Mantrapada 23: atha catustriṃśaḥ paṭalaḥ
Mantrapāda 23
- Language
- Sanskrit
Contents
- 23.92 — 1 part
atha catustriṃśaḥ paṭalaḥ
23.1
ādāvṛttaṣṭhaśabdaḥ śrīrasargā brahmaśoṇite
ṭhadvayaṃ caiva tārādiḥ śrīkaro'ṣṭākṣaro manuḥ
23.2
ṛṣyādyā vāmadevaśca paṅktirviṣṇuśca jātibhiḥ
aṅgāni syurdviruktāni bhīṣaya trāsayeti ca
23.3
pramardayeti rakṣeti huṅkāraśca yathākramam
karadehāṅgavinyāsaṃ sṛṣṭisthityantabhedataḥ
23.4
aṣṭākṣaroktamārgeṇa kuryādasyāpi mantravit
kṣīrābdhau hemapuline divyodyāne manorame
23.5
adhastāt kalpakataraurhemasiṃhāsanāmbuje
dhyāyet tārkṣyasamārūḍhaṃ taptahāṭakasannibham
23.6
śaṅkhacakragadābjāni dhārayantaṃ caturbhujam
divyapītāmbaradharaṃ vicitramakuṭojjvalam
23.7
vicitrahārakeyūranakrakuṇḍalamaṇḍitam
nānāratnaprabhodbhāsikaṭakāṅguliveṣṭanam
23.8
śrīvatsakaustubhoraskaṃ vanamālāvirājitam
sarvāṅgasundaraṃ devaṃ dhyātvā sampūjayeddharim
23.9
aṅgāni kesarāgreṣu dikpatreṣu śriyaṃ ratim
dhṛtiṃ kāntiṃ yajecchaktiṃ mūrtīḥ koṇadaleṣvapi
23.10
viṣvaksenaṃ svadiksaṃsthaṃ lokeśān svadiśāsvapi
astrāṇi bāhyāvaraṇe saṃpūjyaivaṃ yathāvidhi
23.11
tataḥ kuṇḍe tu vedāśre vaiṣṇave'gnau juhotuṃ ca
bilvakṣīrāgrasambhūtāḥ samidhaścāmbujairapi
23.12
sarpiṣā pāyasenāpi sahasraṃ pṛthagaṣṭabhiḥ
juhuyācca hiraṇyādyairguruṃ sampūjya śaktitaḥ
23.13
tataḥ siddho'sya mantro'yamabhīṣṭān kāmān prayacchati
ājyāktābhistu dūrvābhirmṛtyurogānnivartayet
23.14
bhojayecca dvijān bhaktyā dīrgha māyuravāpnuyāt
ādityābhimukhastiṣṭhan japeduddhāhurambhasi
23.15
sahasraṃ ca japedaṣṭau mahatīṃ śriyamāpnuyāt
aṣṭākṣaroktamakhilaṃ viniyogajātamasyāpi viṣṇuhṛdayasya samānamuktam
tattattathaiva japahomaviśeṣayuktyā saṃsādhanīyamiti tacca samastamūhyam
23.16
viṣṇuhṛdayādhikāraḥ
smarabījaṃ caturthyantaṃ kṛṣṇo gopīpadaṃ tataḥ
janaśabdo'mbumūrttho bhūrdīrgho nābhiratato marut
23.17
agnipatnī ca manvarṇo mantro gopālakaḥ smṛtaḥ
ādyaṃ bījaṃ tu tacchaktirvāmākṣo nārado muniḥ
23.18
virāṭchandastathā kṛṣṇo devatā bālavigrahaḥ
chando gāyatramityanye likhyante'ṅgānyanukramāt
23.19
ācakrāya vicakrāya sucakrāya ca jātibhiḥ
trailokyarakṣaṇāyeti caturthyā tvasurāntakaḥ
23.20
hīnamādyaiścaturvarṇaiḥ kecid gopamanuṃ jaguḥ
