastham
dhyātvā paraṃ jyotirathāsya madhye nārāyaṇaṃ tatra yajedvidhāyaiva
22.42
nyāsāṃstu kṛtvā sakalīkṛtātmā kṛtvordhvapuṇḍraṃ sitacandanādyaiḥ
phālādigātreṣu ca keśavādyaiḥ puṣpārūḍhaśiro dhṛtārghyaḥ
22.43
phālodarorogalapārśvabāhākaṇṭheṣu vāmodarapārśvavāhvoḥ
tadūrdhvakaṇṭhe tvatha pṛṣṭhadeśe paścād gale ca kramaśò namontam
22.44
"siddhārthamakṣataṃ caiva kuśāgrāṇi tilā jalam
yavaṃ gandhaṃ phalaṃ puṣpamarghyamaṣṭāṅgīritam
22.45
"
pādyaṃ ca dūrvāmbujaviṣṇupatnīśyāmākatoyaiḥ paripūrya ceṣṭrā
takkolajātīphalasallabaṅgairailāmbumiśrācamanīyakaṃ syāt
22.46
saṃmārjanīyaṃ ca niśāśirīṣāvādityavartinyapi sarvabhadrā
darbhāstathāmbhāṃsi ca kuṅkumaṃ ca mūlānilabdhaṃ snapane niyojyam
22.47
astreṇa dhauteṣu samūlatoyaiḥ pūrṇepu pātreṣu sahāṅgamūlam
nyaset sagandhākṣatapuṣpadhūpairarthyādikāni kramaśoḍarcayīta
22.48
uśīraṃ kuṅkumaṃ māṃsī muraṃ mūlaṃ ca candanam
kuṣṭhaṃ kṛṣṇāguruśceti gandho'ṣṭāṅgo haripriyaḥ
22.49
sarvamastrarakṣitaṃ kavacāvakuṇṭhitaṃ ca | tatrārghyaṃ (dakṣiṇakare) pādayoḥ pādyaṃ
pṛthak pṛthagācamanīyaṃ ca mukhe saṃmārjanīyaṃ viśiṣṭasnapane yojyam
āpūrya toyaiḥ śucibhistu pūtairvastreṇa lauhīmatha mārttikīṃ vā
nyasecchubhāṃ vardhanikāṃ tu vāme syād dakṣiṇe vastu samastamanyat
22.50
astreṇārdhyajalaiḥ kūrcenāvokṣya mūlāṅgairabhimantrya dhenumudrayā'mṛtīkṛtya kavacenāvakuṇṭhya surakṣitaṃ pūjocitaṃ vastu samaṃ nidadhīta
arghyādibhiḥ prokṣya śiraḥ svaśuddhiḥ pūjākṣitau dravyagaṇe ca śuddhiḥ
plutāntamūlena tu mantraśuddhiḥ syāt kṣālanenāpi ca beraśuddhiḥ
22.51
vighneśamiṣṭvā nirṛtau svanāmnā pūrvottare tu svagurūstathaiva
tatraiva vācaṃ paramaṃ guruṃ ca śrīnāradaṃ cāpyatha pūrvasiddhān
22.52
astreṇa nirmālyamapohya berād dattvāmṛtāyaṃ tvabhiṣicya toyaiḥ
śīrṣṇā tu pādyācamane ca pīṭhamiṣṭvā samāvāhya nidhāya mantrān
22.53
punastathārdhyādibhiriṣṭagandhaiḥ sapuṣpadhūpakṣatamarcayitvā
sugandhitailena ca pañcagavyaiḥ saṃsnāpya cūrṇairapanudya lepam
22.54
saṃmārjanīyena vimṛjya devaṃ hāridracūrṇena ca kuṅkumena
sugandhipuṣpāmbusugandhatoyaistathābhiṣiñcet puruṣādisūktaiḥ
22.55
oṃ | jitaṃ te puṇḍarīkākṣa ! namaste viśvabhāvana !
subrahmaṇya ! namaste'stu namaḥ puruṣa ! pūrvaja !
