Samavedimantra 87

Sāmavedīmantra 87

(pī)
iti dvitīyaḥ khaṇḍaḥ

[ ghā0 10 | u0 1 | sva0 4 ]
856 a̱bhi somā̍sa āyava̱ḥ pava̍nte̱ madya̱ṃ mada̍m
sa̱mu̱drasyādhi̍ vi̱ṣṭapi̍ manī̱ṣiṇo̱ matsa̍rāso mada̱cyuta̍ḥ

857 tara̍tsamu̱draṃ pa̍vamāna ū̱rmiṇā̱ rājā̍ de̱va ṛ̱taṃ bṛ̱hat
a̱rṣo mi̱trasya̱ varu̍ṇasya̱ dharma̍ṇā pra hi̍nvā̱na ṛ̱taṃ bṛ̱hat

858 nṛ̱bhirya̍mā̱ṇo harya̍to vicakṣa̱ṇo rājā̍ de̱vaḥ sa̍mu̱dratha̍ḥ

9(vu)

[ ghā0 15 | u0 nāsti | sva0 5 ]

859 ti̱sro vāca̍ īrayati̱ pra vahni̍rṛ̱tasya̍ dhī̱tiṃ brahma̍ṇo manī̱ṣām
gāvo̍ yanti go̱pati̱ṃ pṛccha̍mānā̱ḥ soma̍ṃ yanti ma̱tayo̍ vāvaśā̱nāḥ

860 soma̍ṃ gāvo̍ dhe̱navo̍ vāvaśā̱nāḥ some̍ viprā ma̱tibhi̍ḥ pṛ̱cchamā̍nāḥ
soma̍ḥ su̱ta ṛ̱cyate̍ pavamā̱naḥ some̍ a̱rkāstri̱ṣṭubha̱ḥ saṃ na̍vante

861 e̱vā na̍ḥ soma pari̱ṣicya̍māna̱ ā pa̍vasva pūya̱māna̍ḥ sva̱sti
indra̱mā vi̍śa bṛ̱ha̱tā made̍na̱ vardha̍yā̱ vāca̍ṃ janayā̱ pura̍ṃdhim

10(pī)
862 yaddyāva̍ indra te śa̱taṃ śa̱taṃ bhūmī̍ru̱ta syuḥ | na tvā̍ vajrintsahasra̱ṃ sūryā̱ anu̱ na jā̱tama̱ṣṭa roda̍sī

863 ā pa̱pratha mahi̱mnā vṛṣṇyo̍ vṛṣanviśvā̱ śavi̍ṣṭha̱ śava̍sā
a̱smām̐ a̍va maghavanga̱oma̍ti vra̱je ca̱jriṃ citrā̍bhirū̱tibhi̍ḥ

11(lī)
964 va̱yaṃ gha̱ tvā̍ su̱tāva̍nta ā̱po na vṛ̱ktaba̍rhiṣaḥ | pa̱vi̱trasya̍ prasra̱vaṇe̍ṣu vṛtrahanpari̍ sto̱tāra̍ āsate

865 svara̍nti tvā su̱te naro̱ vaso̱ nirṇe̍ka u̱kthina̍ḥ
ka̱dā su̱taṃ tṛ̱ṣāṇa oka̱ ā ga̍ma̱dindra̱ svabdī̍va̱ va̍ṃsagaḥ

866 kaṇve̍bhirdhṛṣṇavā dhṛ̱ṣadvāje̍ darṣi saha̱sriṇa̍m
pi̱śaṅgarū̍paṃ maghavanvicarṣaṇe̱ makṣū goma̍ntamīmahe

12(chā)
867 tara̍ṇi̱rittsi̍ṣāsati̱ vāja̍ṃ pu̱ra̍ṃdhyā yu̱jā | ā va̱ indra̍ṃ puruhū̱taṃ na̍me gi̱rā nemi̍ṃ ta̱ṣṭeva̍ su̱druva̍m

868 na du̍ṣṭu̱tirdravi̍ṇo̱deṣu̍ śasyate̱ na śedha̍nta̱ rayi̍rnaśat
su̱śa̱ktirinma̍ghava̱n tubhya̍ṃ māva̱te de̱ṣṇaṃ yatpārye̍ di̱vi

Linked texts (6)