tasyāpi tulyamṛṣyādyamaṅgyadyaṃ caiva sādhanam
23.21
siddhasādhyādighaṭanaṃ nakṣatraghaṭanāpi vā
nāvekṣyā tvasya mantrasya sarveṣāṃ siddhido hyayam
23.22
strīśūdrāṇāmapi hyeṣa bhaktānāmiṣṭasiddhidaḥ
astrasaṃśuddhakarayoḥ kaniṣṭhādyaṅgulīṣvapi
23.23
talayoścaiva sarvatra mantrārṇān sṛṣṭaye nyaset
tadvilomena saṃhāre sthitaye madhyamādikam
23.24
aṅgāni ca kaniṣṭhādyaṃ jyeṣṭhādyaṃ madhyamādikam
karayorvinyaset tulyaṃ sṛṣṭyantasthitiṣu kramāt
23.25
mūrdhni bindau dṛśogrāṇe śrotrayorvadane gale
hṛdi nābhau smare jānvorjaṅghayorapi pādayoḥ
23.26
dehe caturdaśārṇāṃstu vinyaset sṛṣṭaye kramāt
hṛdayādyaṃ sthitinyāse pādādyaṃ saṃhṛtau smṛtam
23.27
aṅgāni hṛdayādyāni sveṣu sthāneṣu vinyaset
kṛtvā tu karayornyāsaṃ śarīre vyāpakaṃ tathā
23.28
dehanyāsaṃ ca pañcāṅgaṃ nyāsaṃ kuryād yathoditam
gurūrādeśato mantraṃ labdhvā tattoṣakārakaḥ
23.29
dhyātvā devaṃ yathākālaṃ puraścaryāṃ samācaret
bhūbhṛnnadībilvamūlahradagoṣṭhasurālayāḥ
23.30
bodhicchāyāsamudrāṃste tadvat sthānāni sādhane
ṛtyāśanaḥ saṃyatātmā snāne traiṣavaṇe rataḥ
23.31
pratyekameṣu sthāneṣu svārṇasāhasrakaṃ japet
japād daśāṃśaṃ juhuyāt padhmājyatilapāyasaiḥ
23.32
svarṇādau pūjayed devaṃ kṛṣṇaṃ vibhavasārataḥ
bhojayed brāhmaṇān śaktyā kṛtapūrvavrato bhavet
23.33
bālaṃ pratyagranīlotpaladalajaladaśyāmalaṃ komalāṅgaṃ
vyākośāmbhojanetraṃ kanakamaṇilasadbhūṣaṇaṃ pītavastram
barhāpīḍaṃ vicitrojjvalamakaralasatkuṇḍalaṃ cāruvaktraṃ
kṛṣṇaṃ dorbhiścaturbhirdhṛtajalajagadāpadmacakraṃ smarāmi
23.34
vanyairnānāprasūnairviracitarucimaccitramauliṃ vicitrairbarhāmiśraiḥ kadambairvyatikaritalasatkesaroddāmadāmnā
kaṇṭhāntālambinoccaiḥ parigatavapuṣaṃ veṇugānānuṣaktaṃ
gogopīgopavṛndaiḥ parigatamapi vā cintayet pītavastram
23.35
śrīvatsodbhāsivakṣaḥsthalagatavilasatkaustubhodbhāsilakṣmīvyāmiśrālolahāraṃ madhukaranikarānīlakeśālakāntam
dhyāyet pūrṇendubimbāmalamukhakamalaṃ phullapadmāyatākṣaṃ
devaṃ gopālaveṣaṃ divi suramunibhirvandyamānaṃ mukundam
23.36
sāmānyasādhanādhikāraḥ
atha trikālaṃ kṛṣṇasya yathā dhyānaṃ nigadyate
gavāṃ sandohanakṛte vatsasandohamadhyagam
23.37
veṇugānavinodena ramamāṇaṃ vilāsinam
23.38
lelihyamānaṃ govatsairgopakanyābhirāvṛtam
sasurāsuragandharvamunividyādharādibhiḥ