22.56
anena copacārāṃstu dadyānmūlāṅgasaṃyutam
ādhāraśaktiṃ tvatha kūrmarājaṃ śeṣaṃ ca pṛthvīmatha yogapīṭham
dharmaṃ tathā jñānamanantaraṃ ca vairāgyamaiśvaryamapi krameṇa
22.57
siṃhākṛtīṃstānanalādikoṇeṣvadharmapūrvānapi diggateśaun
rajastamaḥsattvamayāni kandaṃ nālaṃ ca padmaṃ yajatu krameṇa
22.58
tatpatratatkesarakarṇikāsu vyāptāni sūryāgniniśākarāṇām
bimbānyathātmā ca tathāntarātmā pūjyastathā syāt paramātmanāmo
22.59
vimalotkarṣiṇī jñānā kriyā yogātha satyayā
22.60
prahlīśaunugrahā cātha pūrvataḥ kesarāgragāḥ
tāsāṃ tu madhye'mbujakarṇikāyāṃ yānugrahākhyā navamī tu śaktiḥ
āvāhayet tatra tato yathāvat sañcintya nārāyaṇamaprameyam
22.61
nīlāmbudaśyāmalamakomalāṅgaḥ pūrṇendubimbadyutivaktrapadmaḥ
ratnaprabhodbhāsikirīṭarocissaṃbhinnanīlālakabhāraramyaḥ
22.62
subhrūlalāṭāyatatuṅganāsāvyākośapaṅkeruhapadmanetraḥ
vyālambicārvañcitakarṇapāśavyāsaktanakrojjvalakuṇḍalaśrīḥ
22.63
sanniṣkabhīṣojjvalakambukaṇṭhaḥ pinaddharatnāṅgadayugmabāhuḥ
vicitravāsaḥkaṭakāṅgulīyaḥ saśaṅkhapadmogdārihastaḥ
22.64
satkaustubhodbhāsivilolahāraḥ śrīvatsalakṣmīrūciroruvakṣāḥ
māṇikyabimbopamaśātamadhyavyāsaṅgihemodarabandhasaumyaḥ
22.65
āpītakauśeyaviśeṣaramye kaṭipradeśe vipule dadhānaḥ
ratnapravekācitahemasūtramājānulambāṃ vanamālikāṃ ca
22.66
jaṅghādvayaṃ cārusupīnavṛttaṃ pādābjayugmaṃ ca sujātagulpham
uttuṅgaraktāṃ nakhacandrapaṅktiṃ varāṅgulībhistanukomalābhiḥ
22.67
śaṅkhaṃ ca cakraṃ jalajaṃ ca nakraṃ dadhat talaiḥ pādakarāmbujānām
sarvāṅgasaundaryaguṇaikalakṣmīṃ bibharti yasmāt puruṣottamo'sau
22.68
sañcintya nārāyaṇamūrtimavaṃ hṛtpaṅkaje sve'caladīpakalpam
haṃsātmakaṃ tat praṇavopagūḍhaṃ jyotiḥ pradīpādiva dīpamanyam
22.69
ādāya buddhyā praṇavaṃ plutāntaṃ sauṣumnamārgeṇa nayedudīrya
saṃyojayet khāmburuhodarasthe jyotirmaye brahmaṇi tat tato'pi
22.70
puṣpāñjalau sve viniyojya tasmānmūrte purovartini madhyanāḍyā
nītvā niyuñjīta satārahaṃsaṃ bījaṃ sanādaṃ hṛdayābjamadhye
22.71
kṛtvaivamāvāhanamasya mūrtī nyaset karanyāsavihīnamarṇān
mantrasya cāṅgāni sahaṃsamūlāt sānnidhyamasmin vidadhīta mantrī
22.72
taddvādaśāntāmṛtapūrṇacandrabimbāt pravṛttāmṛtadhārayāmum
tadbrahmanāḍyāgatayā niṣiñcet sārdhendukhaḍgīśamudīrya tāram
22.73
pīyūṣapūrairiva pūrṇamantarbāhye tathāhlāditadivyadeham
dhyātvā yathāvad vihitopacāraistaṃ pūjayedāvaraṇāni cānte
22.74
tad yathā —
aṅgāni pūrvādidalāgragāṇi koṇacchadāmreṣu yajet tathāstram
dvāreṣu pūrvādiṣu vainateyaṃ cakraṃ ca padmaṃ ca gadāṃ krameṇa
22.75
koṇeṣu pūjyastviha pāñcajanyaḥ śārṅgaṃ ca yāmye tvatha nandakaṃ ca
dve ceṣudhī paścimaṃtastu saumye pūjyā svanāmnā vanamālikā strī
22.76
lakṣmīṃ harerdakṣiṇapārśvasaṃsthāṃ bhūmiṃ tu puṣṭyākhyakayāsya vāme
