Ashtottarashatopanishad 121

Aṣṭottaraśatopaniṣad 121

Language: Sanskrit

121.1

jñātvā devaṃ mucyate sarvapāśaiḥ kṣīṇaiḥ kleśairjanmamṛtyuprahāṇiḥ
tasyābhidhyānāt tṛtīyaṃ dehabhede viśvaiśvaryaṃ kevala āptakāmaḥ

121.1-2

1
etajjñeyaṃ nityamevātmasaṃsthaṃ nātaḥ paraṃ veditavyaṃ hi kiñcit
bhoktā bhogyaṃ preritāraṃ ca matvā sarvaṃ proktaṃ trividhaṃ brahma hetat

121.1-3

2
ātmavidyātapomūlaṃ tadbrahlopaniṣatparam

121.1-4

3
ya evaṃ viditvā svarūpamevānucintayaṃstatra ko mohaḥ kaḥ śokaḥ ekatvamanupaśyataḥ | tasmādvirāḍbhūtaṃ bhavyaṃ bhaviṣyadbhavatyanaśvarasvarūpam

121.1-5

4
aṇoraṇīyānmahato mahīyānātmāsya jantornihito guhāyām
tamakratuṃ paśyati vītaśoko dhātuḥ prasādānmahimānamīśam

121.1-6

5
apāṇipādo javano grahītā paśyatyacakṣuḥ sa śṛṇotyakarṇaḥ
sa vetti vedyaṃ na ca tasyāsti vettā tamāhuragryaṃ puruṣaṃ mahāntam

121.1-7

6
aśarīraṃ śarīreṣvanavastheṣvavasthitam
mahāntaṃ vibhumātmānaṃ matvā dhīro na śocati

121.18

7
sarvasya dhātāramacintyaśaktiṃ sarvāgamāntārthaviśeṣavedyam
parātparaṃ paramaṃ veditavyaṃ sarvāvasāne'ntakṛdveditavyam

121.19

kaviṃ purāṇaṃ puruṣottamottamaṃ sarveśvaraṃ sarvadevairupāsyam
anādimadhyāntamanantamavyayaṃ śivācyutāmbhoruhagarbhabhūdharam

121.20

svenāvṛtaṃ sarvamidaṃ prapañcaṃ pañcātmakaṃ pañcasu vartamānam
pañcīkṛtānantabhavaprapañcaṃ pañcīkṛtasvāvayavairasaṃvṛtam
parātparaṃ yo mahato mahāntaṃ svarūpatejomayaśāśvataṃ śivam

121.21

nāvirato duścaritānnāśānto nāsamāhitaḥ
nāśāntamanaso vāpi prajñānenainamāpnuyāt

nāntaḥprajñaṃ na bahiḥprajñaṃ na sthūlaṃ nāsthūlaṃ na jñānaṃ nājñānaṃ nobhayataḥprajñamagrāhyamavyavahāryaṃ svāntaḥsthitaḥ svayameveti ya evaṃ veda sa mukto
bhavati sa mukto bhavatītyāha bhagavān pitāmahaḥ

Commentaries (2)

Aṣṭottaraśatopaniṣadvivaraṇa — Upaniṣadbrahmayogin, Sanskrit
Vivaraṇa of Upaniṣadbrahmendrayogin — Upaniṣadbrahmendrayogin, Sanskrit