23.39
vṛndaśo divi deveśaṃ vandyamānaṃ smaran yajet
campakotpalapadmādyairvanyairanyaiḥ sugandhibhiḥ
23.40
kusumairgandhadhūpādyairyathāvadabhipūjayet
prātarhiraṇyapātreṣu dadhi mūlaṃ guḍaṃ madhu
23.41
rasannavanītaṃ ca tāmbūlaṃ ca nivedayet
madhyāhne ratnaśailendraśikhare'timanorame
23.42
divyodyāne kalpavṛkṣacchāyāyāṃ ratnamaṇḍape
ratnasiṃhāsanāmbhojakarṇikāyāṃ caturbhujam
23.43
yathoktarūpālaṅkāraṃ kṛṣṇaṃ dhyāyīta sādhakaḥ
saṃvṛtaṃ gopakanyābhirdivyarūpāmiracyutam
23.44
nāradādyairmunigaṇaiḥ sevyamānaṃ surairapi
udyānavṛkṣacchāyāsu caritvā yavasodakam
23.45
sutṛptābhistathā gobhirviśrutābhiravekṣitam
dhyātvaivaṃ vidhināvāhya vakṣyamāṇavidhānataḥ
23.46
sugandhivanyakusumaiścampakotphullakubjakaiḥ
saṃpūjya hemapātreṣu nivedya ghṛtapāyasaiḥ
23.47
dattvā gobhyastathā grāsān kṣamasveti pravā(ha?sa)yet
sāyaṃ bṛndāvane devaṃ rāsamaṇḍalamadhyagam
23.48
alaṅkṛtābhiratyarthaṃ gopakanyābhirāvṛtam
krīḍantaṃ nṛttagītādyairvinodairvividhairvibhum
23.49
mallikājātikusumairiṣṭvā tu ghṛtapāyasam
nivedya ca śṛtaṃ kṣīraṃ dattvā hastāvesecanam
23.50
mukhavāsaṃ tu tāmbūlaṃ vinivedya pravā(ha?sa)yet
atha sāmānyayajanaṃ kṛṣṇasyeha nigadyate
23.51
svāṅgamūlairvidhisrnāto gatvā yāgālayāntikam
nāmabhirdvārapālāṃśca prāgādiṣu yajet kramāt
23.52
dhātāraṃ ca vidhātāraṃ gaṅgāṃ ca yamunāpi
śaṅkhapadmanidhī tadvad dvāraśākhāgrayorapi
23.53
madhyayormūlayoriṣṭvā tanmadhye ca sudarśanam
ūrdhvodumbaramadhye tu nāmnā dvāraśriyaṃ yajet
23.67
aṅgāni kesarāgreṣu koṇeṣvasraṃ ca pūjayet
rukmiṇīṃ satyabhāmāṃ ca lakṣmīṃ nāgnajitīmapi
23.68
sunandāṃ mitravindāṃ ca devīṃ jāmbavatīmapi
suśīlāṃ caiva pūrvādidalāgreṣu kramād yajet
23.69
pīṭhād bāhye maṇḍapāntaḥ śaṅkhādīn dvandvaśo'rcayet
caturdvārapradeśeṣu kramād dakṣiṇavāmayoḥ
23.70
śaṅkhaṃ cakraṃ gadāṃ śārṅgaṃ musalaṃ nandakaṃ tathā
pāśāṅkuśau ca madhye prāk śrīvatsaṃ kaustubhaṃ yajet
23.71
atha maṇḍalavāhye tu vahnikoṇādidevatāḥ
sarasvatīṃ gaṇeśaṃ ca durgāṃ kṣetrapatiṃ kramāt
23.72
prāgādi nāradaṃ kūrmaṃ pūrvasiddhān gurūn yajet
teṣāṃ bāhye tu lokeśān tadastrāṇi ca tadbahiḥ
23.73
saṃpūjya gandhaiḥ puṣpādaistato devaṃ pravāsayet
evaṃ pratidinaṃ pūjya trikālaṃ vibhave sati
23.74