śrīvatsamaṅka maṇikaustubhaṃ cāpyagre yajed dakṣiṇavāmasaṃsthau
22.77
indrāgnivaivasvatarākṣaseśāṃstoyeśvaraṃ vāyumatho'rthanātham
īśānamabjodbhavamapyanantaṃ somaṃ ca saumye yajatu svanāmnā
22.78
teṣāṃ tu bāhye kuliśaṃ tu śaktiṃ daṇḍāsipāśāṅkuśasadgadāśca
śūlaṃ ca padmaṃ ca sudarśanaṃ ca lokāvipāstrāṇi yajet svanāmnā
22.79
astrāṇāṃ bāhye kumudādīn pūjayet
kumudaṃ kumudākṣaṃ ca puṇḍarīkaṃ ca vāmanam
22.80
śaṅkukarṇaṃ sarvanetraṃ sumukhaṃ supratiṣṭhitam
koṭikoṭigaṇādhīśān viṣṇubhūtagaṇādhipān
22.81
someśayormadhyagataṃ viṣvaksenaṃ ca pūjayet
viṣṇornirmālyamakhilaṃ pūjānte'smai nivedayet
22.82
saṃpūjya nityaṃ vidhivadyathokte hutvā ghṛtādyairatha vaiṣṇavāgnau
śaktyā dvijāgryānapi bhojayiṣyan mantraṃ japedvā trisahasrasaṅkhyam
22.83
evaṃ vidheyoditapūrvasevāsāṃsiddhamantro viniyogamicchan
taistairyathoktairhavanairjapairvā saṃsādhayed vāñchitamarthajātam
22.84
kuṇḍe yathokte caturaśrake vā tatrāraṇeryaṃ mathitaṃ tu vāgnim
saṃskṛtya taṃ vaiṣṇavavahnimārgādāvāhya tasmiṃstu hariṃ juhotu
22.85
āyuṣkaraṃ taddharitālikāgrairlakṣatrayaṃ cājyatilaṃ juhotu
chinnāsamidbhiborderścaturaṅgulābhiḥ kṣudrāpamṛtyūn madhuraiśca hanyāt
22.86
aśvatthamālabhya śanairdinādye japecca taṃ mṛtyurujāṃ praśāntyai
lakṣadvayaṃ vā japatastu kālyaṃ syād dīrghamāyuśca tathābhiṣekāt
22.87
toyaṃ japitvābhikṛtiprasaṃkhyaṃ pītvā trisandhyaṃ sa bhaveccirāyuḥ
kumbhāmbu pūrṇaṃ tvayutaṃ japitvā bimbe vidhānena hariṃ ca tasmin
22.88
āvāhya saṃpūjya daśāṃśamājyaṃ hutvābhiṣiñcedapamṛtyuśāntyai
ālabdhamannādyamanena bhuktaṃ nityaṃ tadāyuṣkaramaṣṭasaṃkhyam
22.89
anyad viṣaṃ vā sujaraṃ śataṃ tad bhuktaṃ japedauṣadhamiṣṭadaṃ syāt
candroparāge tridinopavāsī yat kāpilājyasya catuṣpalāni
22.90
cūrṇaṃ vacāyāśca palaṃ pibet tat prajñākaraṃ syādayutābhilabdham
brāhmīghṛtaṃ vāpi tathaiva pītaṃ sūryagrahe syāt kavitākaraṃ ca
22.91
nityaṃ jalaṃ vāṣṭaśatābhilabdhaṃ prajñākaraṃ vatsaramātrataḥ syāt
tisro'tha rātrīḥ samupoṣya māghīṃ saṅkrāntimasyāṃ bhasitāvāṃdagdham
22.92
brāhmīghṛtaṃ pañcasahasrasaṃkhyaṃ prajñākaraṃ syājjapitaṃ nipītam
śvetāmbarāḍhyaḥ sitapaṅkajānāṃ kṣīrājyasekādayutaṃ juhotu
22.93
lakṣmīmabhīṣṭāṃ labhate caturbhiḥ kumbhaiśca pūrṇairvidhinābhiṣiktaḥ
annaṃ tu vindet saghṛtānnahomādājyena kāmān labhate paśūṃśca
22.94
bailvaiḥ phalairvā madhuratrayāktaiḥ patraiḥ samidbhiśca bhavet kuberaḥ
viṣṇostithau phalgunapūrvapakṣe tisro niśāḥ samyagupoṣya viṣṇum
22.95
saṃpūjya padmairmadhurāvasiktairhutvā tu lakṣaṃ labhate nidhānam
prāhṇe ca tiṣṭhan samamūrdhvabāhurlakṣaṃ japedvā dhanavānasau syāt
22.96
bilvasya mūle nivasan phalaistairjuhut sahasraṃ prativāsaraṃ vā
