Samavedimantra 62

Sāmavedīmantra 62

615 ājya̍ntya̱gne sa̱midhā̍na dīdi̱vo jihvā̍ caratyutta̱rāsani̍
sa tvaṃ no̍ agne̱ paya̍sā vasu̱vidra̱yiṃ varco̍ dhatsve̱dāḥ

616 vasa̍nta̱ innu rantyo̍ grī̱ṣma innu rantya̍ḥ| va̱rṣāṇya̱nu śa̱rado̍ hema̱ntaḥ śi̍śi̱ra innu rantya̍ḥ

617 saha̍sraśīrṣāḥ puru̍ṣaḥ sahasrā̱kṣaḥ saha̍srapāt| sa bhūmi̍ṃ sa̱rvato̍ vṛ̱tvātya̍tiṣṭhaddaśāṅgulam

618 tri̱pādūrdhva udai̱tpuruṣaḥ pādo̍'sye̱hābha̍va̱tpuna̍ḥ| tathā̱ viṣva̱ṅ vya̍krāmadaśanānaśa̱ne abhi̍

619 puru̍ṣa e̱vedaᳵ sarva̱ṃ yadbhūta̱ṃ yacca̱ bhavya̍m| pādo̍'sya̱ sarvā̍ bhū̱tāni̍ tri̱pāda̍syā̱mṛta̍ṃ di̱vi̍

620 tāvā̍nasya mahi̱mā tato̱ jyāyā̍ṃśca̱ pūru̍ṣaḥ| u̱tāmṛ̍ta̱tvasyeśā̍no̱ yadanne̍nāti̱roha̍ti

621 tato̍ vi̱rāḍa̍jāyata vi̱rājo̱ adhi̱ pūru̍ṣaḥ| sa jāto atya̍ricyata pa̱ścādbhūmi̱matho̍ pu̱raḥ

622 manye̍ vāṃ dyāvāpṛthivī su̱bhoja̍sau ye apra̍thethāma̱mitamabhi̱ yojana̍m
dyāvā̍pṛthi̱vī bhavata̍ᳵ syo̱ne te no̍ muñcatamaṃᳵhasaḥ

623 harī̍ ta̱ indra̱ śmaśrū̍ṇya̱to te̱ hari̍tau harī̍| taṃ tvā̍ stuvanti ka̱vaya̍ḥ pa̱ruṣāso̱ vana̱rgava̍ḥḥ

624 yadvarco̱ hira̍ṇyasya̱ yadvā̱ varco̱ gavā̍mu̱ta| sa̱tyasya̱ brahmaṇo̱ varca̱stena̱ mā saṃ sṛ̍jāmasi

625 saha̍stana̱ indra̱ daddha̱yoja̱ īśo̍ hāsya ma̱hato̱ vira̍pśin
kratu̍ṃ na tṛ̱mṇaᳵsthavi̍raṃ ca vā̱jaṃ vṛ̱treṣu̍ śatrūnsahanā kṛdhī naḥ

626 saha̍rdhabhāḥ saha̍vatsā uda̍ta viśvā rūpārṇi bibhratīhya̍bhrūḥ
uruḥ pṛthurayam̐ yo astu loka imā āpaḥ suprapāṇā iha sta

Linked texts (5)