evaṃ sādhitamantrasya sarvakāmā bhavanti hi
viprādīn vaśayeddhutvā vanyapuṣpaiśca jātibhiḥ
23.75
raktapuṣpaistathā nīlairutpalaiḥ sarva eva hi
sataṇḍulaistilaiḥ puṣpairhutvā tadbhasmadhāraṇāt
23.76
yoṣito vaśayedājyakṣīramadhvabhighāritaiḥ
kadambapuṣpairjuhuyād dhyātvā gopālavigraham
23.77
kadambamūle gāyantaṃ sarvavaśyakaraṃ tu tat
annādyakāmaḥ śrīpuṣpaiḥ sitataṇḍulasaṃmiśritaiḥ
23.78
juhoti cāpyapāmārgaiḥ sarvalokavaśīkaram
dhanārthī sitapadmādyairvastraṃ taddarṇapuṣpakaiḥ
23.79
bādarībhiḥ samidbhistu sājyabhiḥ kanyakāptaye
madhvaktalavaṇairhutvā sarveṣāṃ syād vaśīkaram
23.80
gosiddhirgaurasarṣairhutvā padmairavāptusampadaḥ
dadhyājyakhadirahutād vyasanebhyo vimucyate
23.81
putrārthamaśvatthatarormūle kṛṣṇaṃ smaran yajet
guruputrapradaṃ lakṣaṃ japet tasmād daśāṃśataḥ
23.82
vṛtaṃ tu juhuyād bhūtyai navanītaṃ juhotu ca
prātaḥ kujadine snātaḥ śrībhūmisahitaṃ harim
23.83
iṣṭvāyutaṃ japitvā tat kṣetraṃ gatvā tu tanmṛdam
saptābhimantritāṃ prāśya tatkṣetraṃ saptabhirlabhet
23.84
pārijātaharaṃ kṛṣṇaṃ dhyātveṣṭvā karavīrajaiḥ
saṃsiddhairjuhuyādājyairjayatīndra iva dviṣaḥ
23.85
śaṅkhādinidhisaṃyuktaṃ dvārakāvāsinaṃ harim
dhyātveṣṭvā taṇḍulān hutvā pratiṣṭhāṃ labhate'cirāt
23.86
pārthāya gītāvaktāraṃ kṛṣṇaṃ dhyātvāmbujairyajan
dharmaṃ ca mokṣaṃ prāpnoti dūrvāhomāccirāyuṣam
23.87
āharttāraṃ tu rukmiṇyā dhyātveṣṭvā lājagodhṛtam
juhuyācca japediṣṭvāṃ kanyāṃ yoṣāśca vindati
23.88
pibantaṃ pūtanāstanyaṃ svaikyaṃ dhyātvāvalokanāt
sarve grahā vinaśyanti viṣaṃ kālīyamardanam
23.89
vṛndāvanagataṃ dhyāyan vṛṣṭikāmastu vetasaiḥ
hutvā tu labhate vṛṣṭiṃ saptarātrānna saṃśayaḥ
23.90
vyādhīñ jayeccāpamṛtyuṃ chinnājyatilahomataḥ
sājyapāyasahomena sarvān kāmānavāpnuyāt
23.91
rājñaḥ purohitatvārthī śuklapuṣpairmadhuplutaiḥ
hutvā tu labhate lakṣamanyad vā na cirād dvijaḥ
23.92
iti nigaditametat kṛṣṇamantrasya samyaṅ
munijanapariṣṭrāna vīkṣya kalpān vidhānam
yajanajapahutādyairbhaktimān nityaśo'muṃ
bhajati yadi yadiṣṭaṃ prāpnuyād yena mantrī
23.92.p1
iti śrīmadīśānaśivagurudevapaddhatau tantrasāre mantrapāde śrīkarādyākṣaragopālo nāma catustriṃśaḥ paṭalaḥ
Linked texts (1)
- Īśānaśivagurudevapaddhati — Īśānaśivagurudeva, Sanskrit