aśnan dhanī tatphalamiśramannaṃ māsaistribhiḥ syāt prajapan dhaneśaḥ
22.97
dhenoḥ savarṇākṛtitarṇakāyāḥ kṣīre caruṃ saṃskṛtamājyasiktam
hutvāyutaṃ taccaruśeṣamaśnan hanyādalakṣmīṃ labhate ca lakṣmīm
22.98
yadvarṇapuṣpāṇi juhoti sājyaṃ tadvarṇavastrāṇi labheta māsāt
śālyādidhānyāni ghṛtaplutāni prāpnoti hutvā khalu māsamātrāt
22.99
yo yāni bījānyayutaṃ japitvā śālyādikānāmapi vā tarūṇām
kṣetre vapet sasyaphalaṃ samagraṃ mūlāni cāpnoti phalāni caiṣām
22.100
bhūrjāṃstu gomūtrakayāvakānnaṃ lakṣaṃ japet putramasau labheta
hutvātha vā guggulumājyasiktaṃ tanmantritāmbhaḥsnapanena patnyāḥ
22.101
viprā vaśe syustilataṇḍulābhyāṃ hutvā tu dadhyodanato narendrrāḥ
annena sājyena viśo'pi śūdrāḥ kṣīrānnahomena vaśe bhavanti
22.102
iṣṭāmapāmārgahutena yoṣāṃ kanyāṃ tu lājaistu samātuluṅgaiḥ
trikhādusekaṃ lavaṇena cānyā vaśyā bhavantyasyaṃ hutairyathāvat
22.103
devāsurān vā narakinnarādīn rakṣāṃsi nāgān vihagāṃśca yakṣān
sājyādapāmārgahutādabhīṣṭānaśvatthavahnau svavaśe karoti
22.104
nārāyaṇaṃ pūjayatastrisandhyamuddiśya yān yān japato'rṇalakṣam
sarve'pi lokā vaśagā bhaveyuryadyadiṣṭaṃ dṛḍhabhaktiyogāt
22.105
gomūtra saṃsādhitayāvakāśī snātvā trisandhyaṃ harimarcayed yaḥ
pūto'ṣṭalakṣairbhavatīha vipraḥ syād brahmahādyairdviguṇaiḥ krameṇa
22.106
krameṇa kṣatriyādyaścānudvipūrvasurāpastenagurutalpagāśceti yāvat
pūtastathā pañcabhireva lakṣaistoye sthitaḥ syādiha pātakebhyaḥ
ante tu gavyānyabhimantrya pītvā pūtastrilakṣarupaipātakebhyaḥ
22.107
sūryekṣaṇo vāriṇi jānudaghne sthitvāṣṭasāhasrajapābhiṣiktaḥ
tattaddinopāttamaghaṃ nihanyāt syānnābhimātre japatastu puṣṭiḥ
22.108
śuklābjasūtrāṇi mataṅgasaṃkhyāguṇāni caikyaṃ gamitāni mantrī
spṛṣṭrāyutaṃ tajjapitaṃ nibaddhaṃ syāt sarvarakṣākaramāyuṣe ca
22.109
puṃsāṃ dakṣiṇahaste vāmakare kaṇṭhe vā strīṇām
kruddhasya śāntiḥ purato japāt syād vāde jayaścāṣṭasahasrajāpāt
rājño'tha vānyasya ca darśanādau mantraṃ japediṣṭamasau karoti
22.110
snāto viśuddhaḥ kapilākarīṣaṃ brāhme muhūrte'mbujapatralabdham
aninduparvaṇyayutaṃ japitvā dvāre nikhātaṃ gṛharakṣakaṃ tat
22.111
tadbhasmayād vaiṣṇavavahnibhasma prāgvajjapet syād graharogarakṣā
siddhārthapālāśatilājyahomāt syāt sarvarakṣā graharogaśāntiḥ
22.112
rājīghṛtāktāḥ samidho'rdharātre vaibhītakīrdigvasano vanānte
juhad ripūn mārayatīha māsāt vaikaṅkatīḥ stambhayate ca senām
22.113
iṣṭvā hariṃ gavyaghṛtāvasiktaṃ nityaṃ tvapāmārgasamitsahasram
hutvā narendro navabhistu māsairjitveha śatrūn vahate dharitrīm
22.114
vāme tu pāṇau salilaṃ gṛhītvā daṣṭaṃ niṣiñcenmanujāpalabdham
kṣvelān samastān vinihatya rakṣed dūrvābhirāmṛjya ca lūtikādīn
22.115
