Mantrapushpa 2
Mantrapuṣpa 2
- Language
- Sanskrit
2.1
atha īśāvāsyopaniṣat
oṃ pū̱rṇamada̱ḥ pū̱rṇami̱da̍ṃ.......oṃ śānti̱ḥ śānti̱ḥ śānti̍ḥ
oṃ ī̱śā vā̱sya̍mi̱dagṃ sarva̱ṃ yatkiñca̱ jaga̍tyā̱ṃ jaga̍t
tena̍ṃ tya̱ktena̍ṃ bhuñjīthā̱ mā gṛ̍dha̱ḥ kasya̍svi̱ddhanam̍
2.2
ku̱rvanne̱veha karmā̍ṇi jijīvi̱ṣeccha̱tagṃ samā̍:
e̱vaṃ tvayi̱ nānyatheto̍'sti̱ na karma̍ lipyate̱ nare̍
2.3
a̱su̱ryā̱ nāma̍ te̱ lokā̱ andhena̱ tama̱sā''vṛ̍tāḥ
tāgṃste pretyā̱bhiga̍cchanti̱ ye ke cā̍tma̱hano̱ janā̍:
2.4
ane̍ja̱deka̱ṃ mana̍so̱ javī̍yo̱ naina̍ddevā ā̍pnuva̱npū̱rvamarṣa̍t
taddhāva̍to̱'nyānatye̍ti̱ tiṣṭha̱ttasmi̍nna̱po mā̍ta̱riśvā̍ dadhāti
2.5
ta de̍jati̱ tanneja̍ti̱ taddū̱re tadva̍ntike
tada̱ntara̍sya̱ sarva̍sya̱ tadu̱ sarva̍syāsya bāhya̱taḥ
2.6
yastu̱ sarvā̍ṇi bhū̱tānyā̱tmanye̱vānu̱paśya̍ti
sarva̍bhū̱teṣu̍ cā̱tmāna̱ṃ tato̱ na viju̍gupsate
2.7
yasmi̱nsarvā̍ṇi bhū̱tānyā̱tmaivābhū̍dvijāna̱taḥ
tatra̱ ko moha̱ḥ kaḥ śoka̍ eka̱tvama̍nu̱paśya̍taḥ
2.8
sa parya̍gācchu̱krama̍kā̱yama̍vra̱ṇama̍snāvi̱ragṃ śu̱ddhamapā̍paviddham
ka̱virma̍nī̱ṣī pa̍ri̱bhūḥ sva̍ya̱mbhū-ryā̍thātathya̱to'rthā̍n
vya̍dadhācchāśva̱tībhya̱ḥ samā̍bhyaḥ
2.9
andha̱ṃ tama̱ḥ pravi̍śanti̱ ye'vi̍dyāmu̱pāsa̍te
tato̱ bhūya̍ iva̱ te tamo̱ ya u̍ vi̱dyāyā̍gṃ ra̱tāḥ
2.10
anya̱devā̱hurvi̱dyayā̱'nyadā̍hu̱ravi̍dyayā
iti̍ śuśruma̱ dhīrā̍ṇā̱ṃ ye na̱stadvica̍cakṣi̱re
2.11
vi̱dyāṃ cāvi̍dyāṃ ca̱ yastadvedo̱bhaya̍ṃ sa̱ha
avi̍dyayā mṛ̱tyuṃ tī̱rtvā vi̱dyayā̱'mṛta̍maśnute
2.12
andha̱ṃ tama̱ḥ pravi̍śanti̱ ye' sambhū̍timu̱pāsa̍te
tato̱ bhūya̍ iva̱ te tamo̱ ya u̱ sambhū̍tyāgṃ ra̱tāḥ
2.13
anya̱devāhu̱ḥ sambha̍vā̱danyadā̍hu̱rasa̍mbhavāt
iti̍ śuśruma̱ dhīrā̍ṇā̱ṃ ye na̱stadvica̍cakṣi̱re
2.14
sambhū̍tiṃ ca vināśa̍ṃ ca̱ yastadvedo̱bhaya̍ṃ sa̱ha
vi̱nāśe̍naṃ mṛ̱tyuṃ tī̱rtvā sambhū̍tyā̱'mṛta̍maśnute
2.15
hi̱ra̱ṇmaye̍na pā̱treṇa̍ sa̱tyasyāpi̍hita̱ṃ mukham̍
tattvaṃ pū̍ṣannapāvṛ̍ṇu sa̱tyadha̍rmāya dṛ̱ṣṭaye̍
2.16
pū̱ṣannekarṣe yama sūrya̍ prājā̍patya̱ vyū̍ha ra̱śmīn
samū̍ha̱ tejo̱ yatte̱ rūpa̍ṃ kalyā̍ṇatama̱ṃ tatte̍ paśyāmi
yo̱'sāva̱sau puru̍ṣa̱ḥ so̱'hama̍smi
2.17
vā̱yurani̍lama̱mṛta̱mathe̱daṃ bhasmā̍ntagṃ śarī̍ram
oṃ 3 krato̱ smara̍ kṛ̱tagṃ sma̍ra̱ krato̱ smara̍ kṛ̱tagṃ sma̍ra
2.18
agne̱ naya̍ su̱pathā̍ rā̱ye a̱smān viśvā̍ni deva va̱yunā̍ni vi̱dvān
yu̱yo̱dhya̱smajju̍hurā̱ṇameno̱ bhūyi̍ṣṭhāṃ te̱ nama̍uktiṃ vidhema