dhyāyennijaikyaṃ garuḍādhirūḍhaṃ śaṅkhāripāśāṅkuśaśārṅgabāṇaiḥ
gadāsiyuktāṣṭabhujaṃ jayārthī nārāyaṇaṃ vairibhiyāṃ ca śāntyai
22.116
kṣīrārṇavāntaḥkanakāntarīpe kalpadrumodyānagamaṇḍapāntaḥ
siṃhāsanābjodarasanniviṣṭaṃ dhyāyecchriye śrīdharaṇīsametam
22.117
gaṅgādikānāṃ saritāmudīcye tīre'bdamaṣṭākṣaramantrajāpī
āścaryaśaktirbhavatīha sarvān kāmānavāpnoti ca dīrghamāyuḥ
22.118
tisro niśāḥ samyagupoṣya kṛṣṇe pakṣe tu kārṣṇe divase tu kṛṣṇam
saṃpūjya tatpādayugaṃ karābhyāṃ spṛṣṭvā japet saptadinaṃ dhanārthī
22.119
prātastrirātraṃ samupoṣya ceṣṭvā viṣṇuṃ sagomūtrakayāvakābhyām
pakṣaṃ vinidraḥ satataṃ japed yastasyeṣṭadā vyomacarā bhaveyuḥ
22.120
bhūtodakenaiva baliṃ niśīthe dattvā śmaśāne tvatha saptarātram
bhūtādikebhyastrisahasrajāpād bhūtāḥ piśācāśca tadiṣṭadāḥ syuḥ
22.121
nyagrodhamūle harimarcayitvā juhvat sahasrāṇi tu khādirīṇām
śyāmāsu māsādupayāti yakṣī syādiṣṭadā sā ramatāṃ tayā vā
22.122
ālikhya cāśokavanasya madhye yakṣaṃ tathā tatphalake tadīyaiḥ
puṣpairhariṃ cāpi yajet trisandhyaṃ hutvāpi māsād varado hi sa syāt
22.123
nāgadrumāṇāṃ phalakeṣu nāgīrālikhya yā nāgavanasya madhye
iṣṭvā hariṃ tatkusumairjuhotu prāpnoti tābhyaḥ sa rasāyanādyam
22.124
dvāre bilasyāsurarājakanyāmālikhya cādhāya vikaṅkatāgnim
vaikaṅkatīnāṃ samidhāṃ tu lakṣaṃ hutvāsurīto labhate tadiṣṭam
22.125
ārdrāmbaro'thāmbaragocare'gnau yadvaitasīnāṃmayutaṃ juhotu
syād vṛṣṭiragryā samidhāmathāpi sthitvāpsuṃ tasmād dviguṇaṃ japavitvā
22.126
śamīsamidbhirvipadāṃ praśāntyai juhotu kṛṣṇaiḥ saghṛtaistilairvā
śriyai ca puṣṭyai ghṛtapāyasābhyāṃ japañ śriyaṃ paśyati parvatāgre
22.127
kṣīrāśano vākṣaralakṣajāpī brahmāvabodhaṃ labhate ca muktim
lakṣmīṃ dṛśā paśyati parvatāgre sampūjya ṣaṇmāsajapena bhaktaḥ
22.128
dadhyājyamadhvaktatilaiḥ sukṛṣṇairhutvā trilakṣaṃ tridaśā vaśe syuḥ
vratyāśano viṣṇugṛhe japed yaḥ saṃvatsaraṃ mantramasaktamenam
22.129
viṣṇuṃ dṛśā paśyati bhaktiyogād yajan yathāvaccharadāṃ trayeṇa
tisro niśāḥ samyagupoṣya viṣṇuṃ sampūjya tu dvādaśikāniśāyām
22.130
tārthyaṃ vidhāyāruṇacandanena saṃspṛśya taṃ mantramimaṃ japitvā
saṃspandamānaṃ tamathārirūḍhaiḥ prāpnoti tenaiva sa viṣṇulokam
22.131
yaṃ yaṃ trilokyāmayamarthajātaṃ vāñchatyayatnādatha vā prayatnāt
mankrī samastaṃ labhate japārthairbhaktastu nārāyaṇapādapadme
22.132
iti paramarahasyaṃ proktamaṣṭākṣarasya śrutinigaditametat sādhanādyaṃ samāsāt
haricaraṇasaroje bhaktibhājāṃ janānāṃ priyahitamakhilārthaprāptaye hetubhūtam
22.132.p1
iti śrīmadīśānaśivagurudevapaddhatau tantrasāre
aṣṭākṣarapaṭalaḥ trayastriṃśaḥ
Linked texts (2)
- Īśānaśivagurudevapaddhati — Īśānaśivagurudeva, Sanskrit
- Vidyārṇavatantra — Sanskrit